New Delhi World Book Fair 2026: ”بھارت دنیا کا تیسرا بڑا اشاعتی مرکز“، 53ویں نئی دہلی عالمی کتاب میلے کے افتتاح پر وزیر تعلیم دھرمیندر پردھان کا خطاب

نئی دہلی: بھارت منڈپم میں 53ویں نئی دہلی عالمی کتاب میلہ 2026 کا شاندار افتتاح مرکزی وزیر تعلیم دھرمیندر پردھان نے کیا۔ افتتاحی تقریب کے دوران انہوں نے ٹیمبورین بجا کر پروگرام کا باضابطہ آغاز کیا۔ اس موقع پر خطاب کرتے ہوئے دھرمیندر پردھان نے کہا کہ بھارت آج دنیا کا تیسرا سب سے بڑا اشاعتی اور کتابی تجارت کا مرکز بن چکا ہے، جو ملک کی فکری، تعلیمی اور ثقافتی طاقت کی عکاسی کرتا ہے۔ مرکزی وزیر نے کہا کہ گزشتہ 53 برسوں سے مسلسل منعقد ہونے والا نئی دہلی عالمی کتاب میلہ اب عالمی اشاعتی دنیا کا ایک معتبر اور قابلِ اعتماد پلیٹ فارم بن چکا ہے۔ انہوں نے اس بات پر زور دیا کہ کتابیں کسی بھی قوم کی فکری بنیاد ہوتی ہیں اور مطالعے کی عادت ہی مضبوط قیادت کو جنم دیتی ہے۔

”پڑھو گے، تو قیادت کرو گے“ کو دہرایا
وزیر تعلیم نے وزیر اعظم نریندر مودی کے مشہور قول ”پڑھو گے، تو قیادت کرو گے“ کو دہراتے ہوئے کہا کہ حکومت ہند ملک میں مطالعے کی ثقافت کو فروغ دینے کے لیے مسلسل کام کر رہی ہے۔ ان کے مطابق ریڈنگ کلچر کو مضبوط بنانا حکومت کی ترجیحات میں شامل ہے، کیونکہ علم ہی سماج اور قوم کی ترقی کی بنیاد ہوتا ہے۔

تاریخی کتاب کا حوالہ
اپنے خطاب کے دوران دھرمیندر پردھان نے انیسویں صدی کے آغاز میں اڈیشہ کے سنبل پور میں انگریزوں کے خلاف جدوجہد کا ذکر کیا۔ انہوں نے بتایا کہ اس تحریک میں عظیم مجاہد آزادی ویر سوریندر سائی کے بھائی چابل سائی نے کُڈوپالی میں اپنی جان کا نذرانہ پیش کیا تھا۔ اس قربانی کی داستان اب ایک کتاب کی صورت میں شائع کی گئی ہے، جس کا کئی غیر ملکی زبانوں میں ترجمہ بھی ہو چکا ہے۔ وزیر نے اس اہم اشاعتی کام کے لیے نیشنل بک ٹرسٹ (این بی ٹی) کو مبارکباد دی۔

ڈیجیٹل دور اور علم تک رسائی
ڈیجیٹل دور پر بات کرتے ہوئے مرکزی وزیر نے کہا کہ حکومت کا مقصد علم کو زیادہ سے زیادہ قابلِ رسائی اور ہمہ گیر بنانا ہے، جہاں زبان رکاوٹ نہیں بلکہ ایک پل کا کردار ادا کرے۔ اسی وژن کے تحت قومی ای-لائبریری جیسے اقدامات ڈیجیٹل انڈیا کے خواب کو حقیقت میں بدل رہے ہیں۔ انہوں نے بتایا کہ ان پلیٹ فارمز پر 23 سے زائد زبانوں میں 6 ہزار سے زیادہ مفت ای-بکس دستیاب ہوں گی، جن میں ٹیکسٹ ٹو اسپیچ جیسی جدید سہولیات بھی شامل ہوں گی۔

وندے ماترم کی 150ویں سالگرہ
اپنے خطاب کے اختتام پر دھرمیندر پردھان نے ” وندے ماترم“ کی 150ویں سالگرہ کا بھی ذکر کیا۔ انہوں نے کہا کہ آل انڈیا ریڈیو پر پنڈت اونکارناتھ ٹھاکر کی آواز میں گایا گیا وندے ماترم محض ایک موسیقی پیشکش نہیں تھا بلکہ آزاد بھارت کی ثقافتی روح کا جشن تھا۔ اس تاریخی وراثت کو نئی دہلی عالمی کتاب میلے میں پیش کیا جانا ہمیں ماضی سے جوڑتے ہوئے مستقبل کی سمت رہنمائی فراہم کرتا ہے۔

بھارت ایکسپریس اردو۔