India-Somalia Relations: بھارت اور صومالیہ کے درمیان پہلی خارجہ دفتر سطح کی بات چیت، سمندری قزاقی اور سلامتی کے امور پر تبادلہ خیال

بھارت اور صومالیہ کے درمیان اتوار کو موغادیشو میں پہلی ’خارجہ دفتر مشاورت‘ (ایف او سی) میٹنگ منعقد ہوئی۔ اس دوران دونوں ممالک نے خطے میں جہازوں کے اغوا اور سمندری قزاقی کے بڑھتے ہوئے واقعات پر تبادلہ خیال کیا۔ دونوں فریقوں نے ان خطرات سے مؤثر طریقے سے نمٹنے کی ضرورت پر زور دیا، تاکہ بحری جہازوں اور ان پر کام کرنے والے ملاحوں کی حفاظت یقینی بنائی جا سکے۔ بھارتی وفد کی قیادت وزارت خارجہ میں جوائنٹ سکریٹری (ڈبلیو اے این اے) سریش کمار ایم نے کی، جبکہ صومالیہ کی جانب سے وزارت خارجہ اور بین الاقوامی تعاون کے مستقل سکریٹری حمزہ عدن ہادو نے وفد کی سربراہی کی۔ یہ میٹنگ دونوں ممالک کی وزارت خارجہ کے درمیان مشاورتی نظام قائم کرنے سے متعلق مفاہمت کی یادداشت (ایم او یو) پر 14 نومبر کو موغادیشو میں دستخط کیے جانے کے بعد منعقد ہوئی۔

دوطرفہ تعلقات کے تمام اہم شعبوں کا جائزہ

وزارت خارجہ کے مطابق، میٹنگ میں دونوں ممالک نے باہمی تعلقات کے تمام اہم شعبوں کا جائزہ لیا۔ ان میں تجارت اور سرمایہ کاری، صحت اور ادویات، چھوٹے اور درمیانے درجے کے کاروبار، ترقیاتی شراکت داری، دفاع، سلامتی، قونصلر امور، ثقافت اور عوام کے درمیان رابطے جیسے موضوعات شامل تھے۔

سمندری قزاقی اور جہازوں کے اغوا پر تشویش

میٹنگ کے دوران خطے میں جہازوں کے اغوا اور سمندری قزاقی کے بڑھتے ہوئے واقعات پر تفصیلی گفتگو ہوئی۔ دونوں ممالک نے اتفاق کیا کہ ان چیلنجز سے نمٹنا بحری جہازوں اور سمندری عملے کی حفاظت کے لیے انتہائی ضروری ہے۔ اس موقع پر دونوں فریقوں نے دہشت گردی کی تمام شکلوں کی سخت مذمت کی اور کہا کہ دہشت گردی کسی بھی صورت میں قابل قبول نہیں ہے۔ اس کے خلاف مشترکہ طور پر کام کرنے کی ضرورت پر بھی زور دیا گیا۔

اقوام متحدہ سمیت عالمی فورمز پر تعاون کی تعریف

دونوں ممالک نے علاقائی اور بین الاقوامی امور پر بھی اپنے خیالات کا تبادلہ کیا۔ اس دوران اقوام متحدہ (یو این) اور دیگر کثیر ملکی فورمز پر بھارت اور صومالیہ کے درمیان بہتر تال میل اور تعاون کو سراہا گیا۔وزارت خارجہ کے مطابق، بھارت صومالیہ کے تین سب سے بڑے تجارتی شراکت داروں میں شامل ہے اور اس کا ایک قابل اعتماد ترقیاتی شراکت دار بھی ہے۔ بڑی تعداد میں صومالی شہری علاج اور اعلیٰ تعلیم کے لیے بھارت کو ترجیح دیتے ہیں۔وزارت نے کہا کہ اس ادارہ جاتی نظام کے آغاز سے دونوں ممالک کے تعلقات مزید مضبوط ہوں گے۔ دونوں فریقوں نے اگلی خارجہ دفتر مشاورتی میٹنگ بھارت میں باہمی رضامندی سے طے شدہ تاریخ پر منعقد کرنے پر بھی اتفاق کیا۔

صومالی صدر سے بھارتی عہدیدار کی ملاقات

اس سے ایک روز قبل، ہفتہ کو وزارت خارجہ میں قونصلر، پاسپورٹ، ویزا اور بیرون ملک مقیم ہندوستانیوں کے امور کی سکریٹری شری پریا رنگناتھن نے صومالیہ کے صدر حسن شیخ محمود سے ملاقات کی تھی۔ اس دوران انہوں نے صدر دروپدی مرمو اور وزیر اعظم نریندر مودی کی جانب سے نیک خواہشات کا پیغام پہنچایا۔ وزارت خارجہ کے مطابق، صومالی صدر نے بھارت کے ساتھ اپنے پرانے تعلقات کو یاد کیا اور سال 2015 میں اپنے دورہ بھارت کا بھی ذکر کیا۔

بھارت ایکسپریس اردو۔