Representation of Women in Bihar Cabinet: بہار کابینہ میں خواتین کی کم نمائندگی، 33 فیصد ریزرویشن کا دعویٰ کیا صرف نعروں تک محدود؟

ملک بھر میں ایک طرف ’ناری شکتی وندن ایکٹ‘ اور خواتین کو 33 فیصد ریزرویشن دینے کے دعوے زور و شور سے کیے جا رہے ہیں، تو دوسری طرف بہار کی نئی کابینہ میں خواتین کی نمائندگی انتہائی محدود نظر آ رہی ہے۔ سمراٹ چودھری کی قیادت میں تشکیل دی گئی 35 رکنی کابینہ میں صرف 5 خواتین کو شامل کیا گیا ہے، جو کل وزراء کی تعداد کا محض 14.28 فیصد بنتا ہے۔ ایسے میں خواتین کو مساوی سیاسی حصہ داری دینے کے دعووں پر سوال اٹھنے لگے ہیں۔

کیا کہتے ہیں سیاسی مبصرین؟

سیاسی مبصرین کا ماننا ہے کہ جب ملک میں خواتین کو بااختیار بنانے کی بات کی جا رہی ہے، تب اتنی کم نمائندگی حکومت کے دعووں اور زمینی حقیقت کے درمیان واضح فرق کو ظاہر کرتی ہے۔ خواتین ریزرویشن بل کو حکومت کی تاریخی کامیابی قرار دیا جا رہا ہے، لیکن کابینہ میں خواتین کی موجودگی اس دعوے کی عکاسی کرتی نظر نہیں آتی۔

خواتین کو نمائندگی سے متعلق جے ڈی یو کی  بی جے پی کے مقابلے بہتر کارکردگی

خواتین کو نمائندگی دینے کے معاملے میں جنتا دل یونائیٹڈ (جے ڈی یو) نے بھارتیہ جنتا پارٹی (بی جے پی) کے مقابلے بہتر کارکردگی دکھائی ہے۔ کابینہ میں شامل 5 خواتین وزراء میں سے 3 کا تعلق جے ڈی یو سے ہے۔ ان میں لیسی سنگھ، شیلا منڈل اور شویتا گپتا شامل ہیں۔ دوسری جانب بی جے پی کے حصے میں آنے والے 15 وزارتی عہدوں میں صرف دو خواتین، شریاسی سنگھ اور رما نشاد، کو جگہ دی گئی ہے۔

نمائندگی صرف 14 فیصد تک کیوں محدود؟

سیاسی حلقوں میں یہ سوال بھی اٹھ رہا ہے کہ جب خواتین آبادی کا تقریباً نصف حصہ ہیں تو پھر ان کی نمائندگی صرف 14 فیصد تک کیوں محدود ہے؟ اپوزیشن جماعتوں نے بھی اس معاملے پر حکومت کو نشانہ بنانا شروع کر دیا ہے۔ ناقدین کا کہنا ہے کہ خواتین ریزرویشن کا نعرہ صرف سیاسی فائدہ حاصل کرنے کے لیے استعمال کیا جا رہا ہے، جبکہ عملی طور پر خواتین کو فیصلہ سازی کے اہم عہدوں سے دور رکھا جا رہا ہے۔

بی جے پی حکومت کا موقف

ادھر حکومت کے حامیوں کا کہنا ہے کہ کابینہ کی تشکیل میں سماجی اور علاقائی توازن کو بھی مدنظر رکھا جاتا ہے، اس لیے صرف صنفی بنیاد پر فیصلے ممکن نہیں ہوتے۔ تاہم یہ بحث اب تیز ہو گئی ہے کہ اگر خواتین کو حقیقی معنوں میں سیاسی طور پر بااختیار بنانا ہے تو انہیں نمائشی نہیں بلکہ مؤثر اور خاطر خواہ حصہ داری دینا ہوگی۔

بھارت ایکسپریس اردو۔