Umar Khalid-Sharjeel Imam: عمر خالد اور شرجیل امام کو بڑا جھٹکا، دہلی ہائی کورٹ نے تیسری ضمانت درخواست بھی کی مسترد

نئی دہلی: دہلی ہائی کورٹ نے عمر خالد اور شرجیل امام کی تیسری ضمانت درخواست مسترد کردی۔ جسٹس پرتبھا ایم سنگھ اور جسٹس دنیش بھٹ کی بنچ نے کہا کہ وہ سپریم کورٹ کے 5 جنوری کے حکم میں عائد شرائط میں تبدیلی نہیں کرسکتی۔ سپریم کورٹ نے دونوں ملزمان کو ہدایت دی تھی کہ وہ محفوظ گواہوں کی گواہی مکمل ہونے کے بعد یا سپریم کورٹ کے حکم کی تاریخ سے ایک سال مکمل ہونے پر، ان دونوں میں سے جو بھی پہلے ہو، اس کے بعد ضمانت کی درخواست دائر کرسکتے ہیں۔

سپریم کورٹ کے حکم کا دیا حوالہ

دہلی ہائی کورٹ نے کہا کہ وہ عدالتی نظم و ضبط کا پابند ہے اور سپریم کورٹ کی جانب سے عمر خالد اور شرجیل امام کے لیے مقرر کردہ شرائط میں تبدیلی نہیں کرسکتا۔ اسی بنیاد پر دونوں کی تیسری ضمانت درخواستیں خارج کردی گئیں۔ دونوں پر فروری 2020 میں شمال مشرقی دہلی میں ہونے والے فسادات کی مبینہ بڑی سازش میں شامل ہونے کے الزامات ہیں۔ دہلی پولیس کا الزام ہے کہ دونوں اس سازش کے اہم کرداروں میں شامل تھے۔ ان فسادات میں 53 افراد ہلاک اور 700 سے زیادہ زخمی ہوئے تھے۔

فروری 2020 میں شمال مشرقی دہلی میں اس وقت تشدد پھوٹ پڑا تھا جب شہریت ترمیمی قانون (CAA) اور قومی شہری رجسٹر (NRC) کے خلاف احتجاج جاری تھا۔ مبینہ بڑی سازش کے اس معاملے کی تحقیقات دہلی پولیس کی اسپیشل سیل نے کی تھی۔ اس کیس میں کارکن خالد سیفی اور عام آدمی پارٹی کے سابق کونسلر طاہر حسین سمیت کئی دیگر افراد کو بھی ملزم بنایا گیا ہے۔ دہلی پولیس نے ضمانت درخواستوں کی مخالفت کرتے ہوئے عمر خالد اور شرجیل امام کو فسادات کی مبینہ سازش کے اہم کرداروں میں شمار کیا ہے۔

2020 میں ہوئی تھی دونوں کی گرفتاری

شرجیل امام کو اس معاملے میں 25 اگست 2020 کو گرفتار کیا گیا تھا، جبکہ عمر خالد کی گرفتاری 13 ستمبر 2020 کو ہوئی تھی۔ ٹرائل کورٹ نے دونوں کی ضمانت درخواستیں تیسری بار 4 جولائی کو مسترد کردی تھیں، جس کے بعد دونوں نے دہلی ہائی کورٹ سے رجوع کیا تھا۔ اب ہائی کورٹ نے سپریم کورٹ کے سابقہ حکم کا حوالہ دیتے ہوئے دونوں کی تیسری ضمانت درخواستیں بھی خارج کردی ہیں۔

بھارت ایکسپریس اردو۔