مہاراشٹر میں اکھلیش یادو نے کردی بغاوت،9سیٹوں پر اتار دیئے امیدوار،7 مسلم امیدواروں کو دیا ٹکٹ،ایم وی اے کا کھیل ہوسکتا ہے خراب

مہاراشٹر میں سیٹوں کی تقسیم کے سلسلے میں سماج وادی پارٹی اور مہاوکاس اگھاڑی کے درمیان کوئی تال میل نہیں ہے۔ ایس پی سپریمو اکھلیش یادو، جو اگھاڑی اتحاد سے 5 سیٹیں حاصل کرنے کی امید کر رہے تھے، آخر کار باغیانہ رویہ اپناتے ہوئے 9 سیٹوں پر اپنے امیدوار کھڑے کر دیے ہیں۔سماج وادی پارٹی نے مہاراشٹر اسمبلی انتخابات میں 9 امیدواروں کو نامزد کرکے ایم وی اے  کو بڑا جھٹکا دے دیا ہے۔ ساتھ ہی ایم وی اے کے باغی لیڈران نے بھی کاغذات نامزدگی داخل کرکے درد سر بڑھانے میں کوئی کسر نہیں چھوڑی ہے۔ جن نو سیٹوں پر ایس پی نے امیدوار کھڑے کیے ہیں، ان میں سے زیادہ تر مسلم اکثریتی حلقے شامل ہیں۔

ایس پی سپریمو اکھلیش یادو کے مہاراشٹر انتخابات کے امیدواروں کی فہرست میں بھی ‘ایم’ فیکٹر کو واضح طور پر دیکھا جا سکتا ہے۔ انتخابات کے لیے نامزدگی داخل کرنے والے 9 امیدواروں میں سے 7 امیدوار مسلمان ہیں۔ سماجوادی پارٹی  کی یہ سیاسی چال ان 9 سیٹوں پر ایم وی اے کا کھیل خراب کر سکتی ہے۔درحقیقت، 2011 کی مردم شماری کے مطابق، مہاراشٹر میں 11.54 فیصد (تقریباً 1.5 کروڑ) آبادی کا تعلق مسلم کمیونٹی سے ہے۔ یہ مسلم آبادی مہاراشٹر کی 40 سیٹوں کے نتائج کو متاثر کرنے کی پوزیشن میں ہے۔ ان میں سے اکھلیش یادو نے 7 سیٹوں پر مہاویکاس اگھاڑی کو جھٹکا دیتے ہوئے اپنے امیدوار کا اعلان کردیاہے۔ اس مسلم آبادی میں سے تقریباً 70 فیصد شمالی ہندوستانی نژاد مسلمان ہیں۔ جن کا تعلق یوپی-بہار سے ہے، جو ایس پی کے لیے پلس پوائنٹ ہو سکتا ہے۔

سماجوادی پارٹی  نے مانکھرد شیواجی نگر، ممبئی کے بائیکلہ اور تھانے کی بھیونڈی ایسٹ، بھیونڈی ویسٹ سیٹوں پر امیدوار کھڑے کیے ہیں۔ اس کے ساتھ ہی دھولے، مالیگاؤں اور اورنگ آباد سیٹوں پر ایس پی امیدواروں نے بھی پرچہ نامزدگی داخل کیا ہے۔ یہ تمام سیٹیں مسلم اکثریتی ہیں اور یہاں ووٹوں کے تقسیم ہونے سے ایم وی اے کو بڑا نقصان ہو سکتا ہے۔سماجوادی پارٹی نے مانکھرد شیواجی نگر سے ابو اعظمی، بائیکلہ سے سعید خان، بھیونڈی ایسٹ سے رئیس شیخ، مالیگاؤں سینٹرل سے نہال احمد، دھولے سٹی سے ارشاد جاگیردار، بھیونڈی ویسٹ سے ریاض اعظمی، تلجا پور سے دیوآنند صاحب راؤ روچکاری،پرانڈا سے  ریون وشواناتھ  بھوسلے ، اورنگ آباد مشرقی سے  ڈاکٹر عبدالغفار قادری سید کو امیدوار بنایا ہے۔

اکھلیش یادو کی سماج وادی پارٹی مہاراشٹر اسمبلی انتخابات میں پانچ سیٹوں کا مطالبہ کر رہی تھی۔ تاہم ہریانہ کی طرح مہاراشٹر میں بھی کانگریس نے ایس پی کو کوئی اہمیت نہیں دی۔ اس کی وجہ سے اب اکھلیش یادو کی نئی چال ایم وی اے پر بھاری پڑتی نظر آرہی ہے۔ تاہم، امیدواری واپس لینے کی آخری تاریخ 4 نومبر ہے۔ اس کے بعد ہی مہاراشٹر میں اکھلیش یادو کی پارٹی کی حقیقی صورتحال واضح ہوگی۔

بھارت ایکسپریس۔