India to be global manufacturing hub: M&M CEO: چیلنجنگ جغرافیائی سیاسی ماحول کے باوجود بھارت عالمی مینوفیکچرنگ پاور ہاؤس بننے کے لیے تیار: ایم اینڈ ایم گروپ کے سی ای او-ایم ڈی انیش شاہ

مہندرا اینڈ مہندرا گروپ کے سی ای او اور منیجنگ ڈائریکٹر انیش شاہ نے کہا ہے کہ بھارت ایک منفرد مقام پر کھڑا ہے جہاں وہ چیلنجنگ عالمی حالات کے باوجود ایک عالمی مینوفیکچرنگ طاقت کے طور پر اُبھر سکتا ہے۔ گروپ کی سالانہ رپورٹ 2024-25 میں شیئر ہولڈرز سے خطاب کرتے ہوئے شاہ نے کہا کہ بھارت کے بڑھتے ہوئے انفرا اسٹرکچر، نوجوان افرادی قوت اور سازگار پالیسیوں کی بدولت عالمی مینوفیکچرنگ میں قیادت کا موقع کبھی اتنا روشن نہیں رہا۔

انھوں نے کہا کہ ’’موجودہ جغرافیائی و اقتصادی حالات مشکل ضرور ہیں، لیکن اس کے باوجود بھارت کے لیے یہ بہترین موقع ہے کہ وہ دنیا کا مینوفیکچرنگ پاور ہاؤس بنے۔‘‘ ممبئی میں قائم مہندرا گروپ ایک عالمی سطح پر پہچانا جانے والا برانڈ بننے کا خواہشمند ہے اور اس سمت میں نمایاں پیش رفت بھی کی گئی ہے۔ انیش شاہ نے کہا کہ ’’80 سال بعد بھی مہندرا اپنی اقدار پر قائم ہے اور عالمی غیر یقینی صورت حال کے باوجود بہترین کارکردگی کے لیے پرعزم ہے۔ ہماری ترقی بھارت کی ترقی کی کہانی سے جُڑی ہوئی ہے۔‘‘

کاروبار کے مختلف شعبوں پر ڈالی روشنی

کاروبار کے مختلف شعبوں پر روشنی ڈالتے ہوئے انھوں نے بتایا کہ کمپنی کے ’’گروتھ جیمز‘‘ تیزی سے ترقی کر رہے ہیں اور اپنے اپنے شعبوں میں مضبوط موجودگی قائم کر چکے ہیں۔ ان کا ہدف پانچ گنا ترقی حاصل کرنا ہے۔ انھوں نے کہا کہ مہندرا لاجسٹکس اور کلب مہندرا صارفین کو بہتر خدمات فراہم کر رہے ہیں، جب کہ ٹرک اینڈ بسز اور ایرو اسٹرکچرز کے شعبے بھی تیزی سے ترقی کی راہ پر گامزن ہیں۔

انھوں نے مزید بتایا کہ گروپ کے دیگر ابھرتے ہوئے کاروباری یونٹس جیسے ’ایسیلو‘، ’کلاسک لیجنڈز‘ اور ’کار اینڈ بائیک‘ بھی مستقبل میں بڑی قدر پیدا کرنے کے لیے تیار ہیں۔ مالی سال 2024-25 کو انھوں نے مہندرا گروپ کے لیے ایک غیر معمولی سال قرار دیا، جس میں کاروبار کی وسیع سطح پر مضبوط کارکردگی دیکھنے میں آئی۔ شاہ کے مطابق کمپنی کی آمدنی 14 فیصد بڑھ کر ₹1,59,211 کروڑ تک پہنچ گئی، جب کہ بعد از ٹیکس منافع (PAT) 20 فیصد اضافے سے ₹12,929 کروڑ رہا۔

بھارت ایکسپریس اردو