آئی ایم سی آرکے عہدیداران نے رکن پارلیمنٹ کنی موجھی سے کی ملاقات، مسلم مسائلِ پرتبادلہ خیال، ڈی ایم کے لیڈر نے دیا ہرممکن تعاون کا بھروسہ

نئی دہلی: انڈین ملمس فار سول رائٹس (آئی ایم سی آر) کے ایک اعلیٰ سطحی وفد نے آج نئی دہلی میں دراوڑمنیترا کژگم (ڈی ایم کے) کی سینئررکنِ پارلیمنٹ کنی موجھی سے ملاقات کی۔ یہ ملاقات خوشگواراورسنجیدہ ماحول میں ہوئی، جس میں ملک کے موجودہ سماجی وسیاسی حالات، اقلیتی حقوق بالخصوص مسلم کمیونٹی کودرپیش مسائل اورتمل ناڈوحکومت کی جانب سے ان مسائل کے تدارک میں اختیارکی گئی مثبت پالیسیوں پرتفصیلی گفتگوہوئی۔

وفد نے تمل ناڈوحکومت کی جانب سے مسلم مسائل کے حل میں سنجیدہ دلچسپی اورعملی اقدامات پروزیراعلیٰ ایم کے اسٹالن کی سنجیدہ کوششوں اوران کی قیادت کا شکریہ ادا کیا۔ خصوصاً وزیراعلیٰ کی قیادت میں اختیارکئے گئے وقف سے متعلق اقدامات کوسراہا، جن کے باعث ریاست میں اقلیتوں کوایک محفوظ اورباوقارماحول میسرآیا ہے۔ کنی موجھی نے وفد کی بات نہایت توجہ اورسنجیدگی سے سنی اوراس عزم کا اظہارکیا کہ ڈی ایم کے ہمیشہ آئینی اقدار، سیکولرازم اوراقلیتی حقوق کے تحفظ کے لیے پرعزم رہی ہے۔

محمد ادیب نے وقف املاک اور موجودہ حالات پرکیا تبادلہ خیال

انہوں نے مسلم کمیونٹی کے ساتھ ہرممکن تعاون اوران کے جائزمسائل کوپارلیمنٹ اورمتعلقہ فورمزپرمؤثراندازمیں اٹھانے کی یقین دہانی بھی کرائی۔ وہیں انڈین ملمس فارسول رائٹس (آئی ایم سی آر) کے صدرمحمد ادیب نے اس موقع پرملک کے موجودہ حالات اور خاص طورپروقف املاک سے متعلق درپیش چیلنجزکا تفصیلی ذکرکیا۔ انہوں نے وقف کے تحفظ اوراقلیتی حقوق کے سلسلے میں تمل ناڈو حکومت کے مثبت اورواضح مؤقف پرشکریہ ادا کرتے ہوئے امید ظاہر کی کہ دیگرریاستیں بھی اسی طرزپرآئینی ذمہ داریوں کو نبھائیں گی۔

سیاسی پارٹیوں سے مکالمہ کی ضرورت پر دیا گیا زور

ملاقات کے دوران آئی ایم سی آرکے ٹرسٹی اورخزانچی ایڈوکیٹ فضیل احمد ایوبی اورسینئرصحافی انظرالباری بھی موجود تھے۔ وفد نے اس بات پرزور دیا کہ موجودہ حالات میں جمہوری اداروں، سول سوسائٹی اورسیاسی جماعتوں کے درمیان مکالمہ وقت کی اہم ضرورت ہے تاکہ ملک میں ہم آہنگی، انصاف اور سماجی توازن کو مضبوط کیا جا سکے۔ ملاقات کے اختتام پردونوں جانب سے اس عزم کا اعادہ کیا گیا کہ آئندہ بھی باہمی رابطہ اورتعاون جاری رکھا جائے گا اورمسلم کمیونٹی سمیت تمام اقلیتوں کے آئینی حقوق کے تحفظ کے لیے مشترکہ کوششیں کی جائیں گی۔