قومی

Iranian delegation Arrives in India: ایرانی وفد بھارت پہنچ گیا، بھونیشور میں برکس تعلیم اجلاس میں لے گا حصہ

ایران کا ایک اعلیٰ سطحی وفد بھی اس اجلاس میں شرکت کے لیے بھارت پہنچ گیا ہے۔ ایران کی وزارتِ سائنس، تحقیق و ٹیکنالوجی کے قائم مقام وزیر ڈاکٹر مسعود شمس بخش اور ٹیکنالوجی و اختراع کے شعبے کے نائب وزیر ڈاکٹر محمد نبی شاہیکی تاش بدھ کے روز نئی دہلی پہنچے۔ وہ بھونیشور میں منعقد ہونے والے برکس تعلیمی اجلاس میں ایران کی نمائندگی کریں گے۔

ایرانی وفد بھارت کے کئی ممتاز سائنسی اور تکنیکی اداروں کا بھی دورہ کرے گا

اس حوالے سے ایران کے سفارت خانے نے اپنے سرکاری ایکس اکاؤنٹ پر ایک پوسٹ کے ذریعے اطلاع دی۔ سفارت خانے کے مطابق، نئی دہلی میں اپنے قیام کے دوران ایرانی وفد بھارت کے کئی ممتاز سائنسی اور تکنیکی اداروں کا بھی دورہ کرے گا تاکہ دونوں ممالک کے درمیان تعلیمی، سائنسی اور تحقیقی تعاون کو مزید فروغ دیا جا سکے۔

تین روزہ اجلاس کے پہلے دن، 5 اگست کو برکس کے سینئر تعلیمی حکام کا اجلاس منعقد ہو رہا ہے۔ 6 اگست کو وزراء اور اعلیٰ حکام کے درمیان مشترکہ مذاکرات ہوں گے، جبکہ 7 اگست کو برکس وزرائے تعلیم کے 13ویں باضابطہ اجلاس کا انعقاد ہوگا، جس میں بھارت کے مرکزی وزیر تعلیم پرلہاد جوشی بھی شرکت کریں گے۔ اجلاس میں رکن ممالک کے درمیان تعلیم، اختراع، تحقیق، مہارتوں کی ترقی اور باہمی تعاون کے فروغ سے متعلق اہم امور پر تبادلۂ خیال کیا جائے گا۔

برکس صدارت کے دوران نوجوانوں کی شمولیت کو خصوصی ترجیح

بھارت نے اپنی برکس صدارت کے دوران نوجوانوں کی شمولیت کو خصوصی ترجیح دی ہے۔ اسی مقصد کے تحت ’ماڈل برکس‘ کے نام سے طلبہ پر مبنی ایک نئی پہل شروع کی گئی ہے، جس کا مقصد نوجوانوں کو برکس کے عمل سے جوڑنا اور انہیں سفارت کاری، کثیرالجہتی تعاون اور اتفاقِ رائے پیدا کرنے کے طریقۂ کار سے روشناس کرانا ہے۔

یہ پہل برکس کی وزارتی نشستوں کے ساتھ ساتھ ملک کے مختلف حصوں میں بھی منعقد کی جائے گی تاکہ زیادہ سے زیادہ نوجوان اس عالمی پلیٹ فارم سے وابستہ ہو سکیں۔بھونیشور میں ہونے والا یہ اجلاس برکس ممالک کے درمیان تعلیم، تحقیق، اختراع اور مہارتوں کے شعبے میں تعاون کو مزید مضبوط بنانے کی سمت ایک اہم پیش رفت تصور کیا جا رہا ہے۔

بھارت ایکسپریس اردو۔

Abul Kalam

Recent Posts

Supreme Court: ایس آئی آر اور چیف الیکشن کمشنر گیانیش کمار سے متعلق انڈیا بلاک کی عرضی پر سپریم کورٹ میں سماعت ملتوی

چیف جسٹس سوریہ کانت کی سربراہی والی بنچ نے راہل گاندھی اور دیگر درخواست گزاروں…

8 hours ago