Neighbourhood First Policy: خسرہ کے پھیلاؤ پر بھارت کی مالدیپ کو طبی امداد، 20 ہزار ویکسین خوراکیں روانہ، خسرہ کے بڑھتے کیسز سے نمٹنے میں ملے گی مدد

نئی دہلی: بھارت نے اپنی ’’پڑوس مقدم‘‘ پالیسی کے تحت خسرہ (Measles) کے حالیہ پھیلاؤ سے نمٹنے کے لیے مالدیپ کو طبی امداد روانہ کی ہے۔ وزارت خارجہ کے ترجمان رندھیر جیسوال نے سوشل میڈیا پلیٹ فارم ایکس پر بتایا کہ بھارت نے مالدیپ کو 20 ہزار ایم آر (MR) ویکسین کی خوراکیں اور تقریباً تین ٹن طبی سامان بھیجا ہے، جس میں ادویات، سرنجیں، تشخیصی کٹس اور دیگر طبی ضروریات شامل ہیں۔ انہوں نے کہا کہ یہ امداد مالدیپ میں حفاظتی ٹیکہ کاری کے دائرے کو وسیع کرنے، خسرہ کے پھیلاؤ پر قابو پانے اور عوامی صحت کے تحفظ میں معاون ثابت ہوگی۔

Reaffirming its commitment to the ‘Neighbourhood First’ policy and its role as a trusted first responder, India has dispatched the medical assistance to Maldives in response to the recent measles outbreak.

20000 doses of MR Vaccines and approx 3-tons medical consignment includes… pic.twitter.com/qp8fcrsn3W

— Randhir Jaiswal (@MEAIndia) June 12, 2026

خسرہ کے بڑھتے کیسز سے نمٹنے میں مدد

وزارت خارجہ کے مطابق یہ بروقت امداد مالدیپ میں خسرہ کے بڑھتے ہوئے کیسز سے نمٹنے اور وہاں کی حکومت کی جانب سے جاری انسدادی اقدامات کو مزید مؤثر بنانے میں مدد فراہم کرے گی۔ بیان میں کہا گیا کہ مالدیپ بھارت کی ’’پڑوس مقدم‘‘ پالیسی اور ویژن مہاساگر (MAHASAGAR) میں خصوصی اہمیت کا حامل ہے۔ بھارت ایک قابلِ اعتماد اور فوری امداد فراہم کرنے والے شراکت دار کے طور پر مالدیپ کے ساتھ قریبی تعاون جاری رکھنے کے لیے پُرعزم ہے۔ قابلِ ذکر ہے کہ ورلڈ ہیلتھ آرگنائزیشن نے 2021 میں مالدیپ کو خسرہ کے خاتمے (Measles Elimination) کا درجہ دیا تھا، تاہم اب ملک میں اس بیماری کے نئے کیسز سامنے آنے کے بعد تشویش پیدا ہوگئی ہے۔

خسرہ کیا ہے؟

خسرہ ایک انتہائی متعدی وائرل بیماری ہے جو زیادہ تر بچوں کو متاثر کرتی ہے۔ یہ متاثرہ افراد کی ناک، منہ یا گلے سے خارج ہونے والی بوندوں کے ذریعے پھیلتی ہے۔ اس کی ابتدائی علامات عموماً انفیکشن کے 10 سے 12 دن بعد ظاہر ہوتی ہیں، جن میں تیز بخار، ناک بہنا، آنکھوں کا سرخ ہونا، منہ کے اندر سفید دھبے شامل ہیں۔ چند دن بعد جسم پر سرخ دانے نمودار ہوتے ہیں جو پہلے چہرے اور گردن سے شروع ہو کر پورے جسم میں پھیل جاتے ہیں۔ ماہرین کے مطابق خسرہ کے خاتمے سے ہر سال لاکھوں ممکنہ مریضوں اور اموات کو روکا جا سکتا ہے، اسی لیے بروقت ویکسینیشن کو اس بیماری کے خلاف سب سے مؤثر ہتھیار سمجھا جاتا ہے۔

بھارت ایکسپریس اردو۔