Ram Mandir donation theft case: رام مندچندہ چوری کیس میں بڑا انکشاف، ایک سال پرانا ڈیلیٹ شدہ ڈیٹا بحال، چیٹس سے دو کروڑ روپے کی مبینہ چوری کا راز بے نقاب

نئی دہلی : رام مندر میں چندہ چوری کے معاملے کی تحقیقات میں ایک اہم اور چونکا دینے والا انکشاف سامنے آیا ہے۔ جن موبائل چیٹس اور ڈیجیٹل ریکارڈز کو ملزمان ہمیشہ کے لیے حذف شدہ سمجھ رہے تھے، وہی اب ان کے خلاف مضبوط ثبوت بنتے دکھائی دے رہے ہیں۔ سائبر فرانزک جانچ کے ذریعے پولیس نے تقریباً ایک سال قبل ڈیلیٹ کیا گیا ڈیٹا دوبارہ حاصل کر لیا ہے، جس سے مبینہ طور پر دو کروڑ روپے سے زائد کی چوری سے متعلق کئی اہم سراغ ملے ہیں۔

ذرائع کے مطابق ایودھیا پولیس نے سائبر سیل کی مدد سے مرکزی ملزمان کے پرانے موبائل فونز کا بیک اپ حاصل کیا۔ فرانزک تجزیے کے دوران حذف شدہ چیٹس، تصاویر اور دیگر ڈیجیٹل ریکارڈ بھی بحال کر لیے گئے۔ پولیس کو پہلے ہی شبہ تھا کہ ملزمان نے ثبوت مٹانے کی نیت سے اپنے پرانے موبائل تبدیل کر دیے تھے، قابل ذکر بات یہ ہےکہ جدید تکنیکی تحقیقات نے ان کی یہ کوشش ناکام بنا دی۔تحقیقات کے دوران برآمد ہونے والی چیٹس نے پولیس کو ایک نئی سمت فراہم کی ہے۔ ذرائع کا کہنا ہے کہ فروری 2026 میں ملزم انکلپ مشرا اور لوکش مشرا کے درمیان مبینہ طور پر چوری کی رقم کی تقسیم کو لے کر شدید اختلافات پیدا ہوئے تھے۔ چیٹس میں یہ الزام بھی سامنے آیا کہ ایک ملزم نے اپنے حصے سے زیادہ رقم اپنے پاس رکھ لی جبکہ باقی رقم دیگر افراد کے ساتھ تقسیم نہیں کی۔ تفتیشی ایجنسیاں ان چیٹس کو مقدمے کی ایک اہم کڑی قرار دے رہی ہیں۔

پولیس اب بحال شدہ چیٹس میں درج رقوم کا ملزمان کے بینک کھاتوں میں ہونے والے لین دین سے موازنہ کر رہی ہے۔ اس کے ساتھ یہ بھی جانچا جا رہا ہے کہ مبینہ طور پر چوری کی گئی رقم سے کن افراد نے کار، موٹر سائیکل، مکان یا دیگر جائیدادیں خریدیں۔ اگر بینک ریکارڈ اور چیٹس میں موجود معلومات آپس میں مطابقت رکھتی ہیں تو یہ شواہد کیس کو مزید مضبوط بنا سکتے ہیں۔تحقیقات میں یہ بھی انکشاف ہوا ہے کہ مرکزی ملزم اویناش شکلا نے مبینہ چوری کی رقم سے ایک کار خریدی، لیکن اسے اپنے نام کے بجائے اپنے بھائی ابھیشیک کے نام پر رجسٹر کرایا۔ معاملہ سامنے آنے کے بعد گاڑی کو پرتاپ گڑھ کے ایک گاؤں منتقل کر دیا گیا تھا۔ پولیس نے ریمانڈ کے دوران ملزم کی نشاندہی پر مذکورہ کار برآمد کر لی ہے۔اب اس کیس کی تحقیقات کا دائرہ ایودھیا سے آگے بڑھ کر پرتاپ گڑھ تک پہنچ چکا ہے۔ پولیس دیگر ملزمان سے بھی پوچھ گچھ کی تیاری کر رہی ہے۔ عدالت سے اجازت ملنے کے بعد تفتیشی افسران جیل میں بند ملزمان سے مزید بازپرس کریں گے تاکہ مبینہ چوری کی پوری سازش، رقم کے استعمال اور اس معاملے میں ممکنہ طور پر ملوث دیگر افراد کے کردار سے بھی پردہ اٹھایا جا سکے۔

بھارت ایکسپریس اردو