Prime Minister Modi: بھارت کی آٹو موبائل صنعت اب صرف ملکی مارکیٹ تک محدود نہیں، وزیراعظم مودی نے بتایا مستقبل کا راستہ

نئی دہلی: وزیراعظم نریندر مودی نے کہا ہے کہ بھارت کا آٹو موبائل سیکٹر تیزی سے تبدیلی کے دور سے گزر رہا ہے اور آنے والے برسوں میں ملک کی معیشت کو مزید مضبوط بنانے میں اس کا کردار انتہائی اہم ہوگا۔ انہوں نے انڈسٹری پر زور دیا کہ وہ نئی ٹیکنالوجی، تحقیق اور جدت کے شعبوں میں مسلسل کام کرے۔ وزیراعظم نے سوسائٹی آف انڈین آٹوموبائل مینوفیکچررز (SIAM) کے 66ویں سالانہ کنونشن سے پیغام کے ذریعے خطاب کرتے ہوئے آٹو موبائل صنعت کے مستقبل کا روڈ میپ پیش کیا۔ انہوں نے کہا کہ گزشتہ ایک دہائی کے دوران بھارت دنیا کی تیزی سے ترقی کرنے والی بڑی معیشتوں میں شامل رہا ہے۔

بہتر کنیکٹوٹی سے آٹو سیکٹر کو فائدہ

وزیراعظم مودی نے کہا کہ معیشت کے پھیلاؤ کے ساتھ ملک میں لوگوں اور سامان کی نقل و حرکت کی ضرورت بھی تیزی سے بڑھ رہی ہے۔ سڑکوں، ہائی ویز اور دیگر بنیادی ڈھانچے کی تیز رفتار ترقی نے ملک میں کنیکٹوٹی کو بہتر بنایا ہے، جس کا براہِ راست فائدہ آٹو موبائل صنعت کو بھی حاصل ہو رہا ہے۔ انہوں نے کہا کہ بہتر کنیکٹوٹی اور مؤثر لاجسٹکس کی وجہ سے نقل و حمل کی لاگت کم ہو رہی ہے، جس سے بھارت میں تیار ہونے والی گاڑیوں اور آٹو کمپوننٹس کی عالمی مسابقتی صلاحیت میں اضافہ ہو رہا ہے۔ وزیراعظم نے کہا کہ بھارت کی آٹو موبائل صنعت اب صرف ملکی مارکیٹ تک محدود نہیں رہی۔ مینوفیکچرنگ صلاحیت میں اضافے اور حالیہ آزاد تجارتی معاہدوں کے باعث عالمی منڈیوں تک بھارتی کمپنیوں کی رسائی بہتر ہوئی ہے۔ انہوں نے کہا کہ اس صورتحال میں بھارتی آٹو موبائل کمپنیاں دنیا بھر میں اپنی موجودگی مزید مضبوط کرنے کے لیے نئے مواقع سے فائدہ اٹھا سکتی ہیں۔

الیکٹرک گاڑیوں اور کلین موبیلٹی پر توجہ

وزیراعظم مودی نے صاف ستھری نقل و حرکت کی جانب بھارت کے بڑھتے قدموں کا بھی ذکر کیا۔ انہوں نے کہا کہ ملک میں چارجنگ انفرااسٹرکچر کے پھیلاؤ سے الیکٹرک گاڑیوں کو اپنانے میں مدد مل رہی ہے۔ اس کے ساتھ آٹو سیکٹر میں نئی جدت اور کاروباری مواقع بھی پیدا ہو رہے ہیں۔ انہوں نے کہا کہ توانائی کی بچت، توانائی کے مختلف ذرائع کا استعمال، جدید ٹیکنالوجی اور ایڈوانس مینوفیکچرنگ موبیلٹی کے شعبے میں بڑی تبدیلی لا رہے ہیں۔ وزیراعظم نے کاروبار کو آسان بنانے کے لیے حکومت کی جانب سے کیے گئے اصلاحات کا بھی ذکر کیا۔ انہوں نے کہا کہ پرانے قوانین اور غیر ضروری ضوابط کو ختم کرنے کے ساتھ ’میک اِن انڈیا‘ اور پروڈکشن لنکڈ انسینٹیو (PLI) جیسی اسکیموں نے ملک میں مینوفیکچرنگ کے شعبے کو مضبوط بنانے میں اہم کردار ادا کیا ہے۔

’وکست بھارت‘ کے ہدف میں اہم کردار ادا کرے آٹو صنعت

وزیراعظم مودی نے SIAM سے اپیل کی کہ وہ بھارت کی موبیلٹی صنعت کو اگلی نسل کی ٹیکنالوجی کے لیے تیار کرنے میں فعال کردار ادا کرے۔ انہوں نے کہا کہ جدت، باہمی تعاون اور اجتماعی کوششوں کے ذریعے آٹو سیکٹر ’وکست بھارت‘ کے ہدف کو حاصل کرنے میں اہم کردار ادا کر سکتا ہے۔ انہوں نے اس اعتماد کا اظہار کیا کہ بھارت کی آٹو موبائل صنعت نئی ٹیکنالوجی کو اپناتے ہوئے نہ صرف ملکی ضروریات پوری کرے گی بلکہ عالمی سطح پر بھی اپنی شناخت اور مسابقتی صلاحیت کو مزید مضبوط بنائے گی۔

بھارت ایکسپریس اردو۔