India’s exports of goods and services crossed US$ 820 billion in 2024-25: ہندوستان کی اشیا اور خدمات کی برآمدات 2024-25 میں 820 بلین امریکی ڈالر سے تجاوز کر گئیں، گزشتہ مالی سال کے مقابلے 6 فیصد اضافہ

وزارت تجارت نے بدھ کے روز کہا کہ ملک کی اشیا اور خدمات کی برآمدات 2024-25 میں 820 بلین امریکی ڈالر سے تجاوز کر گئی ہیں، جو عالمی اقتصادی غیر یقینی صورت حال کے باوجود گزشتہ مالی سال کے مقابلے میں تقریباً 6 فیصد اضافے کی نمائندگی کرتے ہیں۔ 2023-24 میں یہ برآمدات 778 بلین امریکی ڈالر مالیت کی تھیں۔ وزارت تجارت نے برآمد کنندگان کو ایک میٹنگ کے دوران اعداد و شمار کے بارے میں آگاہ کیا تاکہ موجودہ صورت حال سے پیدا ہونے والے مواقع اور مسائل پر غور کیا جا سکے اور اس صنعت کو حکومت کی طرف سے اس سے نمٹنے کے لیے کیے جانے والے اقدامات سے آگاہ کیا جا سکے۔

تجارت اور صنعت کے وزیر پیوش گوئل نے امریکہ کی طرف سے ٹیرف کے نفاذ کی روشنی میں ایکسپورٹ پروموشن کونسلوں اور صنعتی اداروں کے ساتھ بات چیت کی ہے۔ وزارت نے برآمد کنندگان کو یقین دلایا کہ حکومت ایک سازگار ماحول فراہم کرنے کے لیے کام کرے گی تاکہ وہ عالمی تجارتی ماحول میں ہونے والی حالیہ تبدیلیوں کو کامیابی کے ساتھ نیویگیٹ کر سکیں۔

واضح رہے کہ عالمی اقتصادی غیر یقینی صورت حال کی وجہ سے فروری میں مسلسل چوتھے مہینے برآمدات منفی روش کا شکار ہیں۔ اپریل تا فروری 2024-25 کے دوران ہندوستان کی تجارتی اشیاء کی برآمدات 395.63 بلین امریکی ڈالر رہی جو پچھلے سال کی اسی مدت میں 395.38 بلین امریکی ڈالر تھی۔ اپریل-فروری 2024-25 کے دوران خدمات کی برآمدات کی تخمینی مالیت 354.90 بلین امریکی ڈالر ہے جو کہ اپریل-فروری 2023-24 میں USD 311.05 بلین تھی۔

برآمدات اور درآمدات کے لیے 2024-25 کا تفصیلی ڈیٹا وزارت تجارت 15 اپریل کو جاری کرے گی۔ بیان میں کہا گیا ہے کہ ’’مرکزی وزیر نے 2024-25 میں 820 بلین امریکی ڈالر سے زیادہ کی برآمدات حاصل کرنے کے لیے برآمد کنندگان اور صنعت کو سراہا، جو کہ پچھلے مالی سال کے مقابلے میں تقریباً 6 فیصد اضافہ ہے۔‘‘ واضح رہے کہ بحیرہ احمر کے بحران، اسرائیل-حماس تنازعہ خلیجی خطے تک پھیلنے، روس-یوکرین تنازعے کے تسلسل اور کچھ ترقی یافتہ معیشتوں میں سست ترقی سمیت متعدد سر گرمیوں کے باوجود ہندوستان کی برآمدات میں اضافہ ہوا ہے۔ دریں اثنا مختلف شعبوں کی نمائندگی کرنے والی مختلف ایکسپورٹ پروموشن کونسلوں نے عالمی تجارت میں ابھرتے ہوئے چیلنجز کی روشنی میں اپنے خیالات اور نقطہ نظر پیش کیا اور حکومت سے درخواست کی کہ وہ اس مشکل وقت میں برآمدی صنعت کی مدد کے لیے فعال اقدامات کرے۔

بھارت ایکسپریس اردو