Amit Shah lauds NDRF on Raising Day: امت شاہ اور بھارتی فوج نے این ڈی آر ایف کے 21واں یوم تاسیس پر پیش کی مبارکباد

نیشنل ڈیزاسٹر ریسپانس فورس (این ڈی آر ایف) آج اپنا 21واں یوم تاسیس منا رہی ہے۔ اس موقع پر ملک کے وزیر داخلہ امت شاہ نے فورس کے جوانوں اور ان کے اہلِ خانہ کو مبارکباد دیتے ہوئے این ڈی آر ایف کو آفات کے وقت ’’قوم کے اعتماد کا مضبوط ستون‘‘ قرار دیا۔ بھارتی فوج کی جانب سے بھی این ڈی آر ایف کی خدمات کو سلام پیش کیا گیا اور اس کے حوصلے، قربانی اور پیشہ ورانہ صلاحیتوں کی ستائش کی گئی۔ وزیر داخلہ امت شاہ نے اپنے سرکاری ایکس ہینڈل پر پیغام جاری کرتے ہوئے کہا کہ یومِ تاسیس کے موقع پر این ڈی آر ایف کے تمام اہلکاروں کو دل کی گہرائیوں سے مبارکباد۔ انہوں نے کہا کہ مودی حکومت کے ’’آفت سے محفوظ بھارت‘‘ کے عزم کو حقیقت میں بدلنے میں این ڈی آر ایف کا کردار نہایت اہم رہا ہے اور آج یہ فورس آفات کے دوران ملک کے لیے ایک قابلِ اعتماد سہارا بن چکی ہے۔ امت شاہ نے اُن جانباز شہیدوں کو بھی خراجِ عقیدت پیش کیا جنہوں نے دوسروں کی جان بچانے کے لیے اپنی جانوں کا نذرانہ پیش کیا۔

انہوں نے مزید کہا کہ جب بھی ملک کے کسی حصے میں سیلاب، زلزلہ، سمندری طوفان یا کوئی اور قدرتی آفت آتی ہے تو نارنجی وردی میں ملبوس این ڈی آر ایف کے بہادر جوان سب سے پہلے مدد کے لیے پہنچتے ہیں۔ یہی وجہ ہے کہ عوام کی سب سے بڑی امید این ڈی آر ایف بن چکی ہے۔ وزیرِ داخلہ کے مطابق وزیرِ اعظم نریندر مودی کا خواب ہے کہ بھارت کو ایک آفت سے نمٹنے والا مضبوط اور محفوظ ملک بنایا جائے، اور اس خواب کی تکمیل میں این ڈی آر ایف کی محنت، لگن اور قربانیوں کا بڑا حصہ ہے۔

این ڈی آر ایف کا قیام اگرچہ زیادہ پرانا نہیں، لیکن اس کی کامیابیاں اور خدمات بے مثال ہیں۔ اس فورس کی بنیاد 19 جنوری 2006 کو رکھی گئی تھی۔ دراصل 1999 کے اڈیشہ کے تباہ کن سمندری طوفان، 2001 کے گجرات زلزلے اور 2004 کی ہند بحرالکاہل سونامی جیسی بھیانک آفات کے بعد حکومت کو احساس ہوا کہ ملک میں ایک ایسی خصوصی فورس کی ضرورت ہے جو صرف اور صرف آفات سے نمٹنے کے لیے تربیت یافتہ ہو۔اسی ضرورت کے تحت ’’ڈیزاسٹر مینجمنٹ ایکٹ 2005‘‘ کے تحت 2006 میں این ڈی آر ایف کا قیام عمل میں آیا، جس کی شروعات آٹھ بٹالین سے ہوئی۔ آج این ڈی آر ایف کے پاس سولہ سے زائد بٹالین ہیں جو ملک کے مختلف حصوں میں تعینات ہیں، تاکہ کسی بھی ہنگامی صورتحال میں کم سے کم وقت میں موقع پر پہنچ کر جان و مال کی حفاظت کی جا سکے۔

بھارت ایکسپریس اردو