Jafrabad Bakra Market Bakrid 2026: جعفرآباد بکرا بازار میں عیدالاضحیٰ کی رونق، پانچ لاکھ تک کے بکرے ہو رہے فروخت، سکیورٹی کے سخت انتظامات

نئی دہلی: عیدالاضحیٰ کی آمد کے ساتھ ہی دارالحکومت دہلی کے مختلف بازاروں میں گہما گہمی بڑھ گئی ہے، تاہم شمال مشرقی دہلی کا جعفرآباد بکرا بازار اس وقت سب سے زیادہ توجہ کا مرکز بنا ہوا ہے جہاں ہزاروں خریدار قربانی کے جانور خریدنے کے لیے پہنچ رہے ہیں۔ بازار میں 15 ہزار روپے سے لے کر 5 لاکھ روپے تک کے بکرے فروخت کیے جا رہے ہیں جبکہ مختلف نسلوں کے خوبصورت اور وزنی بکرے شہریوں کی دلچسپی کا باعث بنے ہوئے ہیں۔ بازار میں پنجاب، راجستھان، اتر پردیش اور ہریانہ سمیت کئی ریاستوں سے تاجر اپنے جانور لے کر آئے ہیں۔ بازار میں اس سال بیٹل، توتا پری اور دیگر اعلیٰ نسلوں کے بکرے نمایاں دکھائی دے رہے ہیں۔ عام بکرے 15 سے 20 ہزار روپے میں دستیاب ہیں جبکہ خاص نسلوں کے بکرے دو لاکھ سے پانچ لاکھ روپے تک میں فروخت ہو رہے ہیں۔ خریداروں کا کہنا ہے کہ گزشتہ برس کے مقابلے میں اس مرتبہ قیمتوں میں نمایاں اضافہ ہوا ہے لیکن عیدالاضحیٰ کے مذہبی جذبے کے باعث لوگ اپنی استطاعت کے مطابق خریداری کر رہے ہیں۔ بازار میں نوجوانوں اور بچوں کا جوش بھی دیدنی ہے جو مختلف بکرے دیکھنے اور تصاویر بنانے میں مصروف ہیں۔

جعفرآباد بازار میں ”سلطان“ اور ”شیرا“ نامی دو بکرے خصوصی توجہ حاصل کر رہے ہیں۔ تاجروں کے مطابق دونوں بکرے بیٹل نسل سے تعلق رکھتے ہیں اور پنجاب سے لائے گئے ہیں۔ سلطان کی قیمت ایک لاکھ اسی ہزار روپے جبکہ شیرا کی قیمت ایک لاکھ چالیس ہزار روپے مقرر کی گئی ہے۔ تاجروں کا کہنا ہے کہ ان بکروں کا قد، وزن اور خوبصورتی انہیں دوسرے جانوروں سے منفرد بناتی ہے۔ خریدار بھی ان بکروں کے ساتھ تصاویر بنواتے دکھائی دے رہے ہیں۔

بازار میں ”بھولا“ نامی ایک بکرے نے سب کی توجہ اپنی جانب مبذول کر رکھی ہے جس کی قیمت پانچ لاکھ روپے بتائی جا رہی ہے۔ تاجر کے مطابق یہ توتا پری نسل کا بکرہ ہے اور اس کے کان کے نیچے عربی زبان میں لفظ ”اللہ“ نمایاں دکھائی دیتا ہے، اسی وجہ سے اس کی قیمت بہت زیادہ رکھی گئی ہے۔ دکاندار نے بتایا کہ اس نے بھولا کو بچپن سے پالا ہے اور لوگ اسے دیکھنے کے لیے دور دور سے آرہے ہیں۔

عیدالاضحیٰ کے پیش نظر بازار میں سکیورٹی کے سخت انتظامات کیے گئے ہیں۔ دہلی پولیس، سی آئی ایس ایف اہلکاروں اور رضاکاروں کو مختلف مقامات پر تعینات کیا گیا ہے۔ حساس علاقے ہونے کے باعث بازار کے داخلی اور خارجی راستوں پر بیریکیڈنگ کی گئی ہے جبکہ سی سی ٹی وی اور ڈرون کیمروں سے مسلسل نگرانی کی جا رہی ہے۔ انتظامیہ کا کہنا ہے کہ کھلے مقامات پر قربانی اور ممنوعہ جانوروں سے متعلق حکومتی ہدایات پر سختی سے عمل کرایا جا رہا ہے تاکہ تہوار پرامن ماحول میں مکمل ہو سکے۔ تاجروں نے امید ظاہر کی کہ عید سے قبل آخری دنوں میں خریداروں کی تعداد بڑھے گی اور کاروبار میں اضافہ ہوگا۔

بھارت ایکسپریس اردو۔