Inauguration of New Evaluation Hall at JMI: جامعہ ملیہ اسلامیہ میں نیو ایویلیویشن ہال کا افتتاح: امتحانات کے نتائج کے جلد اعلان کی سمت ایک اہم قدم

نئی دہلی: جامعہ ملیہ اسلامیہ میں امتحانات کے نتائج کے اعلان میں تیزی لانے کے لیے آج ایک جدید سہولت سے آراستہ نیو ایویلیویشن ہال کا افتتاح کیا گیا۔ اس موقع پر شیخ الجامعہ پروفیسر مظہر آصف اور مسجل جامعہ پروفیسر محمد مہتاب عالم رضوی نے کنٹرولر امتحانات پروفیسر پون کمار شرما اور ڈپٹی کنٹرولر امتحانات پروفیسر احتشام الحق کی موجودگی میں اس ہال کا افتتاح کیا۔ یہ ایئر کنڈیشنڈ ہال جامعہ کے کنٹرولر آف ایگزامینیشن آفس بلڈنگ کی دوسری منزل پر واقع ہے، جہاں جائزہ کنندگان اور آبزرورز کے لیے مخصوص سہولیات فراہم کی گئی ہیں۔ ہال میں جدید الماریاں، کشادہ جگہ اور ایک ہی چھت کے نیچے داخلے اور جائزے سے متعلق تمام سرگرمیوں کو منظم کرنے کا بندوبست کیا گیا ہے۔

جامعہ انٹرنس نتائج کے اعلان میں ملک کی قیادت کر رہی ہے

افتتاحی تقریب کے دوران شیخ الجامعہ پروفیسر مظہر آصف نے اس بات پر مسرت کا اظہار کیا کہ جامعہ نے رواں سال 80 فیصد سے زائد انٹرنس امتحانات کے نتائج کا اعلان کر کے دیگر اداروں پر سبقت حاصل کی ہے۔ انہوں نے امتحانات کے بروقت نتائج کے لیے کنٹرولر، ڈپٹی کنٹرولر اور دفتر کے تمام اسٹاف کی ستائش کی۔

پروفیسر آصف نے کہا، میں چاہتا ہوں کہ جامعہ میں اثبات، سالمیت اور خوشگوار ماحول قائم ہو۔ قومی تعلیمی پالیسی کے مسودہ کمیٹی کے رکن کی حیثیت سے میں نے محسوس کیا ہے کہ وقت پر تنخواہوں اور ترقیات کی ادائیگی اساتذہ اور عملے کی کارکردگی میں نمایاں بہتری لاتی ہے، اور ہماری انتظامیہ اسی اصول پر عمل کر رہی ہے۔

ایک جامعہ، ایک کنبہ کا تصور

رجسٹرار جامعہ پروفیسر محمد مہتاب عالم رضوی نے ایک جامعہ، ایک کنبہ کے تصور پر زور دیتے ہوئے کہا کہ جامعہ کی ترقی تبھی ممکن ہے جب تدریسی و غیر تدریسی عملہ ایک ساتھ مل کر کام کرے۔ انہوں نے کہا، نئے ایویلوایشن ہال سے جائزہ کنندگان کو بہترین سہولیات میسر ہوں گی، جس سے نتائج کی جانچ کا عمل تیز، باضابطہ اور شفاف ہوگا۔ انہوں نے یہ بھی ذکر کیا کہ جامعہ نے بغیر کسی بیرونی امداد کے ملٹی سٹی انٹرنس امتحانات کی کاروائی مکمل کی، جو کہ ایک بے مثال کارنامہ ہے۔

سی او ای دفتر کی کارکردگی

کنٹرولر امتحانات پروفیسر پون شرما نے داخلوں اور امتحانات سے متعلق جاری سرگرمیوں پر روشنی ڈالتے ہوئے جامعہ برادری کا شکریہ ادا کیا، خاص طور پر ان فیکلٹی اراکین کا جنہوں نے جوابی کاپیاں اور نمبرات وقت پر جمع کروائے، جس سے نتائج کے جلد اعلان میں مدد ملی۔

ڈپٹی کنٹرولر امتحانات پروفیسر احتشام الحق نے اپنی استقبالیہ تقریر میں بتایا کہ ایویلوایشن ہال کا قیام شیخ الجامعہ اور رجسٹرار کے وژن کا نتیجہ ہے، جن کی مسلسل رہنمائی سے یہ کام ریکارڈ وقت میں مکمل ہوا۔ انہوں نے کہا کہ داخلہ کاروائی اپنے آخری مرحلے میں ہے اور جامعہ اس سلسلے میں ملک کی دیگر یونیورسٹیوں سے کافی آگے ہے۔ تقریب کے آغاز میں شیخ الجامعہ، مسجل، سی او ای اور ڈپٹی سی او ای نے شجرکاری بھی کی۔ تقریب کی نظامت ڈاکٹر سنیل نے انجام دی جبکہ ڈاکٹر خالد رضا کے اظہار تشکر پر پروگرام اختتام پذیر ہوا۔

بھارت ایکسپریس اردو۔