Relief operations in Nepal: نیپال میں راحت رسانی کے لیے بھارتی فضائیہ کا ٹرانسپورٹ بیڑا الرٹ، وزیراعظم مودی کی نیپال کو ہرممکن مدد کی یقین دہانی

نئی دہلی: نیپال میں اچانک آنے والے سیلاب کے پیش نظر بھارتی فضائیہ نے راحت رسانی کی کارروائیوں کے لیے اپنے ٹرانسپورٹ طیاروں کے بیڑے کو اسٹینڈ بائی پر رکھا ہے۔ ذرائع کے مطابق اس بیڑے میں C-17، C-130J اور C-295 طیارے شامل ہیں۔ ذرائع نے بتایا کہ ایک C-130J ٹرانسپورٹ طیارہ آج امدادی سامان لے کر نیپال کے لیے روانہ ہونے کی توقع ہے۔ نیپال کے رسوا علاقے میں بھوٹے کوشی دریا میں اچانک سیلاب آنے کے بعد تقریباً 105 ہندوستانی ان غیر ملکی شہریوں میں شامل ہیں جن کے لاپتہ ہونے کی اطلاع ملی ہے۔ نیپال ٹورزم بورڈ نے بدھ کو بتایا کہ یہ معلومات سیاحت اور سفری کمپنیوں سے موصول ہونے والے ابتدائی ریکارڈ پر مبنی ہیں۔

وزیر اعظم مودی نے نیپالی ہم منصب سے کی بات

وزیراعظم نریندر مودی نے بدھ کو نیپال کے وزیر اعظم بالیندر شاہ سے بات کی اور ہمالیائی ملک میں سیلاب کے باعث ہونے والے جانی نقصان پر تعزیت کا اظہار کیا۔ انہوں نے کہا کہ ہندوستان ہر ممکن انسانی امداد فراہم کرنے کے لیے تیار ہے۔ وزیر اعظم نے کہا کہ اس مشکل وقت میں ہندوستان نیپال میں اپنے ’’بہن بھائیوں‘‘ کے ساتھ مضبوطی سے کھڑا ہے۔ انہوں نے بتایا کہ دونوں ممالک کی ٹیمیں بچاؤ اور راحت رسانی کی کوششوں میں قریبی تال میل کے ساتھ کام کر رہی ہیں۔ مودی نے ایکس پر اپنی پوسٹ میں کہا، ’’وزیر اعظم بالیندر شاہ سے بات کی اور نیپال میں سیلاب کے باعث ہونے والے جانی نقصان پر تعزیت کا اظہار کیا۔ اس مشکل وقت میں ہندوستان کے عوام نیپال میں اپنے بہن بھائیوں کے ساتھ یکجہتی کے ساتھ کھڑے ہیں۔ ہندوستان نیپال کو ہر ممکن انسانی امداد فراہم کرنے کے لیے تیار ہے۔ ہماری ٹیمیں بچاؤ اور راحت رسانی کی کوششوں کے لیے قریبی تال میل کے ساتھ کام کر رہی ہیں۔‘‘

ہندوستانی شہریوں کے بچاؤ کے لیے سفارت خانہ سرگرم

نیپال میں ہندوستانی سفارت خانے نے بتایا کہ وہ شدید اچانک سیلاب سے متاثرہ ہندوستانی شہریوں کے فوری بچاؤ اور راحت رسانی کے لیے نیپال کے متعلقہ حکام کے ساتھ مسلسل رابطے میں ہے۔ سفارت خانے کے مطابق نیپال حکومت کے ساتھ تال میل کے ذریعے بچاؤ اور راحت رسانی کی کوششوں کو مزید مضبوط کیا جا رہا ہے۔ متاثرہ ہندوستانی شہریوں کے لیے سفارت خانے نے ہنگامی رابطہ نمبر بھی جاری کیے ہیں۔ مدد یا معلومات کے لیے +977 985 131 6807 اور +977 970 910 7500 پر رابطہ کیا جا سکتا ہے۔

384 مسافروں کے لاپتہ ہونے کی اطلاع

نیپال ٹورزم بورڈ کے مطابق متاثرہ علاقوں سے مجموعی طور پر 384 مسافروں کے لاپتہ ہونے کی اطلاع ہے۔ ان میں 291 غیر ملکی شہری اور 93 نیپالی شہری شامل ہیں۔ نیپال ٹورزم بورڈ کی ’’لاپتہ افراد‘‘ کی فہرست میں ہمالیئن گلیشیئر علاقے سے 37 غیر مقیم ہندوستانیوں کے لاپتہ ہونے کا بھی ذکر ہے۔ ٹورزم بورڈ نے بتایا کہ بدھ کو صبح تقریباً 8:30 بجے رسوا میں بھوٹے کوشی دریا میں اچانک سیلاب آیا۔ نیپال ٹورزم بورڈ، ٹورسٹ پولیس اور سیاحت سے وابستہ ادارے متاثرہ علاقوں میں موجود یا وہاں سے گزرنے والے سیاحوں اور مسافروں کے ٹھکانے اور سلامتی کی تصدیق کے لیے کام کر رہے ہیں۔

ہندوستانی حکومت کی صورت حال پر قریبی نظر

ذرائع کے مطابق ہندوستانی حکومت صورت حال پر قریبی نظر رکھے ہوئے ہے اور نیپال میں اچانک سیلاب سے متاثرہ ہندوستانی شہریوں تک امداد پہنچانے کے لیے ضروری اقدامات کر رہی ہے۔ ’کٹھمنڈو پوسٹ‘ کی سابقہ رپورٹ کے مطابق شدید سیلاب کے نتیجے میں کم از کم سات افراد کی موت کی تصدیق ہو چکی ہے۔ رپورٹ میں بتایا گیا کہ بچاؤ کارروائیاں جاری ہیں اور بدھ کی سہ پہر تک کم از کم 25 افراد کو بچایا جا چکا تھا۔ اس سے قبل نیپال کے وزیر اعظم بالیندر شاہ نے سیلاب کی صورت حال اور حکومت کی جانب سے کیے جا رہے اقدامات پر تبادلہ خیال کے لیے ایک اجلاس بھی طلب کیا۔

بھارت ایکسپریس اردو۔