Mock drills held across the country: دہلی، ممبئی اور اترپردیش سمیت ملک بھر میں کیا گیا آج ماک ڈرل، شہریوں کو سکھائی گئیں احتیاطی تدابیر

جموں و کشمیر کے پہلگام میں 22 اپریل کو پاکستان کے حمایت یافتہ دہشت گردوں کے حملے نے پورے ملک کو ہلا کر رکھ دیا تھا۔ اس حملے کے بعد پاکستان اور بھارت کے درمیان کشیدگی عروج پر ہے۔ بھارتی فوج کی جانب سے پاکستان میں دہشت گردوں کے ٹھکانوں پر گزشتہ رات کی گئی کارروائی کے بعد ملک میں کسی بھی آفت سے نمٹنے کی تیاریاں تیز کر دی گئی ہیں۔ اسی سلسلے میں 7 مئی کو ملک بھر میں ماک ڈرل کا انعقاد کیا گیا۔

دہلی کے شکور بستی میں ہوا ماک ڈرل

دہلی کے شکور بستی ریلوے اسٹیشن پر ماک ڈرل کا انعقاد کیا گیا۔ اس مشق میں دکھایا گیا کہ دہشت گردانہ حملے میں ٹرین کی ایک بوگی میں آگ لگ گئی اور وہ پٹری سے اتر گئی۔ اس صورت حال میں راحت اور بچاؤ کے کاموں کا کامیاب مظاہرہ کیا گیا۔ ریلوے ملازمین نے فوری طور پر بوگی میں لگی آگ کو بجھایا، اسے دوبارہ پٹری پر ڈال دیا اور زخمیوں کو فوری طور پر قریبی اسپتال پہنچایا۔ اس مشق میں ڈی آر ایم، اے ڈی آر ایم، آر پی ایف، دہلی ڈویژن کے انجینئرنگ ڈیپارٹمنٹ سمیت ریلوے کے سینکڑوں ملازمین نے حصہ لیا۔

اترپردیش میں جاری کیا گیا ریڈ الرٹ، تمام اضلاع ہوئے ماک ڈرل

دریں اثنا بدھ کے روز اتر پردیش میں ریڈ الرٹ جاری کیا گیا اور انتظامیہ نے کسی بھی صورت حال سے نمٹنے کے لیے ریاست بھر میں ماک ڈرل کی گئی۔ یوپی کے ڈی جی پی پرشانت کمار نے ریڈ الرٹ کا اعلان کرتے ہوئے ریاستی پولیس حکام سے کہا کہ وہ ریاست میں اہم تنصیبات کی حفاظت کو یقینی بنانے کے لیے فوج اور ہندوستانی فضائیہ کے ساتھ مل کر کام کریں۔ یہ دعوی کرتے ہوئے کہ ریاستی پولیس الرٹ موڈ میں ہے اور شہریوں کو تحفظ فراہم کرنے کے لیے تیار ہے، ڈی جی پی نے کہا کہ ریاست میں اہم مذہبی اور دیگر اداروں کی حفاظت کو بھی بڑھایا گیا ہے۔

وہیں وارانسی، چترکوٹ، کانپور، لکھیم پور کھیری، غازی آباد اور مراد آباد سمیت مختلف اضلاع میں ماک ڈرل کی گئی۔ وارانسی کے رہائشیوں کو تربیت دی گئی کہ حملے کے دوران اپنے آپ کو کیسے بچایا جائے۔ شہریوں کو آگ بجھانے کی تربیت بھی دی گئی۔ ایک ماک ڈرل کے دوران بھگدڑ کا منظر تشکیل دیتے ہوئے لوگوں کو بتایا گیا کہ ایسی صورت حال میں خود کو کیسے بچایا جائے۔ انہیں ایمرجنسی کی صورت میں کارڈیو پلمونری ریسیسیٹیشن (سی پی آر) دینے کی تربیت بھی دی گئی۔ چترکوٹ میں فضائی حملوں کے سے نمٹنے کے طریقے بتائے گئے اور غازی آباد اور مراد آباد میں سائرن کی آواز سنتے ہی لوگوں سے کان ڈھانپ کر زمین پر لیٹ جانے کو کہا گیا۔

ممبئی میں بھی کیا گیا ماک ڈرل

جنوبی ممبئی کے کراس میدان میں بھی سائرن بجا کر ماک ڈرل کا آغاز کیا گیا۔ اس ماک ڈرل میں شہری دفاع، فائر بریگیڈ اور طبی عملے کی ٹیمیں شامل تھیں جو لوگوں کو ’’زخمیوں‘‘ کو بچانے کی تربیت دے رہی تھیں۔ آپریشن ابھیاس کے تحت منعقد کی گئی اس ماک ڈرل میں متعدد ایمرجنسی رسپانس ٹیموں کی مربوط کوششیں شامل تھیں۔

ماک ڈر، کے بعد میڈیا سے بات کرتے ہوئے سول ڈیفنس کے ڈائریکٹر پربھات کمار نے کہا کہ یہ مشق آپریشن ابھیاس کا حصہ تھی۔ انھوں نے سول ڈیفنس، ضلع انتظامیہ، برہن ممبئی میونسپل کارپوریشن (بی ایم سی)، فائر بریگیڈ، این ڈی آر ایف، ہوم گارڈز، این سی سی، نیشنل سروس اسکیم (این ایس ایس) اور پیرا میڈیکس سمیت مختلف ایجنسیوں کی شرکت پر روشنی ڈالی۔

کیا ہے ماک ڈرل کا مقصد؟

اس ماک ڈرل کا بنیادی مقصد کسی ہنگامی صورت حال میں ریلوے کی تیاریوں کی تاثیر کا جائزہ لینا تھا۔ اس طرح کی مشقیں نہ صرف مختلف محکموں کے درمیان ہم آہنگی کو جانچنے کا موقع فراہم کرتی ہیں بلکہ ان میں پیدا ہونے والی کوتاہیوں کو دور کرنے کا بھی موقع فراہم کرتی ہیں۔ اس سے ملازمین کو اپنی کارکردگی کو بہتر طور پر سمجھنے اور بہتر بنانے کا موقع بھی ملتا ہے۔

بھارت ایکسپریس اردو