Operation Sagar Bandhu: آپریشن ساگر بندھو کے تحت سری لنکا میں بھارتی فوج کے فیلڈ اسپتال نے 1250 سے زائد متاثرین کا کیا علاج

کولمبو: سری لنکا میں بھارت کی امدادی کوششیں تیزی سے جاری ہیں۔ بھارتی فوج نے بتایا کہ اس کا فیلڈ اسپتال اب تک 1250 سے زائد متاثرین کا علاج کر چکا ہے، جن میں ہنگامی بنیادوں پر کی جانے والی بڑی سرجریاں بھی شامل ہیں۔ اس کے علاوہ، امدادی کارروائیوں کو تیز کرنے اور تباہ شدہ راستوں کو دوبارہ جوڑنے کیلئے تین بیلی برج (تیار شدہ پل) سری لنکا پہنچا دیے گئے ہیں۔ بھارتی فوج کے شعبۂ تعلقات عامہ کی جانب سے ایکس پر جاری بیان میں کہا گیا: ’’سری لنکا کیلئے بھارتی فوج کی انسانی امدادی کوششوں کی تازہ صورتحال—اب تک فیلڈ اسپتال میں 1250 سے زیادہ افراد کا علاج کیا گیا ہے، جن میں پانچ بڑے ایمرجنسی آپریشن شامل ہیں۔ تین بیلی برج سری لنکا پہنچا دیے گئے ہیں، اور مقامی انتظامیہ کے ساتھ مشاورت کے بعد ان کی تنصیب کیلئے مقامات کی نشاندہی کی گئی ہے تاکہ اہم رابطہ بحالی کا عمل تیز ہوسکے۔‘‘ بیان کے مطابق، لیفٹیننٹ جنرل لاسنتھا روڈریگو، کمانڈر سری لنکا آرمی نے فیلڈ اسپتال کا دورہ کیا اور طبی عملے سے ملاقات کی۔ انہوں نے بھارت کی فوری اور مؤثر امداد پر شکریہ ادا کیا۔

بھارتی فضائیہ کے مزید امدادی طیارے سری لنکا پہنچے

ہفتے کو وزارت خارجہ کے ترجمان رندھیر جیسوال نے ایکس پر لکھا: ’’OperationSagarBandhu# کے تحت امدادی کارروائیاں جاری ہیں۔ آج چوتھا C-17 طیارہ کولمبو پہنچا ہے، جو بیلی برج کے آلات، جے سی بی اور انجینئرنگ کور کے 13 اہلکار لے کر آیا۔‘‘

طبی امداد میں بھی وسعت

بھارت کی کولمبو میں ہائی کمیشن نے جمعے کو بتایا کہ فیلڈ اسپتال کو اس مقصد سے قائم کیا گیا ہے کہ متاثرہ علاقوں میں فوری طور پر جان بچانے والی طبی سہولیات فراہم کی جا سکیں۔

آپریشن ساگر بندھو

یہ تمام اقدامات بھارت کی جانب سے آپریشن ساگر بندھو کے تحت جاری امدادی سرگرمیوں کا حصہ ہیں، جو طوفان دتواہ سے متاثرہ سری لنکا میں ریلیف، ریسکیو، طبی علاج اور ضروری آلات کی ترسیل کو مربوط طریقے سے انجام دے رہا ہے۔

بھارت ایکسپریس اردو۔