Operation Sindoor: پاکستانی سرحد سے متصل اضلاع کے تمام اسکول بند، سری کرتار پور صاحب کوریڈور پر بھی لگا تالا

پہلگام دہشت گردانہ حملہ کے 15 دنوں بعد ہندوستانی فوج نے منگل اور بدھ کی درمیانی شب مقبوضہ کشمیر اور پاکستان میں سرجیکل اسٹرائک کی۔ اسے آپریشن سندور کا نام دیا گیا۔ اس کے تحت پاکستان میں 9 دہشت گردوں کے ٹھکانوں کو نیست و نابود کر دیا گیا۔ یہ ٹھکانے پاکستان اور مقبوضہ کشمیر میں واقع تھے، جنہیں ہندوستانی فوج کی جانب سے نشانہ بنایا گیا تھا۔

آپریشن سندور کے بعد پنجاب کے سرحدی اضلاع فیروز پور اور پٹھان کوٹ میں آج پرائیویٹ اور سرکاری اسکول بند کر دیے گئے ہیں، ڈپٹی کمشنر کی جانب سے یہ اطلاع فراہم کی گئی ہے۔ پٹھان کوٹ میں اگلے 72 گھنٹوں تک اسکول نہیں کھلیں گے۔ موجودہ حالات کو دیکھتے ہوئے پٹھان کوٹ ضلع انتظامیہ بھی الرٹ موڈ پر ہے۔ حالانکہ پنجاب کے سرحدی ضلع ترن تارن میں اسکول فی الحال بند نہیں کیے گئے ہیں۔

بتایا جاتا ہے کہ گرداسپور کے پندھیر گاؤں میں گزشتہ رات ایک دھماکہ ہوا۔ مقامی لوگوں کے مطابق گاؤں میں ایک بم گرا تھا جس کے باقیات کھیتوں میں بکھرے ہوئے ہیں۔ دھماکہ کے بعد پورے گاؤں میں دہشت کا ماحول ہے، جائے وقوع پر پہنچی پولیس تحقیقات میں مصروف ہے۔ یہ بھی خبر سامنے آ رہی ہے کہ پاکستان سے کشیدگی کے درمیان سرحدی گاؤں میں رہنے والے لوگ اپنا ساز و سامان لے کر محفوظ مقامات کی جانب رواں دواں ہیں۔ وہاں کے لوگوں کا کہنا ہے کہ ان میں حالات کا مقابلہ کرنے کا حوصلہ موجود ہے لیکن ضروری سامان اور بچوں کو لے کر وہ سرحد سے تھوڑی دور محفوظ مقام پر جا رہے ہیں۔

دوسری جانب سری کرتار پور صاحب کوریڈور اگلے حکم تک بند کر دیا گیا ہے۔ زائرین کی سیکورٹی کو مدنظر رکھتے ہوئے انتظامیہ کی جانب سے یہ فیصلہ لیا گیا ہے۔ ذرائع سے ملی اطلاع کے مطابق بدھ کو کوریڈور کے ذریعہ 491 زائرین کو پاکستان واقع سری کرتار پور صاحب جی کی زیارت کرنے کی اجازت ملی تھی۔ زائرین صبح 8 بجے ٹرمینل پیسنجر پر پہنچ گئے تھے، لیکن زیارت کا عمل شروع نہیں ہوا اور زائرین کو زیارت کے بغیر واپس لوٹنا پڑا۔

بھارت ایکسپریس اردو۔