PM Modi Kolkata Rally: کولکاتا میں وزیر اعظم مودی کا ٹی ایم سی پر شدید حملہ، کہا- کانگریس، بائیں بازو اور اب ٹی ایم سی نے بنگال کو پیچھے دھکیلا

کولکاتا: وزیر اعظم نریندر مودی نے ہفتہ کے روز کولکاتا کے تاریخی بریگیڈ پریڈ گراؤنڈ میں ایک بڑی عوامی ریلی سے خطاب کرتے ہوئے ریاستی حکومت پر سخت تنقید کی اور دعویٰ کیا کہ مغربی بنگال میں تبدیلی کی لہر چل پڑی ہے جسے کوئی بھی طاقت روک نہیں سکتی۔ انہوں نے کہا کہ ریاست میں سیاسی تبدیلی اب ناگزیر ہو چکی ہے اور عوام کی خواہشات کو زیادہ دیر تک دبایا نہیں جا سکتا۔ اپنے خطاب میں وزیر اعظم نے کہا کہ موجودہ حکومت چاہے جتنی کوشش کر لے، تبدیلی کی اس آندھی کو روکنا ممکن نہیں۔ انہوں نے کہا کہ بھارتیہ جنتا پارٹی اور اس کے اتحادیوں کے ساتھ روحانی اور ثقافتی طاقتوں کی دعائیں ہیں اور یہی طاقت بنگال کے مستقبل کی تعمیر میں اہم کردار ادا کرے گی۔

انہوں نے کہا کہ ریاست کی سیاست میں برسوں سے ایک ہی طرز کی حکومتیں آتی رہی ہیں۔ پہلے کانگریس کی حکومت رہی، اس کے بعد بائیں بازو کی جماعتوں نے اقتدار سنبھالا اور اب آل انڈیا ترنمول کانگریس برسراقتدار ہے۔ وزیر اعظم کے مطابق ان تمام ادوار میں ترقی کی رفتار متاثر ہوئی اور ریاست بنیادی ڈھانچے کے معاملے میں پیچھے رہ گئی۔ انہوں نے الزام لگایا کہ بنگال میں صنعتوں کی بندش اور کاروبار کی سست روی کے باعث نوجوانوں کے لیے روزگار کے مواقع کم ہو گئے ہیں۔ ان کے مطابق موجودہ حکومت کے دور میں نوکریوں میں بدعنوانی کے الزامات بھی سامنے آئے ہیں جس کی وجہ سے نوجوانوں کا اعتماد متزلزل ہوا ہے۔

وزیر اعظم نے کہا کہ ایک وقت تھا جب بنگال کو ملک کی اقتصادی ترقی کا مرکز سمجھا جاتا تھا اور یہاں صنعت و تجارت عروج پر تھا۔ لیکن آج حالات اس کے برعکس ہیں اور نوجوانوں کو روزگار کے لیے دیگر ریاستوں کا رخ کرنا پڑ رہا ہے۔ انہوں نے ریاستی حکومت پر الزام لگاتے ہوئے کہا کہ کئی مرکزی فلاحی منصوبے عوام تک نہیں پہنچنے دیے جاتے۔ ان کے مطابق جب تک مقامی سطح پر مبینہ طور پر ”کٹ منی“ نہیں دی جاتی، اس وقت تک اسکیموں کے فوائد غریبوں تک نہیں پہنچتے۔

مودی نے اپنے خطاب میں پی ایم سوریہ گھر مفت بجلی یوجنا کا بھی ذکر کیا اور کہا کہ اس اسکیم کے تحت حکومت مستحق خاندانوں کو سولر توانائی کے ذریعے مفت بجلی فراہم کرنے کے لیے مالی مدد دیتی ہے۔ انہوں نے کہا کہ اس منصوبے کے تحت ہر مستفید ہونے والے کو 75 سے 80 ہزار روپے تک کی مدد دی جاتی ہے جس سے بجلی کا بل تقریباً صفر ہو جاتا ہے۔ انہوں نے یہ بھی کہا کہ اسی طرح آیوشمان بھارت یوجنا کے تحت ملک کے کروڑوں خاندانوں کو پانچ لاکھ روپے تک کے مفت علاج کی سہولت فراہم کی جا رہی ہے، لیکن ان کے مطابق مغربی بنگال میں اس اسکیم کو مکمل طور پر نافذ نہیں ہونے دیا گیا۔ اپنی تقریر کے اختتام پر وزیر اعظم نے کہا کہ بنگال کے عوام کو بھی ان تمام فلاحی منصوبوں کا پورا فائدہ ملنا چاہیے اور آنے والے وقت میں ریاست میں ترقی اور خوشحالی کا نیا دور شروع ہوگا۔ انہوں نے کہا کہ عوام کی طاقت سے ہی بنگال کا مستقبل بدلنے والا ہے۔

بھارت ایکسپریس اردو۔