MCD Mayor Election: دہلی والوں کو میئر کے لئے کب تک کرنا ہوگا انتظار؟ الجھتا جا رہا ہے ایم سی ڈی میئر کا الیکشن،

Delhi MCD Mayor Election: دہلی میونسپل کارپوریشن (Delhi Municipal Corporation) اپنے میئرکومنتخب کرنے میں ایک ماہ میں تیسری بار پیر کے روز ناکام رہا۔ میئرالیکشن میں ایلڈرمین (نامزد کونسلر) کو ووٹ دینے کی اجازت دینے کے فیصلے کی وجہ سے ایوان میں ہنگامہ ہوا۔ عام آدمی پارٹی (Aam Aadmi Party)  نے بی جے پی (BJP) پر اس انتخابی عمل کو روکنے کے لئے سازش کرنے کا الزام لگایا اورکہا کہ وہ عدالت کی نگرانی میں یہ الیکشن کرانے کی اپیل کے ساتھ  سپریم کورٹ (Suprme Court) کا رخ کرے گی۔ اس پورے معاملے کے درمیان سب سے بڑا سوال یہ ہے کہ آخر دہلی ایم سی ڈی کومیئر کب ملے گا؟ آخر اس معاملے میں اتنی تاخیر کا ذمہ دار کون ہے؟ کب تک دہلی کے لوگوں کو دونوں جماعتوں کی آپسی رسہ کشی کا خمیازہ بھگتنا پڑے گا۔

ایوان میں 6 جنوری سے غیرمعمولی واقعات دیکھنے کو ملا ہے، جب  میونسپل کارپوریشن الیکشن کے بعد پہلی باریہ میٹنگ منعقد ہوگئی تھی، لیکن بی جے پی اورعام آدمی پارٹی کے اراکین کے درمیان تلخ نوک جھونک کے بعد اسے ملتوی کردیا گیا تھا۔ انتخابی افسر(پروٹم اسپیکر) اور بی جے پی کی کونسلر ستیہ شرما کی طرف سے تیسری میٹنگ بھی ملتوی کئے جانے کے بعد عام آدمی پارٹی اور بی جے پی کے درمیان الزام تراشی اور جوابی الزام تراشی کا دور شروع ہوگیا۔

بی جے پی اور عام آدمی پارٹی نے لگایا ایک دوسرے پر یہ الزام

عام آدمی پارٹی نے کہا کہ پیر کے روز میئر کا الیکشن نہیں ہوسکا، کیونکہ بی جے پی جمہوریت اور ہندوستان کے آئین کا گلا گھونٹ رہی ہے۔ وہیں بی جے پی نے عام آدمی پارٹی پر الزام لگایا کہ وہ اس الیکشن میں رخنہ اندازی کرنے کے کسی نہ کسی بہانے کے ساتھ آتی ہے۔ آدھے گھنٹے کی تاخیرکے بعد ایوان کی میٹنگ تقریباً ساڑھے 11 بجے شروع ہوئی اور پروٹم اسپیکر نے اعلان کیا کہ ایلڈرمین کو میئر، ڈپٹی میئرکے عہدوں اورمیونسپل کارپوریشن کی اسٹینڈنگ کمیٹی کے 6 اراکین کے لئے الیکشن میں ووٹ دینے کی اجازت دی جائے گی۔

منیش سسودیا کا بی جے پی پر حملہ

دہلی کے نائب وزیراعلیٰ منیش سسودیا نے ایوان کی میٹنگ شروع ہونے سے پہلے الزام لگایا تھا کہ بی جے پی نے میئر کے الیکشن میں رخنہ اندازی کرنے کے لئے اپنے کونسلروں کو پچھلی بارکی طرح ہنگامہ کرنے کا حکم دیا ہے۔ وہیں آتشی مارلینا نے دعویٰ کیا کہ بی جے پی نے کارروائی میں خلل اندازی کرنے کا منصوبہ بنایا، تاکہ ایوان کی کارروائی ملتوی ہوسکے۔ اس کے علاوہ سنجے سنگھ نے بھی بی جے پی پرجمہوریت کو تار تار کرنے کا الزام لگایا۔

بی جے پی کے کارگزار صدر نے کیا پلٹ وار

بی جے پی کی دہلی یونٹ کے کارگزار صدر ویریندر سچدیوا نے پلٹ وار کرتے ہوئے کہا تھا کہ یہ عام آدمی پارٹی ہی ہے، جس نے اپنے کونسلروں کو ایسا کرنے کے لئے کہا ہے اوراگرایوان کی کارروائی ملتوی ہوتی ہے تو وزیراعلیٰ اروند کیجریوال اس کے لئے ذمہ دار ہوں گے۔ اس درمیان کانگریس کی دہلی یونٹ کے سربراہ انل کمار نے الزام لگایا کہ عام آدمی پارٹی نے ایم سی ڈی الیکشن میں اسے واضح اکثریت دینے والی قومی دارالحکومت کے لوگوں کے ساتھ دھوکہ کیا ہے۔