New Delhi Railway Station Stampede: ’ذمہ داری قبول کرے حکومت‘، نئی دہلی ریلوے اسٹیشن پر بھگدڑ پر جماعت اسلامی ہند کا رد عمل

New Delhi Railway Station Stampede: نئی دہلی ریلوے اسٹیشن پر ہفتہ کی رات (15 فروری 2025) کو بھگدڑ مچنے کے بعد جس میں 18 افراد ہلاک اور متعدد مسافر زخمی ہوئے، جماعت اسلامی ہند نے اس واقعہ پر گہرے رنج و غم کا اظہار کیا ہے۔ مسلم تنظیم نے فیس بک پر ایک پوسٹ میں کہا، ہمیں اس افسوسناک واقعے سے بہت دکھ ہوا ہے۔ ہماری ہمدردیاں ہلاک ہونے والوں کے اہل خانہ کے ساتھ ہیں اور ہم زخمیوں کی جلد صحت یابی کے لیے دعاگو ہیں۔

حکومت ذمہ داری قبول کرے: پروفیسر سلیم انجینئر

اعلیٰ سطحی، غیر جانبدارانہ تحقیقات کا مطالبہ کرتے ہوئے، جماعت اسلامی ہند کے نائب صدر پروفیسر سلیم انجینئر نے کہا، ’’ہم حکام سے بھگدڑ کے اسباب کی تحقیقات کرنے، جوابدہی طے کرنے اور بھیڑ کے انتظام میں کوتاہی کے ذمہ داروں کے خلاف کارروائی کرنے کی اپیل کرتے ہیں۔‘‘ حکومت ذمہ داری قبول کرے اور مستقبل میں ایسے واقعات کی روک تھام کے لیے فوری اقدامات کرے۔ انہوں نے بڑے عوامی اجتماعات کے دوران حفاظتی اقدامات کو ترجیح دینے کی ضرورت پر زور دیا۔

کانگریس کا مودی حکومت پر حملہ

اس واقعہ کے بعد کانگریس نے مرکزی حکومت پر بدانتظامی اور لاپرواہی کا الزام لگایا۔ کانگریس صدر ملکارجن کھڑگے نے سوشل میڈیا پر لکھا، نئی دہلی ریلوے اسٹیشن پر بھگدڑ سے کئی لوگوں کی موت کی خبر انتہائی تکلیف دہ ہے۔ اسٹیشن سے آنے والی ویڈیوز دل دہلا دینے والی ہیں۔ مودی حکومت کی جانب سے اموات کے بارے میں حقیقت کو چھپانے کی کوشش قابل مذمت ہے۔

یہ بھی پڑھیں- PM Modi met President Draupadi Murmu: راشٹرپتی بھون پہنچے پی ایم مودی، صدر دروپدی مرمو سے کی ملاقات

کیسے ہوا حادثہ؟

معلومات کے مطابق بھگدڑ 15 فروری 2025 بروز ہفتہ دیر رات ہوئی تھی۔ پریاگ راج جانے والی اسپیشل ٹرین کو پکڑنے کے لیے اسٹیشن پر ہزاروں مسافر موجود تھے۔ اچانک ہجوم قابو سے باہر ہو گیا جس سے بھگدڑ مچ گئی۔ بہت سے مسافروں کو ٹرین نہیں مل سکی اور انہیں بغیر سفر کیے واپس لوٹنا پڑا۔ اس واقعے کے بعد اپوزیشن اور سماجی تنظیموں نے حکومت سے جوابدہی اور کراؤڈ مینجمنٹ میں بہتری کا مطالبہ کیا ہے۔ اب دیکھنا یہ ہے کہ حکومت اس پر کیا ایکشن لیتی ہے اور کیا کوئی ٹھوس تحقیقات ہوتی ہے یا نہیں۔

-بھارت ایکسپریس