NDA Parliamentary Party Meeting: این ڈی اے پارلیمانی پارٹی کا اجلاس کل، مرکزی بجٹ 2026 اور وکست بھارت 2047 پر ہوگی تفصیلی بحث

نئی دہلی : نیشنل ڈیموکریٹک الائنس این ڈی اے کی پارلیمانی پارٹی کا اجلاس منگل کی صبح منعقد ہوگا، جس میں مرکزی بجٹ 2026 اور وِکست بھارت 2047 کے وژن پر تفصیلی غور و خوض کیا جائے گا۔ یہ اجلاس صبح ساڑھے نو بجے نئی دہلی میں ہوگا، جس میں این ڈی اے کے تمام سرکردہ رہنما، وزرا اور اراکین پارلیمنٹ شرکت کریں گے۔ اس اہم اجلاس میں وزیر اعظم نریندر مودی، وزیر داخلہ امت شاہ، وزیر دفاع راج ناتھ سنگھ، بی جے پی کے قومی صدر نتن نابن اور این ڈی اے کے دیگر تمام مرکزی وزرا اور پارلیمنٹیرینز موجود ہوں گے۔ وزیر اعظم نریندر مودی اجلاس سے خطاب بھی کریں گے اور بجٹ کے حوالے سے حکومت کے وژن کو واضح کریں گے۔

وزیر خزانہ نرملا سیتارامن اجلاس کے دوران ایک تفصیلی پریزنٹیشن کے ذریعے مرکزی بجٹ 2026 کی خصوصیات اور مستقبل کے منصوبوں پر روشنی ڈالیں گی۔ وہ بتائیں گی کہ یہ بجٹ کس طرح وکست بھارت 2047 کے ہدف کی جانب ایک بڑا قدم ہے۔ اجلاس میں اس بات پر بھی رہنمائی دی جائے گی کہ بجٹ کی اہم خصوصیات اور اس کے فوائد کو عوام تک مؤثر انداز میں کیسے پہنچایا جائے، ساتھ ہی اس کے لیے ایک واضح روڈ میپ بھی پیش کیا جائے گا۔

واضح رہے کہ وزیر خزانہ نرملا سیتارامن نے اتوار کے روز لوک سبھا میں مرکزی بجٹ 2026 پیش کیا تھا، جو ان کے سیاسی کیریئر کا نواں بجٹ تھا۔ یہ بجٹ تین بنیادی ذمہ داریوں پر مبنی ہے، جن کا مقصد معیشت کی رفتار کو تیز کرنا، مسابقت میں اضافہ کرنا، عوامی امنگوں کو پورا کرنا اور اس بات کو یقینی بنانا ہے کہ ہر خاندان، ہر طبقہ اور ہر خطے کو وسائل اور ترقی کے مواقع میسر آ سکیں۔وزیر اعظم نریندر مودی نے بجٹ کی تعریف کرتے ہوئے اسے بے پناہ مواقع کی شاہراہ قرار دیا۔ ان کا کہنا تھا کہ اصلاحات کی ٹرین جس پر بھارت سوار ہے، اس بجٹ کے ذریعے نئی توانائی اور رفتار حاصل کرے گی۔ وزیر اعظم کے مطابق یہ بجٹ موجودہ خوابوں کو حقیقت میں بدلنے اور بھارت کے روشن مستقبل کی مضبوط بنیاد رکھنے والا ہے، جو وِکست بھارت 2047 کے عزم کو پورا کرنے میں مددگار ثابت ہوگا۔

وزیر اعظم نے بجٹ کو نوجوانوں کی طاقت پر مبنی بجٹ قرار دیتے ہوئے کہا کہ یہ نوجوان بھارت کی سوچ، خواب، عزم اور توانائی کی عکاسی کرتا ہے۔ ان کے مطابق بجٹ کی تجاویز مختلف شعبوں میں مستقبل کے لیڈرز، اختراع کاروں اور تخلیق کاروں کو تیار کریں گی۔ طبی مراکز کی تعمیر، صحت سے وابستہ پیشہ ور افراد کی ترقی، اورنج اکانومی اور اے وی جی سی سیکٹر کو فروغ، سیاحت میں اضافہ اور کھیلوں کے شعبے میں نئے مواقع اس بجٹ کی نمایاں خصوصیات ہیں، جو نوجوانوں کو آگے بڑھنے اور قیادت سنبھالنے کا موقع فراہم کریں گی۔

بھارت ایکسپریس اردو