Owaisi reaction on UAE Hindu Temple: اویسی کا یواے ای میں مندر کی تعمیر پربڑا بیان،کہا جس دن میں یو اے ای کا بادشاہ بنوں گا تب……

متحدہ عرب امارات کے ابوظہبی میں بنائے گئے ہندو مندر کے بارے میں اے آئی ایم آئی ایم کے سربراہ اسدالدین اویسی نے کہا کہ وہ اس سے خوش ہیں یا نہیں، یہ تب ہی بتا سکیں گے جب وہ متحدہ عرب امارات کے بادشاہ بنیں گے۔ اس کے بعد یو اے ای کے ساتھ تجارتی تعلقات کے بارے میں بات کرتے ہوئے انہوں نے کہا کہ وہ ہندوستان کا بڑا پارٹنر ہے اور اگر اس کے ساتھ تعلقات اچھے ہوں گے تو خوشی ہوگی۔اسدالدین اویسی نے کہا کہ دونوں ممالک کے درمیان تعلقات اچھے ہوں تو خوشی کی بات ہے۔ انہوں نے یہ بھی کہا کہ ہمارے متحدہ عرب امارات میں اسٹریٹجک شراکت دار ہیں اور وہ ہندوستان میں سرمایہ کاری کرتے ہیں۔ ایک انٹرویو میں ان سے سوال کیا گیا کہ یو اے ای میں ایک عظیم الشان ہندو مندر بنایا گیا ہے اور وزیر اعظم نریندر مودی نے مندر کا افتتاح کیا تو کیا وہ خوش ہیں کہ یو اے ای میں ہندو مندر بنایا گیا؟

اس سوال کے جواب میں اویسی نے کہا، ‘جس دن میں یو اے ای کا بادشاہ بنوں گا، میں جواب دے سکوں گا۔ میں اس سے خوش ہوں کہ دونوں ملکوں کے تعلقات اچھے ہیں کیونکہ ہمارے وہاں اسٹریٹجک شراکت دار ہیں۔ ہندوستان سے ہمارے لاکھوں لوگ متحدہ عرب امارات میں کام کرتے ہیں۔ چنانچہ وہاں کے بادشاہ نے  یہ فیصلہ کیا۔ مودی جی نے ان سے درخواست کی تو بادشاہ نے انہیں اجازت دے دی۔ دونوں ممالک کے تعلقات اچھے ہوں تو وہاں سے ہمیں بھاری زرمبادلہ ملتا ہے۔ وہ ہمارے بڑے تجارتی شراکت دار ہیں اور ان کی ہندوستان میں سرمایہ کاری ہے۔

پی ایم مودی نے 14 فروری کو یو اے ای کے مندر کا افتتاح کیا

 پی ایم مودی نے 14فروری کو بسنت پنچمی کے دن ابوظہبی میں بنائے گئے اس پہلے ہندو مندر کا افتتاح کیا۔ گزشتہ جمعہ (1 مارچ)سے  مندر کو عام لوگوں کے لیے بھی کھول دیا گیا۔ یہ مندر 700 کروڑ روپے کی لاگت سے بنایا گیا ہے۔ بوچاسن کے رہائشی شری اکشر پرشوتم سوامی نارائن سنستھانے مندر کی تعمیر کروائی ہے۔اس کے سربراہ مہاراج سوامی نارائن نے سال 1997 میں مندر کا تصور پیش کیا تھا۔ مندر 27 ایکڑ اراضی پر بنایا گیا ہے جس میں سے 13.5 ایکڑ اراضی پر مندر بنایا گیا ہے اور باقی جگہ پر پارکنگ ہے۔مندر کے افتتاح کے موقع پر پی ایم مودی نے بتایا کہ انہوں نے سال 2015 میں یو اے ای کے صدر محمد بن زید النہیان کو مندر کی تجویز دی تھی۔ 2015 میں متحدہ عرب امارات کی حکومت نے 13.5 ایکڑ زمین تحفے میں دی تھی اور 2019 میں مندر کے لیے 13.5 ایکڑ زمین تحفے میں دی گئی تھی۔

بھارت ایکسپریس۔