Lok Sabha Clears Sports Bills Amid EC Row: الیکشن کمیشن کے خلاف اپوزیشن کے احتجاج کے درمیان لوک سبھا میں اسپورٹس گورننس اور اینٹی ڈوپنگ بل ہوئے منظور

لوک سبھا نے پیر کے روز شدید اپوزیشن احتجاج کے دوران نیشنل اسپورٹس گورننس بل 2025 اور نیشنل اینٹی ڈوپنگ (ترمیمی) بل کو منظوری دے دی۔ مرکزی وزیر کھیل منسکھ مانڈویہ نے اس بل کو ’’آزادی کے بعد کھیلوں کا سب سے بڑا اصلاحی قدم‘‘ قرار دیا۔ بل کی منظوری اس وقت ہوئی جب اپوزیشن کے اراکین بہار میں انتخابی فہرستوں کی خصوصی نظرِثانی کے خلاف احتجاج کرتے ہوئے الیکشن کمیشن کی طرف مارچ کر رہے تھے، جس کے باعث وہ ایوان میں موجود نہیں تھے۔

نیشنل اسپورٹس گورننس بل 2025

وزیر کھیل مانڈویہ نے کہا کہ ’’یہ بل کھیلوں کی تنظیموں میں شفافیت، احتساب اور بہتر نظم و نسق کو یقینی بنائے گا اور بھارتی کھیلوں کے نظام میں انقلابی تبدیلی لائے گا۔‘‘ انھوں نے افسوس کا اظہار کیا کہ اتنے اہم بل کی منظوری میں اپوزیشن شریک نہیں۔ اسپورٹس گورننس بل میں قومی کھیل بورڈ (NSB) کے قیام کی تجویز دی گئی ہے، جو قومی کھیل فیڈریشنز (NSFs) کو مرکزی حکومت کی مالی امداد کی منظوری سے قبل منظوری دے گا۔ اگر کوئی فیڈریشن انتخابات نہ کرائے یا مالی بے ضابطگیوں میں ملوث ہو، تو بورڈ اسے تسلیم شدہ حیثیت سے محروم کر سکتا ہے۔

اس کے علاوہ ایک نیشنل اسپورٹس ٹریبونل بھی قائم کیا جائے گا، جسے سول کورٹ جیسے اختیارات حاصل ہوں گے۔ یہ کھلاڑیوں اور فیڈریشنز کے درمیان تنازعات جیسے انتخاب، سلیکشن اور انتظامی امور کا فیصلہ کرے گا، جسے صرف سپریم کورٹ میں چیلنج کیا جا سکے گا۔ اس بل میں کھیلوں کے منتظمین کی عمر کی حد میں نرمی کی گئی ہے۔ اب 70 سے 75 سال کی عمر کے افراد بھی، اگر بین الاقوامی اداروں کے قواعد اجازت دیں، تو انتخابات میں حصہ لے سکتے ہیں۔ اس بل کی خاص بات یہ ہے کہ سرکاری امداد لینے والے تمام قومی کھیل ادارے اب آر ٹی آئی ایکٹ کے دائرے میں آ جائیں گے۔ تاہم بی سی سی آئی کو اس ضمن میں کچھ چھوٹ دی گئی ہے کیوں کہ وہ سرکاری فنڈز پر منحصر نہیں۔

نیشنل اینٹی ڈوپنگ (ترمیمی) بل

وہیں نیشنل اینٹی ڈوپنگ (ترمیمی) بل 2025 بھی منظور کیا گیا، جس میں عالمی اینٹی ڈوپنگ ایجنسی (WADA) کے اعتراضات کو دور کرتے ہوئے نیشنل اینٹی ڈوپنگ ایجنسی (NADA) کو مکمل خودمختاری دی گئی ہے۔ پرانے بل میں حکومت کی طرف سے قائم کردہ بورڈ کو NADA کی نگرانی اور مشورہ دینے کا اختیار حاصل تھا، جس پر WADA نے اعتراض کیا تھا۔ نئے بل میں بورڈ برقرار رکھا گیا ہے لیکن اب اس کے پاس NADA کو ہدایات دینے یا نگرانی کرنے کا اختیار نہیں ہوگا۔ منسکھ مانڈویہ نے کہا کہ بھارت 2036 کے اولمپکس کی میزبانی کی تیاری کر رہا ہے اور اس بل کا مقصد ایک عالمی معیار کا کھیلوں کا نظام تیار کرنا ہے تاکہ بھارت کی بین الاقوامی کارکردگی میں بہتری لائی جا سکے۔

بھارت ایکسپریس اردو