Lok Sabha adjourned sine die: لوک سبھا غیر معینہ مدت تک کے لیے ملتوی، مانسون اجلاس میں صرف 37 گھنٹے ہوا کام، 12 اہم بلوں کو ملی منظوری

نئی دہلی— لوک سبھا کو جمعرات کو غیر معینہ مدت کے لیے ملتوی کر دیا گیا، جس کے ساتھ ہی پارلیمنٹ کا مانسون اجلاس بھی اختتام کو پہنچا۔ یہ اجلاس 21 جولائی سے شروع ہوا اور تقریباً ایک ماہ تک جاری رہا، تاہم بار بار ہنگامہ آرائی اور اپوزیشن احتجاج کی وجہ سے کارروائی متاثر رہی۔ اسپیکر اوم برلا نے بتایا کہ پورے اجلاس کے دوران لوک سبھا صرف 37 گھنٹے مؤثر طور پر کام کر سکی۔ انہوں نے افسوس کا اظہار کیا کہ اہم مسائل پر بامعنی بحث نہیں ہو پائی۔ انہوں نے کہا کہ اگر تمام جماعتیں تعاون کرتی تو عوامی موضوعات پر مزید وقت دیا جا سکتا تھا۔

اپوزیشن کی ہنگامہ آرائی

اجلاس کے دوران اپوزیشن نے ’آپریشن سندور‘ اور بہار میں جاری ’اسپیشل انٹینسیو ریویژن‘ (SIR) مشق پر بحث کا مطالبہ کیا، مگر حکومت کی جانب سے ان پر غور نہ کرنے کی وجہ سے ارکان نے واک آؤٹ اور شور شرابا کیا۔ نتیجتاً ایوان کی کارروائی کئی بار ملتوی ہوئی اور بیشتر وقت نعرے بازی میں ضائع ہو گیا۔ حکومت کے مطابق اپوزیشن نے تعمیری کردار ادا کرنے کے بجائے رکاوٹیں ڈالیں، جس سے وہ خود بھی اہم بلوں پر بحث کا حصہ نہیں بن سکی۔

12 اہم بل منظور

اس کے باوجود ایوان نے 12 اہم بل منظور کر لیے، جن میں شامل ہیں:

گوا میں اسمبلی حلقوں میں درج فہرست قبائل کی نمائندگی کے ازسرنو تعین کا بل

مرچنٹ شپنگ بل

منی پور جی ایس ٹی ترمیمی بل

منی پور ایپروپریشن بل

نیشنل اسپورٹس گورننس بل

نیشنل اینٹی ڈوپنگ ترمیمی بل

انکم ٹیکس بل

ٹیکسیشن لاز ترمیمی بل

انڈین پورٹس بل

مائنز اینڈ منرلز ترمیمی بل

انڈین انسٹی ٹیوٹس آف مینجمنٹ ترمیمی بل

آن لائن گیمنگ کے فروغ و ضابطہ بندی کا بل

یہ تمام بل شور شرابے کے ماحول میں کثرت رائے سے منظور کیے گئے۔

سرمائی اجلاس کی توقعات

اب لوک سبھا کی نظریں سرمائی اجلاس پر مرکوز ہیں، جہاں زیر التوا موضوعات کے ساتھ نئے معاملات بھی ایوان میں اٹھائے جائیں گے۔ عوام کی نگاہیں اس بات پر جمی ہیں کہ آئندہ اجلاس میں سیاسی جماعتیں بامقصد بحث اور تعمیری کردار ادا کرتی ہیں یا پھر ایک بار پھر شور شرابے کی وجہ سے کارروائی متاثر ہوتی ہے۔

بھارت ایکسپریس اردو۔