Operation Kagar is a step towards wiping out Naxalism: آپریشن کگار: نکسل ازم کے خاتمے کی جانب ایک اہم قدم، ماؤنوازوں نے حکومت کے ساتھ امن مذاکرات کی خواہش کا کیا اظہار

سکیورٹی فورسز کی مسلسل اور پُرعزم کارروائیوں کے باعث تقریباً ختم ہو چکے ماؤنوازوں نے حالیہ دنوں میں مرکزی حکومت اور چھتیس گڑھ حکومت کے ساتھ امن مذاکرات کی خواہش ظاہر کی ہے۔

آپریشن سندور کے ہنگامے میں میڈیا شاید ایک اور اہم آپریشن — آپریشن کاگر —  کو نظر انداز کر بیٹھا۔ یہ آپریشن 21 اپریل کو تلنگانہ اور چھتیس گڑھ کی سرحد پر واقع کیرے گٹالو (Karreguttalu)  پہاڑی سلسلے کے گھنے جنگلات میں روپوش ماؤنوازوں کو ختم کرنے کے لیے شروع کیا گیا تھا۔ اس کارروائی میں 10,000 سکیورٹی اہلکار شامل تھے، جن میں سنٹرل ریزرو پولیس فورس (CRPF)، کمانڈو بٹالین فار ریزولیوٹ ایکشن  (CoBRA)، چھتیس گڑھ پولیس کے ضلعی ریزرو گارڈز، تلنگانہ کے گرے ہاؤنڈز، اور دیگر پولیس اہلکار شامل تھے۔

انٹیلی جنس اطلاعات کے مطابق تقریباً 400 ماؤنواز، جن میں اعلیٰ قیادت بھی شامل تھی، کیرے گٹالو کے علاقے میں موجود تھے۔ 288 مربع کلومیٹر پر پھیلے اس علاقے میں ملک کی اب تک کی سب سے بڑی آپریشن قرار دی گئی اس کارروائی کی نگرانی مرکزی وزیر داخلہ امت شاہ سمیت اعلیٰ حکام نے کی۔ CRPF کے ڈائریکٹر جنرل جی پی سنگھ نے تو آپریشن کے مکمل ہونے تک خود اس علاقے میں قیام کیا۔

سال کی ابتداء سے ماؤنواز بھاری جانی نقصان اٹھا چکے ہیں، اور اس وقت وہ مسلسل فرار کی حالت میں ہیں۔ مدوی ہڈما، دیوا بارسے، اور دامودر — جن میں سے ہر ایک کے سر کی قیمت ایک کروڑ روپے ہے — جنگلات میں موجود 216 غاروں میں روپوش تھے۔ ہڈما اور دیوا، دونوں کا تعلق سکما کے پُورورتی گاؤں سے ہے اور یہ کئی سکیورٹی اہلکاروں کی ہلاکت کے ذمہ دار سمجھے جاتے ہیں۔

ماؤنوازوں کو ایک بڑی برتری یہ حاصل تھی کہ وہ پہاڑ کی چوٹیوں پر مستحکم پوزیشن پر تھے، جس سے سکیورٹی فورسز کے لیے آگے بڑھنا دشوار تھا۔ 700 میٹر بلند ان پہاڑوں پر بچھائی گئی بارودی سرنگوں نے پیش قدمی کو مزید مشکل بنا دیا۔ تمام تر احتیاط کے باوجود 18 اہلکار شدید زخمی ہوئے۔ کوبرا بٹالین 204 کے اسسٹنٹ کمانڈنٹ ساگر بورڈے، ایک زخمی کمانڈو کو بچانے کے دوران خود بارودی سرنگ پر چڑھ گئے، جس کے نتیجے میں ان کی ٹانگ شدید زخمی ہوئی اور بعد ازاں دہلی کے ایمس اسپتال میں ان کی بائیں ٹانگ کاٹنی پڑی۔

21  دن جاری رہنے والے اس آپریشن میں 31 ماؤنواز مارے گئے، جن میں 15 خواتین شامل تھیں۔ ان میں سے 28 کی شناخت ہو چکی ہے، جن کے سروں پر مجموعی طور پر 1.72 کروڑ روپے کے انعامات تھے۔ آپریشن کے دوران 400 سے زائد دیسی ساختہ بم  (IEDs)، 818 انڈر بیرل گرنیڈ لانچر، 35 خودکار اور نیم خودکار رائفلیں، اور بڑی تعداد میں تاریں اور بارودی مواد برآمد ہوا، جو ماؤنوازوں کے لیے ایک بڑا دھچکہ ہے۔

کیرے گٹالو کی پہاڑیوں پر سکیورٹی فورسز کے تسلط نے ماؤنوازوں کو ان کے اس “ناقابلِ تسخیر” گڑھ سے نکال باہر کیا ہے۔

اگرچہ ہڈما، دیوا اور دامودر فرار ہونے میں کامیاب رہے، لیکن اب ماؤنواز منتشر اور بے سمتی کا شکار ہو چکے ہیں۔

پچھلے سال وہ 280 افراد کھو چکے تھے، اور اس سال اب تک 197 مارے جا چکے ہیں۔

دوسری جانب، 20 سکیورٹی اہلکار شہید اور 16 دیہاتی ماؤنوازوں کے ہاتھوں “مخبر” ہونے کے الزام میں قتل ہوئے۔

مفرور ماؤنوازوں کو دوبارہ منظم ہونے سے روکنے کے لیے چھتیس گڑھ سے ملحقہ ریاستوں میں انٹیلیجنس کو مزید فعال کرنا اور مربوط آپریشنز جاری رکھنا ناگزیر ہے۔

اب، ماؤنوازوں نے مرکز اور ریاست سے براہ راست ردعمل نہ ملنے پر مختلف تنظیموں اور کارکنوں سے مداخلت کی اپیل شروع کر دی ہے۔ تاہم، ان کی نیت پر شبہ اس وقت گہرا ہو جاتا ہے جب وہ ایک طرف جنگ بندی کی اپیل کرتے ہیں اور دوسری طرف 8 مئی کو تلنگانہ کے ملگو ضلع کے نوگور جنگلات میں گرے ہاؤنڈز کے تین کمانڈوز کو گھات لگا کر قتل کر دیتے ہیں۔

سکیورٹی فورسز کو خدشہ ہے کہ کسی بھی جنگ بندی یا مذاکرات کا فائدہ اٹھا کر ماؤنواز دوبارہ منظم ہو سکتے ہیں۔

14 مئی کو بیجاپور میں پریس کانفرنس کرتے ہوئے CRPF کے ڈائریکٹر جنرل نے کہا، “آپریشن کگار ماؤنواز ازم کے خاتمے کی شروعات ہے۔”

امید ہے کہ سکیورٹی فورسز اسے منطقی انجام تک پہنچائیں گی اور وزیر داخلہ امت شاہ کی جانب سے مقرر کردہ مارچ 2026 کی ڈیڈلائن سے پہلے ہی ماؤازم کا مکمل خاتمہ ممکن ہو جائے گا۔

بھارت ایکسپریس اردو۔