ITBP’s 64th Raising Day: پی ایم مودی نے 64ویں یوم تاسیس پر آئی ٹی بی پی کی ہمت اور لگن کی ستائش کی

نئی دہلی: بھارت-تبت سرحدی پولیس (آئی ٹی بی پی) نے اپنا 64واں یومِ تاسیس منایا۔ اس موقع پر وزیرِ اعظم نریندر مودی، مرکزی وزیرِ داخلہ امت شاہ اور جموں و کشمیر کے لیفٹیننٹ گورنر منوج سنہا سمیت کئی معزز شخصیات نے فورس کے اہلکاروں اور ان کے اہلِ خانہ کو مبارکباد دی۔

وزیرِ اعظم نریندر مودی نے سوشل میڈیا پلیٹ فارم ایکس کے ذریعے تمام آئی ٹی بی پی کے’ہِم وِیروں‘اور ان کے خاندانوں کو مبارکباد دی۔ انہوں نے فورس کو ’’بے مثال حوصلے، نظم و ضبط اور فرض شناسی کی علامت‘‘ قرار دیا۔ مودی نے کہا کہ آئی ٹی بی پی کے جوان سب سے کٹھن موسمی حالات اور دشوار گزار علاقوں میں خدمت انجام دیتے ہوئے اٹل عزم کے ساتھ ملک کی حفاظت کرتے ہیں۔ انہوں نے آفات اور بچاؤ کے کاموں کے دوران ان کے جذبۂ ہمدردی اور چُستی کی بھی ستائش کی۔

وزیر داخلہ امت شاہ نے بھی ‘ایکس’ پر آئی ٹی بی پی اہلکاروں کو ان کے یومِ تاسیس پر دل سے مبارکباد دی۔ انہوں نے لکھا کہ مشکل اور دشوار حالات میں ملک کی عظمت و وقار کی حفاظت کرتے ہوئے آئی ٹی بی پی کے جوانوں نے اپنے حوصلے اور وطن کے تئیں لگن کے شاندار نمونے قائم کیے ہیں۔ وزیرِ داخلہ نے ملک کے لیے جان نچھاور کرنے والے شہدوں کو سلام کیا۔

جموں و کشمیر کے لیفٹیننٹ گورنر منوج سنہا نے بھی اپنی نیک تمنائیں دیتے ہوئے جوانوں کے اٹوٹ حوصلے، لگن اور بے لوث خدمت کی تعریف کی۔ انہوں نے ‘فرض کے راستے پر اپنی جان قربان کرنے والے شہدوں کو خراجِ عقیدت’ پیش کیا۔

1962 کی جنگ کے بعد تشکیل

قابلِ ذکر ہے کہ بھارت-تبت سرحدی پولیس (آئی ٹی بی پی) کا قیام 24 اکتوبر 1962 کو بھارت-چین جنگ کے بعد عمل میں آیا۔ اس فورس کا بنیادی مقصد بھارت اور چین کے درمیان اصل کنٹرول لائن (LAC) کی حفاظت کرنا ہے۔ ابتدا میں اس کی تشکیل خفیہ معلومات جمع کرنے، روایتی اور گوریلا جنگ لڑنے، اور چینی سرحد پر بھارتی مواصلاتی نظام کو مضبوط بنانے کے لیے کی گئی تھی۔ آئی ٹی بی پی نے 1965 اور 1971 کی بھارت-پاکستان جنگوں میں بھی فعال کردار ادا کیا تھا۔

بھارت ایکسپریس۔