Mann ki baat 2026: ’بھارت بنا دنیا کا تیسرا سب سے بڑا اسٹارٹ اپ ایکو سسٹم‘، ’من کی بات‘ کے 130ویں قسط میں وزیر اعظم مودی کا بیان

وزیر اعظم نریندر مودی نے اتوار کو سال 2026 کے پہلے ’من کی بات‘ پروگرام میں ملک کے عوام سے خطاب کیا۔ یہ اس مقبول پروگرام کی 130ویں قسط تھی، جس میں انہوں نے اسٹارٹ اپ انڈیا، صنعتوں میں معیار (کوالٹی) اور عوامی شراکت جیسے اہم موضوعات پر تفصیل سے گفتگو کی۔

اسٹارٹ اپ انڈیا کا سفر

وزیر اعظم مودی نے کہا کہ سوشل میڈیا پر لوگ 2016 کی اپنی یادیں شیئر کر رہے ہیں اور اسی تسلسل میں انہوں نے بھی اسٹارٹ اپ انڈیا کے آغاز کو یاد کیا۔ انہوں نے بتایا کہ دس برس قبل شروع کی گئی یہ پہل اب ایک بڑے عوامی تحریک کی شکل اختیار کر چکی ہے۔ اس سفر کے اصل ہیرو ملک کے نوجوان ہیں، جنہوں نے اپنے کمفرٹ زون سے باہر نکل کر اختراعات کیں اور بھارت کو ایک نئی شناخت دلائی۔

’بھارت دنیا کا تیسرا سب سے بڑا اسٹارٹ اپ ایکو سسٹم‘

وزیرِ اعظم نے کہا کہ آج بھارت دنیا کا تیسرا سب سے بڑا اسٹارٹ اپ ایکو سسٹم بن چکا ہے۔ آرٹیفیشل انٹیلی جنس، خلائی تحقیق، ایٹمی توانائی، سیمی کنڈکٹر، موبیلیٹی، گرین ہائیڈروجن اور بایوٹیکنالوجی جیسے شعبوں میں بھارتی اسٹارٹ اپس سرگرم ہیں۔ انہوں نے کہا کہ جس بھی شعبے کا ذکر کیا جائے، وہاں بھارتی نوجوانوں کی موجودگی نمایاں نظر آتی ہے۔ وزیرِ اعظم نے اسٹارٹ اپس سے وابستہ نوجوانوں اور نئے کاروبار شروع کرنے والوں کو سلام پیش کیا۔

’چلتا ہے‘ کا دور ختم ہو چکا ہے: وزیر اعظم

وزیر اعظم مودی نے صنعتوں اور اسٹارٹ اپس سے اپیل کی کہ وہ اپنے کام میں معیار کو اولین ترجیح دیں۔ انہوں نے کہا کہ بھارت کی معیشت تیزی سے آگے بڑھ رہی ہے اور پوری دنیا کی نظریں بھارت پر ہیں۔ ایسے میں ضروری ہے کہ ہمارے تیار کردہ مصنوعات اعلیٰ معیار کی ہوں۔ انہوں نے واضح طور پر کہا کہ ’چلتا ہے‘ والا دور اب ختم ہو چکا ہے اور ہر سطح پر عمدگی کو معیار بنانا ہوگا۔

’بھارتی مصنوعات کی پہچان معیار سے ہو‘

وزیرِ اعظم نے کہا کہ چاہے ٹیکسٹائل ہو، ٹیکنالوجی، الیکٹرانکس یا پیکیجنگ، ہر بھارتی مصنوعات کی شناخت اس کے معیار سے ہونی چاہیے۔ انہوں نے صنعتوں اور اسٹارٹ اپس سے کہا کہ وہ ایکسی لینس کو اپنا بینچ مارک بنائیں اور ہر پیداوار میں معیار کو سب سے اوپر رکھیں۔

عوامی شراکت کی طاقت

انہوں نے کہا کہ بھارتی فطرتاً اختراعی ہیں اور مسائل کا حل تلاش کرنا ہمارے خون میں شامل ہے۔ کچھ لوگ یہ کام اسٹارٹ اپس کے ذریعے کرتے ہیں، جبکہ کچھ اجتماعی کوششوں سے تبدیلی لاتے ہیں۔ وزیر اعظم نے کہا کہ عوامی شراکت ہی بھارت کی سب سے بڑی طاقت ہے۔

اعظم گڑھ کی مثال

وزیر اعظم نے اتر پردیش کے اعظم گڑھ کی مثال دیتے ہوئے بتایا کہ مقامی لوگوں نے مل کر تمسا ندی کو نئی زندگی دی۔ کبھی یہ ندی علاقے کے لوگوں کی زندگی کا سہارا تھی، مگر آلودگی کے باعث اس کا بہاؤ متاثر ہو گیا تھا۔ عوام نے صفائی مہم چلائی، کناروں پر درخت لگائے اور اجتماعی کوششوں سے ندی کی بحالی ممکن بنائی۔

بھارت ایکسپریس اردو۔