Hitendra Singh Success Story: وزیر اعظم مودی کی ترغیب سے حقیقت بن گیا راجستھان کے ہتیندر سنگھ کا خلائی خواب

جے پور: ہر سال 12 جنوری کو ملک بھر میں قومی یومِ نوجوان منایا جاتا ہے، جو عظیم مفکر اور نوجوانوں کے روحانی رہنما سوامی وویکانند کی یومِ پیدائش کی یاد میں منایا جاتا ہے۔ سوامی وویکانند کا ماننا تھا کہ کسی بھی قوم کا مستقبل اس کے نوجوانوں کی طاقت، خود اعتمادی اور کردار سے طے ہوتا ہے۔ وزیر اعظم نریندر مودی کی قیادت میں گزشتہ ایک دہائی کے دوران یہی نظریہ عملی شکل اختیار کرتا دکھائی دے رہا ہے، جس کی جھلک آج ملک کے نوجوان اختراع کاروں اور کامیاب نوجوانوں کی داستانوں میں صاف نظر آتی ہے۔ سوشل میڈیا پلیٹ فارم ’ایکس‘ پر مقبول ہینڈل ’مودی اسٹوری‘ نے حال ہی میں راجستھان کے پالی ضلع کے بھیتواڑہ گاؤں سے تعلق رکھنے والے نوجوان اختراع کار اور خلاء سے محبت کرنے والے ہتیندر سنگھ کی متاثر کن جدوجہد کو اجاگر کیا ہے۔ یہ کہانی اس بات کی مثال ہے کہ کس طرح دیہی پس منظر سے آنے والا ایک نوجوان بھی بڑے خواب دیکھ سکتا ہے اور انہیں حقیقت میں بدل سکتا ہے۔

مودی اسٹوری کے مطابق، ہتیندر سنگھ کا خواب بچپن ہی سے خلا باز بننے کا تھا۔ گاؤں کی محدود سہولتوں کے باوجود ان کا شوق اور تجسس کبھی کم نہیں ہوا۔ وہ اکثر رات کے وقت آسمان پر چمکتے ستاروں کو دیکھ کر مستقبل کے بارے میں سوچا کرتے تھے۔ ویڈیو میں ہتیندر اپنے بچپن کی یادیں تازہ کرتے ہوئے بتاتے ہیں کہ آسمان کو دیکھتے ہوئے ان کے دل میں خلائی سائنسدان بننے کی شدید خواہش پیدا ہوئی۔ ہتیندر کے مطابق، وزیر اعظم نریندر مودی سے ملاقات نے ان کے خوابوں کو نئی سمت اور حوصلہ دیا۔ انہوں نے کہا، ”جب میں آسمان میں ستاروں کو دیکھتا تھا تو خلا میں جانے کا خواب دیکھتا تھا اور وزیر اعظم سے ملنے کے بعد مجھے لگا کہ یہ خواب ممکن ہے“۔

آج ہتیندر سنگھ ‘اسپینٹرک’ نامی ایک اسپیس ٹیکنالوجی اسٹارٹ اپ کے بانی ہیں، جو دوبارہ استعمال ہونے والے راکٹ سسٹمز پر کام کر رہا ہے۔ قومی یومِ نوجوان کے موقع پر بھارت منڈپم میں منعقد ‘وکست بھارت ینگ لیڈرز ڈائیلاگ’ میں انہیں منتخب دس نوجوان اختراع کاروں میں شامل کیا گیا، جہاں تین ہزار سے زائد درخواستوں میں سے ان کا انتخاب ہوا۔ اس پروگرام میں انہوں نے خلائی شعبے کی نمائندگی کی۔ اس موقع پر ہتیندر کو وزیر اعظم کے سامنے اپنی کمپنی کی پیٹنٹ شدہ، مقامی طور پر تیار کردہ ٹیکنالوجی پیش کرنے کا موقع ملا۔ ان کے مطابق، وزیر اعظم نے نوجوانوں کے خیالات میں گہری دلچسپی لی اور بھارت کے خلائی شعبے کے طویل مدتی اہداف اور نجی شعبے کے کردار پر تفصیلی گفتگو کی۔ ہتیندر نے بتایا، ”وزیر اعظم سے بات چیت نہایت حوصلہ افزا رہی۔ ان سے ملنے کے بعد ہم نے صرف پانچ سال نہیں بلکہ اگلے پچاس برسوں کی منصوبہ بندی کے بارے میں سوچنا شروع کیا“۔

انہوں نے اسٹارٹ اپ انڈیا سیڈ فنڈ اسکیم کے لیے حکومت کا شکریہ ادا کیا، جس کے تحت اسپینٹرک کو راکٹ انجن کی تیاری کے لیے بیس لاکھ روپے کی مالی مدد فراہم کی گئی۔ ہتیندر نے ان اسپیس کے افتتاح کے دوران وزیر اعظم کے اس پیغام کو بھی یاد کیا کہ ”عام آدمی اور خلائی سائنس کے درمیان کوئی فاصلہ نہیں ہونا چاہیے“۔ قابلِ ذکر ہے کہ حکومت نوجوانوں میں اختراع، صنعت کاری اور خلا جیسے ابھرتے شعبوں میں شمولیت بڑھانے کے لیے مسلسل نئی پہل کر رہی ہے۔ ہتیندر سنگھ کی کہانی اس بات کا ثبوت ہے کہ آج کا نوجوان ‘وکست بھارت’ کی تعمیر میں ایک مضبوط اور فعال شراکت دار بن کر ابھر رہا ہے۔

بھارت ایکسپریس اردو