CM Yumnam Meets Amit Shah: منی پور کے وزیر اعلیٰ یومنام کھیم چندر سنگھ کی وزیر داخلہ امت شاہ سے ملاقات، ریاست میں امن کی بحالی اور ترقیاتی کاموں پر تبادلۂ خیال

منی پور میں حالات بہتر بنانے اور ترقیاتی کاموں کو رفتار دینے کی کوششیں تیز ہو گئی ہیں۔ اسی سلسلے میں ریاست کے نومنتخب وزیر اعلیٰ یومنام کھیم چندر سنگھ نے نئی دہلی میں وزیر اعظم نریندر مودی اور امت شاہ سے اہم ملاقات کی۔ اس دوران ریاست میں امن کی بحالی، ترقیاتی منصوبوں اور دیگر اہم امور پر تفصیلی تبادلۂ خیال ہوا۔

ملاقات کے بعد وزیر اعلیٰ سنگھ نے سوشل میڈیا پلیٹ فارم ’ایکس‘ پر خوشی کا اظہار کرتے ہوئے لکھا کہ وزیر اعظم مودی اور وزیر داخلہ کی دور اندیش قیادت سے انہیں ایک پُرامن، خوش حال اور ’ترقی یافتہ منی پور‘ کے خواب کو حقیقت میں بدلنے کی ترغیب ملتی ہے۔

مرکزی وزرا سے بھی ملے وزیر اعلیٰ

دہلی دورے کے دوران وزیر اعلیٰ نے مرکزی وزیر داخلہ امت شاہ کے علاوہ سڑک ٹرانسپورٹ اور شاہراہوں کے وزیر نتن گڈکری اور امورِ نوجوانان و کھیل کے وزیر منسکھ مانڈویا سے بھی ملاقات کی۔ ان ملاقاتوں میں ریاست کی بنیادی ترجیحات، سڑک رابطوں اور حفاظتی انتظامات کو مضبوط بنانے پر زور دیا گیا۔

مرکزی وزرا نے یقین دہانی کرائی ہے کہ وہ جلد ہی منی پور کا دورہ کریں گے۔ اس سے قبل وزیر داخلہ امت شاہ نے وزیر اعلیٰ کو ریاست میں مکمل طور پر امن بحال کرنے، ترقیاتی کاموں میں تیزی لانے اور عوام کی امیدوں کو پورا کرنے کے لیے مرکزی حکومت کی جانب سے ہر ممکن تعاون کا یقین دلایا تھا۔

آمد و رفت آسان بنانے کے لیے اقدامات

وزیر اعلیٰ نے وزیر داخلہ کو ریاستی حکومت کی جانب سے کیے جا رہے اقدامات کی تفصیلات سے آگاہ کیا۔ انہوں نے بتایا کہ حالات کو معمول پر لانے کے لیے مسلسل کوششیں کی جا رہی ہیں۔ اسی سمت میں ایک اہم قدم اٹھاتے ہوئے امپھال-دیماپور-گوہاٹی بس سروس دوبارہ شروع کر دی گئی ہے۔

واضح رہے کہ منی پور، آسام اور ناگالینڈ کو آپس میں جوڑنے والی بین ریاستی مسافر بس خدمات تین سال سے زیادہ عرصے تک بند رہنے کے بعد رواں سال 21 اگست کو بحال کی گئی تھیں۔ ان خدمات کے دوبارہ شروع ہونے سے شمال مشرقی ہندوستان کی تینوں ریاستوں کے عام شہریوں کے لیے سفر کرنا آسان ہو گیا ہے، جس سے لوگوں نے راحت کی سانس لی ہے۔

بھارت ایکسپریس اردو۔