India’s Internet Users Surpass 100 Crore: مارچ-جون 2025 کی سہ ماہی میں ہندوستان کے انٹرنیٹ صارفین کی تعداد میں 3.48 فیصد اضافہ، صارفین کی مجموعی تعداد 100 کروڑ سے متجاوز

وزارت مواصلات نے 3 ستمبر کو مارچ تا جون 2025 کی سہ ماہی کے لیے انٹرنیٹ صارفین کے تازہ اعداد و شمار جاری کیے ہیں، جو ٹیلی کام ریگولیٹری اتھارٹی آف انڈیا (TRAI) کی رپورٹ ’’انڈین ٹیلی کام سروسز پرفارمنس انڈیکیٹر رپورٹ‘‘ کا حصہ ہیں۔ رپورٹ کے مطابق جون 2025 کے اختتام تک بھارت میں انٹرنیٹ صارفین کی مجموعی تعداد 100.28 کروڑ ہو گئی، جو مارچ 2025 کے اختتام پر 96.91 کروڑ تھی۔ یعنی محض تین ماہ میں 3.48 فیصد اضافہ ریکارڈ کیا گیا۔ کل صارفین میں سے 4.47 کروڑ کے پاس وائرڈ (تار والا) انٹرنیٹ کنیکشن ہے، جب کہ 95.81 کروڑ صارفین وائرلیس (موبائل یا 5G FWA) انٹرنیٹ استعمال کر رہے ہیں۔

TRAI کے مطابق 100.28 کروڑ انٹرنیٹ صارفین میں سے 2.31 کروڑ نیروبینڈ (کم رفتار) اور 97.97 کروڑ براڈبینڈ (تیز رفتار) صارفین ہیں۔ شہری و دیہی تقسیم کے لحاظ سے شہری علاقوں میں انٹرنیٹ صارفین کی تعداد 57.94 کروڑ ہے، جب کہ دیہی علاقوں میں یہ تعداد 42.33 کروڑ تک پہنچ گئی ہے، جو کہ بھارت میں ڈیجیٹل رسائی کی وسعت کو ظاہر کرتا ہے۔ وائرلیس خدمات سے حاصل ہونے والی اوسط ماہانہ آمدنی (ARPU) ₹186.62 رہی، جب کہ فی صارف اوسط استعمال (MOU) 1006 منٹ یا 16.76 گھنٹے ماہانہ ریکارڈ کیا گیا۔ ہر صارف کا اوسط وائرلیس ڈیٹا استعمال 24.01 جی بی ماہانہ رہا، جب کہ فی جی بی آمدنی ₹8.51 رہی۔

مارچ سے جون 2025 کی سہ ماہی میں 71.20 لاکھ نئے وائرلیس صارفین شامل ہوئے، جس سے کل وائرلیس صارفین (موبائل + 5G FWA) کی تعداد 116 کروڑ سے بڑھ کر 117 کروڑ ہو گئی، یعنی 0.61 فیصد کا اضافہ ہوا۔ اسی سہ ماہی میں صرف موبائل صارفین کی تعداد میں 60 لاکھ کا اضافہ ہوا، جو 115 کروڑ سے بڑھ کر 116 کروڑ ہو گئی، یعنی 0.52 فیصد شرح نمو۔ ٹیلی کام سیکٹر کی یہ ترقی ڈیجیٹل بھارت مشن کی سمت ایک اور مضبوط قدم ہے۔

بھارت ایکسپریس اردو