BRICS Culture Working Group Meeting: برکس کلچر ورکنگ گروپ کا تیسرا اجلاس 5 اور 6 اگست کو بھوپال میں، تخلیقی معیشت، ثقافتی ورثے کے تحفظ اور پائیدار ترقی سمیت اہم موضوعات پر ہوگا غور

بھارت، برکس (BRICS) 2026 کی صدارت کے تحت، 5 اور 6 اگست کو مدھیہ پردیش کے دارالحکومت بھوپال میں برکس کلچر ورکنگ گروپ (BRICS Culture Working Group) کے تیسرے اجلاس کی میزبانی کرے گا۔ وزارتِ ثقافت کے مطابق اس اجلاس میں برکس رکن ممالک کے نمائندے شرکت کریں گے اور ثقافتی تعاون کو مزید فروغ دینے کے ساتھ ساتھ برکس وزرائے ثقافت کے آئندہ اجلاس سے قبل اہم امور پر اتفاقِ رائے پیدا کرنے کی کوشش کریں گے۔

ثقافتی تعاون کو مزید مضبوط بنانے پر زور

وزارتِ ثقافت نے سوشل میڈیا پلیٹ فارم ’’ایکس‘‘ پر کہا کہ جھیلوں کے شہر بھوپال میں ہونے والا یہ اجلاس پہلے دو اجلاسوں کی پیش رفت کو آگے بڑھائے گا۔ اس موقع پر رکن ممالک کے نمائندے مختلف شعبوں میں باہمی ثقافتی شراکت داری کو مضبوط بنانے کے لیے تبادلۂ خیال کریں گے۔

India, as Chair of BRICS 2026, is set to host the 3rd BRICS Culture Working Group Meeting in Bhopal, the City of Lakes, on 5–6 August 2026.

Building on the momentum of the first two meetings, representatives from BRICS Member States will come together to advance cultural… pic.twitter.com/OZzRcVatjB

— Ministry of Culture (@MinOfCultureGoI) August 4, 2026

تین اہم موضوعات پر خصوصی غور

دو روزہ اجلاس میں تین بنیادی موضوعات پر تفصیلی گفتگو ہوگی۔ ان میں تخلیقی معیشت، ثقافتی و تخلیقی صنعتیں، کاپی رائٹ اور مصنوعی ذہانت (AI)، ثقافتی ورثے کا تحفظ اور ثقافتی املاک کی واپسی، نیز ثقافت، موسمیاتی تبدیلی اور پائیدار ترقی شامل ہیں۔ وزارت کے مطابق یہ اجلاس برکس کی بھارتی صدارت کے تحت ثقافت کے ذریعے شراکت داری کو فروغ دینے اور جامع و پائیدار ترقی کے عزم کی عکاسی کرتا ہے۔ حکومت کا کہنا ہے کہ ثقافتی روابط کو مضبوط بنا کر رکن ممالک کے درمیان باہمی تعاون کو نئی سمت دی جائے گی۔ دوسری جانب بھارت نے حیدرآباد میں شروع ہونے والے برکس انسدادِ بدعنوانی ورکنگ گروپ (ACWG) کے دوسرے اجلاس میں رکن ممالک پر زور دیا ہے کہ وہ مفرور ملزمان کی تلاش، حوالگی (Extradition)، لوٹے گئے اثاثوں کی واپسی اور سرحد پار جرائم و غیر قانونی مالی سرگرمیوں کی روک تھام کے لیے باہمی تعاون کو مزید مؤثر بنائیں۔

ٹیکنالوجی پر مبنی شفاف حکمرانی پر بھی تبادلۂ خیال

4 اور 5 اگست کو جاری اس اجلاس میں برکس ایکسپرٹ نیٹ ورک آن ایسیٹ ریکوری کا دوسرا اجلاس بھی شامل ہے۔ اس دوران غیر رسمی تعاون کے نظام، قانون نافذ کرنے والے اداروں کے نیٹ ورک، فِن ٹیک اور ورچوئل ڈیجیٹل اثاثوں (VDAs) کے غلط استعمال کی روک تھام جیسے موضوعات پر بھی غور کیا جائے گا۔ 5 اگست کو ’’جدید ٹیکنالوجی کے ذریعے اخلاقی حکمرانی‘‘ کے عنوان سے ایک خصوصی سیشن بھی منعقد ہوگا، جس میں ڈیجیٹل گورننس، عوامی خریداری، شفافیت، احتساب اور شہری شمولیت کے تجربات کا تبادلہ کیا جائے گا۔ واضح رہے کہ برکس اس وقت 11 رکن ممالک پر مشتمل تنظیم ہے، جن میں برازیل، روس، بھارت، چین، جنوبی افریقہ، مصر، ایتھوپیا، ایران، متحدہ عرب امارات، سعودی عرب اور انڈونیشیا شامل ہیں۔ بھارت کی برکس 2026 صدارت کا مرکزی موضوع ’’استحکام، اختراع، تعاون اور پائیداری کی تعمیر‘‘ رکھا گیا ہے، جبکہ برکس کو عالمی اور علاقائی سیاسی و اقتصادی امور پر مشاورت اور تعاون کا ایک اہم پلیٹ فارم تصور کیا جاتا ہے۔

بھارت ایکسپریس اردو۔