UN Military Gender Advocate Award: میجر ابھلاشا براک اقوام متحدہ کے ’فوجی جینڈر ایڈووکیٹ ایوارڈ‘ سے سرفراز، وزیراعظم مودی نے دی مبارکباد

نئی دہلی: وزیراعظم نریندر مودی نے بھارتی فوج کی افسر میجر ابھلاشا براک کو اقوام متحدہ کے باوقار ’’ملٹری جینڈر ایڈووکیٹ آف دی ایئر ایوارڈ‘‘ سے نوازے جانے پر مبارکباد دی ہے اور ان کی شاندار خدمات کو سراہا ہے۔ انہوں نے کہا کہ میجر براک کی یہ کامیابی ملک کے نوجوانوں، بالخصوص لڑکیوں کے لیے ایک بڑی تحریک ہے۔

وزیر اعظم مودی نے کیا کہا؟

سوشل میڈیا پلیٹ فارم ایکس پر اپنے پیغام میں وزیر اعظم مودی نے کہا: ’’میجر ابھلاشا براک کو اقوام متحدہ کے ملٹری جینڈر ایڈووکیٹ آف دی ایئر ایوارڈ پر دل کی گہرائیوں سے مبارکباد۔ وہ لبنان میں اقوام متحدہ کی عبوری فورس (UNIFIL) کے تحت انگیجمنٹ ٹیم کمانڈر اور جینڈر فوکل پوائنٹ کے طور پر خدمات انجام دے رہی ہیں۔‘‘ انہوں نے مزید کہا کہ یہ اعزاز نہ صرف میجر براک کی غیرمعمولی خدمات کا اعتراف ہے بلکہ اقوام متحدہ کے امن مشنز میں بھارت کے طویل اور نمایاں کردار کی بھی عکاسی کرتا ہے۔

Congratulations to Major Abhilasha Barak on being conferred the UN Military Gender Advocate of the Year Award. Major Barak is serving as an Engagement Team Commander and Gender Focal Point within the United Nations Interim Force in Lebanon (UNIFIL). This honour is a recognition… pic.twitter.com/00Yyv963GT

— Narendra Modi (@narendramodi) June 7, 2026

خواتین کی شمولیت کے فروغ پر عالمی اعتراف

میجر ابھلاشا براک کو یہ ایوارڈ امن مشنز میں خواتین کے کردار، نمائندگی اور نقطۂ نظر کو مؤثر انداز میں آگے بڑھانے کے لیے دیا گیا ہے۔  اقوام متحدہ کے سکریٹری جنرل انتونیو گتریس نے ایوارڈ پیش کرتے ہوئے کہا کہ میجر براک ان تمام افراد کے لیے ایک مثالی کردار ہیں جن کے ساتھ وہ کام کرتی ہیں اور جن کی خدمت کرتی ہیں۔ لبنان میں تعینات میجر ابھلاشا براک نے اعزاز حاصل کرنے کے بعد کہا: ’’خوابوں کی کوئی جنس نہیں ہوتی، نہ قیادت کی کوئی جنس ہوتی ہے، نہ ہی جرات اور انسانیت کی خدمت کے جذبے کی۔‘‘ انہوں نے کہا کہ یہ ایوارڈ اس حقیقت کی یاد دہانی ہے کہ پائیدار امن اسی وقت ممکن ہے جب ہر آواز کو سنا جائے اور ہر فرد کو ترقی کا مساوی موقع ملے۔

لبنان میں خواتین اور بچیوں کی زندگیوں میں تبدیلی

اقوام متحدہ کی اسسٹنٹ سکریٹری جنرل لیزا بٹنہیم نے کہا کہ میجر براک کی قیادت اور اختراعی اقدامات نے خواتین، امن اور سلامتی سے متعلق عالمی کوششوں کو نئی سمت دی ہے۔ اقوام متحدہ کے مطابق میجر براک نے مقامی برادریوں کے ساتھ اعتماد سازی کے ذریعے ابتدائی انتباہی نظام قائم کرنے میں اہم کردار ادا کیا، جس سے شہریوں کی حفاظت کو مضبوطی ملی۔ انہوں نے ہزاروں خواتین اور لڑکیوں تک رسائی حاصل کرکے انہیں تعلیم، صحت اور ہنر مندی سے متعلق پروگراموں سے جوڑا، جس کے مثبت اثرات ان کی زندگیوں پر مرتب ہوئے۔

بھارتی فوج کی پہلی خاتون کامبیٹ ہیلی کاپٹر پائلٹ

میجر ابھلاشا براک بھارتی فوج کی پہلی خاتون کامبیٹ ہیلی کاپٹر پائلٹ ہیں۔ اپنے فوجی سفر کو یاد کرتے ہوئے انہوں نے کہا: ’’بھارتی فوج کی پہلی خاتون کامبیٹ ہیلی کاپٹر پائلٹ ہونے کے ناطے میں نے خود دیکھا ہے کہ جب خواتین کو مواقع ملتے ہیں تو وہ ہر رکاوٹ عبور کرکے بڑی کامیابیاں حاصل کر سکتی ہیں۔‘‘ میجر ابھلاشا براک اس اعزاز کو حاصل کرنے والی بھارت کی تیسری خاتون فوجی افسر ہیں۔ اس سے قبل سُمن گوانی اور رادھکا سین بھی یہ اعزاز حاصل کر چکی ہیں۔ میجر براک اس وقت اقوام متحدہ کے امن مشن UNIFIL کے تحت بھارتی بٹالین میں انگیجمنٹ ٹیم کمانڈر اور جینڈر فوکل پوائنٹ کے طور پر تعینات ہیں۔ اسرائیل اور لبنان کی سرحد پر قائم یہ مشن اقوام متحدہ کے سب سے حساس اور خطرناک امن مشنز میں شمار کیا جاتا ہے۔

بھارت ایکسپریس اردو۔