UP News: مایاوتی نے ایک بار پھر بھتیجے آکاش آنند کو اپنا جانشین کیا مقرر، لوک سبھا انتخابی مہم کے دوران اہم ذمہ داریوں سے ہٹا دیا تھا

لکھنؤ: بہوجن سماج پارٹی (بی ایس پی) کی قومی صدر مایاوتی نے ایک بار پھر اپنے بھتیجے آکاش آنند کو اپنا جانشین مقرر کر دیا ہے۔ آکاش آنند کو پھر سے پارٹی کا نیشنل کوآرڈینیٹر بنایا گیا ہے۔ لکھنؤ میں بی ایس پی کی میٹنگ میں مایاوتی نے خود اس کا اعلان کیا۔ اس سے قبل پارٹی نے اتراکھنڈ میں ہونے والے ضمنی انتخابات کے لیے آکاش آنند کو اسٹار کمپینر بنایا تھا۔ اس فہرست میں بی ایس پی سربراہ مایاوتی کا نام پہلے اور آکاش آنند کا نام دوسرے نمبر پر ہے۔

بی ایس پی سربراہ مایاوتی نے اتوار کے روز پارٹی کے تمام ریاستی سربراہوں کے ساتھ تقریباً 3 گھنٹے تک میٹنگ کی۔ آکاش آنند نے بھی اس میٹنگ میں شرکت کی۔ میٹنگ میں بھتیجے آکاش آنند نے بی ایس پی سربراہ کے پاؤں چھوئے۔ مایاوتی نے بھی اپنے بھتیجے کی پیٹھ پر تھپکی دی اور اس کے سر پر ہاتھ رکھ کر اسے آشیرواد دیا۔

بی ایس پی بہار کے ریاستی انچارج لال جی میدھنکر نے میڈیا سے بات کرتے ہوئے کہا کہ مایاوتی نے آکاش آنند کو دوبارہ ان کے عہدے پر بحال کیا ہے اور انہیں نیشنل کوآرڈینیٹر اور اپنا جانشین بنایا ہے۔ مایاوتی نے میٹنگ میں بتایا کہ ہماری پارٹی یوپی سمیت تمام جگہوں پر ضمنی الیکشن لڑے گی۔

قابل ذکر ہے کہ بی ایس پی کے قومی کوآرڈینیٹر آکاش آنند کو مایاوتی نے لوک سبھا انتخابی مہم کے دوران سیتا پور میں اشتعال انگیز تقریر کرنے کے بعد اہم ذمہ داریوں سے ہٹا دیا تھا۔ اس کی وجہ ان کی ناپختگی بتائی گئی۔

آپ کو بتا دیں کہ آکاش آنند نے سیتا پور میں جلسہ عام کے دوران بی جے پی لیڈروں کا دہشت گردوں سے موازنہ کیا تھا۔ اس کے علاوہ انہوں نے جوتے مارنے کی بھی بات کی تھی۔ اس کے بعد بی ایس پی سپریمو نے آکاش آنند کو نیشنل کوآرڈینیٹر کے عہدے سے ان کے جانشین کی ذمہ داری سے ہٹانے کا اعلان کیا تھا۔

بھارت ایکسپریس۔