Mohibullah Nadvi criticizes Mayawati: ’’مایاوتی نے انتخابات میں سیکولر طاقتوں کا نہیں دیا ساتھ…‘‘، ایس پی ایم پی محب اللہ ندوی کا بی ایس پی سپریمو پر سخت تبصرہ

نئی دہلی: بی ایس پی سربراہ مایاوتی کی طرف سے سماج وادی پارٹی اور کانگریس کو ایس سی-ایس ٹی مخالف قرار دیے جانے پر اتر پردیش کی رام پور لوک سبھا سیٹ سے ایس پی کے رکن پارلیمنٹ محب اللہ ندوی نے جوابی حملہ کیا ہے۔

رکن پارلیمنٹ محب اللہ ندوی نے کہا ہے کہ دلتوں، مسلمانوں اور پسماندہ طبقات کے مسائل بالکل ایک جیسے ہیں۔ الیکشن کے دوران مایاوتی کو آواز اٹھانی چاہیے تھی اور سیکولر طاقتوں کے ساتھ آنا چاہیے تھا، لیکن وہ نہیں آئیں۔ انہوں نے ان تمام طبقات کو کمزور کرنے کا کام کیا۔

ریزرویشن کے معاملے پر مایاوتی کے بیان پر انہوں نے کہا کہ ریزرویشن آئین کے تحت دیا جاتا ہے۔ ایسے میں آئین زندہ رہے گا تو ریزرویشن بھی بچے گا۔ انہیں سمجھنا ہوگا کہ الیکشن صرف آئین کے تحفظ کے لیے لڑے گئے تھے، انتخابات کا سب سے بڑا مسئلہ ریزرویشن تھا۔

ایس پی ایم پی نے مزید کہا، دلتوں اور مسلمانوں کے ساتھ ہو رہی ناانصافی کو بچانے کے لیے سب مل کر کوشش کر رہے ہیں۔ راہل گاندھی اور اکھلیش یادو اور سب سے زیادہ یوپی میں اکھلیش یادو نے پی ڈی اے بنا کر محروم طبقات کو اٹھانے کی کوشش کی ہے۔ مایاوتی کو اس میں تعاون کرنا چاہیے، اگر وہ انڈیا الائنس کے ساتھ تعاون کرتی ہیں، تو دلتوں، مسلمانوں اور پسماندہ طبقات کے لیے ریزرویشن بچانا آسان ہو جائے گا۔

اس کے علاوہ محب اللہ ندوی نے حال ہی میں آسام کے وزیر اعلیٰ ہمنتا بسوا سرما کے غیر قانونی دراندازوں کے حوالے سے دیے گئے بیان پر ردعمل ظاہر کیا۔ انہوں نے کہا کہ آسام کے وزیر اعلیٰ کیا کر رہے ہیں، آسام میں حکومت صرف ان کی ہے۔ ان کو دخل اندازی سے روکیں۔ ملک کی سرحدوں کو محفوظ رکھنا بی جے پی حکومت کی سب سے بڑی ذمہ داری ہے۔

انہوں نے کہا کہ کہیں چین گھس رہا ہے تو کہیں کنٹرول لائن پر گڑبڑ ہو جاتا ہے۔ بنگلہ دیش، بھوٹان اور نیپال سے تعلقات خراب ہو رہے ہیں۔ ایسے میں ملک کی سرحدوں کی حفاظت ہم سب کی ذمہ داری ہے۔

اگر جسم پر کہیں بھی کانٹا چبھتا ہے تو دل میں درد ہوتا ہے اگر پڑوسی ملک بنگلہ دیش میں ہندوؤں کو نشانہ بنایا جا رہا ہے تو حکومت کو سخت اقدامات کرنے چاہئیں۔ وہاں ہندوؤں کو تحفظ نہیں دیا جا رہا ہے اور نہ ہی حکومت ایسا کر پا رہی ہے۔ بنگلہ دیش میں ہندوؤں کو وہی حقوق حاصل ہیں جتنے ہندوستان میں مسلمانوں کو۔

بھارت ایکسپریس۔