Amar Shaheed Sukhdev: امت شاہ نے شہید سکھ دیو کے یوم پیدائش پر پیش کی خراج عقیدت

نئی دہلی: جب بھی بھارت کی آزادی کی جدوجہد کا ذکر ہوتا ہے تو “بھگت سنگھ، راج گرو اور سکھ دیو” کے نام ایک ساتھ زبان پر آتے ہیں۔ یہ صرف تین انقلابیوں کے نام نہیں بلکہ دوستی، قربانی اور وطن سے بے پناہ محبت کی ایسی مثال ہیں جنہوں نے برطانوی حکومت کی بنیادیں ہلا کر رکھ دی تھیں۔ آج 15 مئی کو ملک عظیم انقلابی سکھ دیو تھاپر کی جینتی منا رہا ہے۔ اس موقع پر مرکزی وزیر داخلہ اور تعاون امت شاہ نے انہیں خراجِ عقیدت پیش کرتے ہوئے ان کی قربانی کو قوم کے لیے ہمیشہ مشعلِ راہ قرار دیا۔امت شاہ نے سوشل میڈیا پلیٹ فارم ‘ایکس’ پر اپنے پیغام میں کہا کہ سکھ دیو تھاپر کا بے مثال حوصلہ اور مادرِ وطن کے لیے ان کی غیر معمولی قربانی آج بھی ہر بھارتی کے دل میں حب الوطنی کی شمع روشن رکھتی ہے۔ انہوں نے کہا کہ سکھ دیو صرف ایک نوجوان انقلابی نہیں تھے بلکہ وہ ایک مضبوط نظریہ رکھنے والے ایسے رہنما تھے جنہوں نے انگریز حکومت کے خلاف جدوجہد کو نئی سمت دی۔

انہوں نے لالا لاجپت رائے کی موت کا بدلہ لینے میں بھی اہم کردار ادا کیا تھا۔ سکھ دیو، ہندوستان سوشلسٹ ریپبلکن ایسوسی ایشن (HSRA) کے اہم رکن اور تنظیمی دماغ سمجھے جاتے تھے۔ انہوں نے بھگت سنگھ اور راج گرو کے ساتھ مل کر انگریز سامراج کے خلاف مسلح تحریک کی قیادت کی۔ لاہور سازش کیس سمیت کئی خفیہ منصوبوں کو عملی جامہ پہنانے میں بھی ان کا اہم کردار رہا۔23 مارچ 1931 کو سکھ دیو، بھگت سنگھ اور راج گرو نے ایک ساتھ پھانسی کے پھندے کو گلے لگا کر تاریخ میں امر مقام حاصل کیا۔ ان کی قربانی نے آزادی کی تحریک کو نئی طاقت بخشی اور نوجوانوں میں انقلابی جذبہ پیدا کیا۔

سکھ دیو تھاپر 15 مئی 1907 کو پنجاب کے لدھیانہ میں پیدا ہوئے تھے۔ بچپن ہی سے وہ برطانوی راج کے ظلم و ستم کو قریب سے دیکھ رہے تھے۔ وہ صرف ایک بہادر مجاہد نہیں بلکہ ایک گہرے سوچ رکھنے والے نوجوان تھے، جو ایسے بھارت کا خواب دیکھتے تھے جہاں ظلم، ناانصافی اور استحصال کی کوئی جگہ نہ ہو۔امت شاہ نے اپنے پیغام میں کہا کہ آج ملک جس آزاد فضا میں سانس لے رہا ہے، وہ سکھ دیو جیسے عظیم سپوتوں کی قربانیوں کا نتیجہ ہے۔ انہوں نے نوجوانوں سے اپیل کی کہ وہ انقلابیوں کی زندگی سے تحریک حاصل کریں اور ملک کی ترقی و خدمت کو اپنا مقصد بنائیں۔

بھارت ایکسپریس اردو