India rebukes Pakistan over accusations: پاکستان نے خیبرپختونخواہ میں ہوئے خودکش حملے کیلئے ہندوستان کو بتایا ذمہ دار، وزرات خارجہ نے دیا سخت جواب

پاکستان اپنی حرکتوں سے باز نہیں آرہا ہے۔ ایک بار پھر بھارت پر جھوٹے الزامات لگانے کی کوشش کی گئی ہے۔ تاہم بھارتی وزارت خارجہ نے پاکستان کو منہ توڑ جواب دیا ہے۔ پاکستان نے صوبہ خیبرپختونخوا کے وزیرستان کے علاقے میں ہونے والے خودکش حملے کا ذمہ دار بھارت کو ٹھہرانے کی کوشش کی۔ تاہم نئی دہلی نے ہفتے کی رات پڑوسی ملک کی ان کوششوں کو یکسر مسترد کر دیا۔ وزارت خارجہ نے کہا کہ پاکستان کا بیان توجہ ہٹانے کی کوشش ہے۔

پاکستان کے صوبہ خیبر پختونخواہ میں ہفتے کے روز ایک خودکش حملے میں 13 سکیورٹی اہلکار ہلاک اور 24 زخمی ہو گئے۔ ذرائع کا کہنا ہے کہ صبح  کے وقت شمالی وزیرستان کے علاقے کھڈی میں خودکش حملہ آور نے بارود سے بھری گاڑی اینٹی بم یونٹ کی گاڑی سے ٹکرا دی۔ ذرائع کا کہنا ہے کہ واقعے کے وقت فوجی نقل و حرکت کے باعث علاقے میں کرفیو نافذ تھا۔ دھماکے کے بعد سیکیورٹی اداروں نے امدادی کارروائی شروع کردی۔

انٹیلی جنس ذرائع نے بتایا کہ حافظ گل بہادر گروپ سے وابستہ دہشت گرد گروپ اسود الحرب نے حملے کی ذمہ داری قبول کی ہے۔ اس واقعے کو شمالی وزیرستان میں حالیہ مہینوں میں پیش آنے والے مہلک ترین واقعات میں سے ایک قرار دیا جا رہا ہے اور اس نے خطے میں سکیورٹی کی صورتحال کے بارے میں شدید خدشات کو جنم دیا ہے۔ پاکستان نے اس حملے کا الزام بھارت کو ٹھہرانے کی کوشش کی۔وزارت خارجہ نے پاکستان کے الزامات کو مسترد کر دیا۔ بھارت نے کہا کہ ہم نے پاکستانی فوج کا سرکاری بیان دیکھا ہے، جس میں 28 جون کو وزیرستان میں ہونے والے حملے کا الزام بھارت کو ٹھہرایا گیا ہے۔بھارتی وزارت خارجہ نے کہا کہ ہم اس توہین آمیز بیان کو یکسر مسترد کرتے ہیں۔

بھارت ایکسپریس۔