Union Home Minister Amit Shah Darbhanga Rally : نہ لالو کا بیٹا وزیراعلیٰ بنے گا، نہ سونیا گاندھی کا بیٹا وزیراعظم: مرکزی وزیر داخلہ امت شاہ

دربھنگہ، 4 نومبر: مرکزی وزیر داخلہ امت شاہ نے اتوار کو بہار کے دربھنگہ کے جالے اسمبلی حلقہ میں ایک بڑی انتخابی ریلی سے خطاب کرتے ہوئے لالو پرساد یادو اور سونیا گاندھی کو نشانہ بنایا اور خاندان پرستی کے خلاف زوردار حملہ بولا۔ انہوں نے کہا کہ جو لیڈر صرف اپنے بیٹے یا بیٹی کو اقتدار میں لانا چاہتے ہیں، وہ ملک کے نوجوانوں، کسانوں، غریبوں اور خواتین کی فکر نہیں کر سکتے۔

امت شاہ نے اپنے خطاب میں واضح کہا کہ ”لالو-رابڑی اپنے بیٹے کو وزیراعلیٰ بنانا چاہتے ہیں اور سونیا گاندھی اپنے بیٹے کو وزیراعظم بنانا چاہتی ہیں۔ میں دونوں کو کہنا چاہتا ہوں — نہ لالو-رابڑی کا بیٹا وزیراعلیٰ بنے گا اور نہ سونیا گاندھی کا بیٹا وزیراعظم بنے گا“۔ انہوں نے مزید کہا کہ بہار میں نتیش کمار اور مرکز میں نریندر مودی کی قیادت میں حکومت مستحکم ہے اور ”ان دونوں عہدوں پر کسی کے لیے بھی کوئی خالی جگہ نہیں ہے“۔

مرکزی وزیر داخلہ نے سوال اٹھایا کہ ”جو لیڈر اپنے خاندان کے لیے سیاست کرتے ہیں، کیا وہ جالے کے نوجوانوں، جیوِکا دیدیوں، کسانوں، غریبوں اور مچھیرے طبقے کی فکر کر سکتے ہیں؟ نہیں، ان کی فکر صرف وزیراعظم نریندر مودی اور وزیراعلیٰ نتیش کمار ہی کر سکتے ہیں“۔ امت شاہ نے راہل گاندھی کی بہار یاترا پر طنز کرتے ہوئے کہا کہ ”راہل بابو نے جالے میں ‘گھسپیٹھیا بچاؤ یاترا’ نکالی ہے۔ میں انہیں کہنا چاہتا ہوں کہ چاہے کتنی بھی گھسپیٹھیا بچاؤ یاترا نکال لو، مودی جی گھسپیٹھیوں کو ملک سے باہر نکالنے کا کام کریں گے۔ بہار کا وزیراعلیٰ کون ہوگا، یہ بہار کے لوگ طے کریں گے، بنگلہ دیش کے لوگ نہیں“۔

انہوں نے اپنے خطاب میں لالو پرساد یادو پر مبینہ گھوٹالوں کی لسٹ بھی سنائی۔ امت شاہ نے کہا کہ ”لالو جی نے چارہ گھوٹالا، لینڈ فار جاب اسکیم، ہوٹل گھوٹالا، الکترا گھوٹالا، سیلاب راحت گھوٹالا، بھرتی گھوٹالا اور اے بی ایکسپورٹ گھوٹالا کیا۔ لالو-رابڑی نے جتنے گھوٹالے کیے، اتنے شاید کسی نے نہیں کیے اور کانگریس نے تو 12 لاکھ کروڑ روپے کے گھپلے کیے۔ یہ لوگ بہار کا بھلا کیا کریں گے“؟

انہوں نے مودی اور نتیش کمار کی شفاف شبیہ کا ذکر کرتے ہوئے کہا کہ وزیراعظم مودی نے 11 سال اور نتیش کمار نے 20 سال حکومت کی، مگر ”ان پر چار آنے کا بھی بدعنوانی کا الزام نہیں لگا“۔ امت شاہ نے کہا کہ بہار میں ترقی، بدعنوانی سے پاک نظام اور قانون کی حکمرانی صرف مودی اور نتیش کی جوڑی کے ذریعے ممکن ہوئی ہے، جبکہ لالو اور کانگریس کی سیاست صرف اقتدار اور خاندان کے ارد گرد گھومتی ہے۔

بھارت ایکسپریس اردو