Birth Anniversary of Maharishi Valmiki: مہارشی والمیکی کے یومِ پیدائش پر، وزیر اعظم مودی نے کہا، “انسانیت کے لیے ان کے انمول پیغامات ہمیشہ ملک کے عوام کی رہنمائی کرتے رہیں گے

نئی دہلی:  وزیر اعظم نریندر مودی نے مہارشی والمیکی کے یومِ پیدائش کے موقع پر ملک کے عوام کو مبارک باد پیش کی۔ انہوں نے کہا کہ مہارشی والمیکی کے نیک خیالات بھارتی ثقافت اور وراثت کے بنیادی عناصر رہے ہیں، جو ہر دور میں ملک کی ترقی اور خوش حالی کا ذریعہ بنتے رہیں گے۔وزیر اعظم مودی نے پیر کی صبح سوشل میڈیا پلیٹ فارم ’ایکس‘ پر ایک پیغام میں کہا، ’’آپ سب کو مہارشی والمیکی جینتی کی بے شمار مبارک باد۔ ان کے نیک خیالات بھارتی ثقافت اور وراثت کے بنیادی عناصر رہے ہیں، جو ہر دور میں ملک کو پھلنے پھولنے کا موقع فراہم کرتے رہیں گے۔ انسانیت کے لیے ان کے انمول پیغامات ہمیشہ ملک کے عوام کی رہنمائی کرتے رہیں گے۔‘‘وزیر اعظم نے ایک اور پوسٹ میں سنسکرت کا ایک مشہور اشلوک بھی شیئر کیا، جو مہاکوی کالی داس کی تصنیف ’رگھوونشَم‘ کے چودھویں سرگ کے اشلوک نمبر 70 سے لیا گیا ہے۔ اس اشلوک میں مہارشی والمیکی کے دل میں پیدا ہونے والی ہمدردی اور اسی جذبے سے شاعری کے جنم لینے کا ذکر کیا گیا ہے۔اس اشلوک کے مفہوم کے مطابق، جب مہارشی والمیکی کش اور یگیہ میں استعمال ہونے والی لکڑیاں جمع کرنے گئے تھے، تو انہوں نے ایک مادہ کرونچ پرندے کی درد بھری فریاد سنی۔ اس منظر سے ان کے پاکیزہ دل میں جو ہمدردی پیدا ہوئی، وہ اشلوک کی صورت میں ظاہر ہوئی۔ یہی اشلوک آگے چل کر مہارشی والمیکی کی ہمدردی، مساوات، ریاضت اور علم و دانش کی بنیاد پر رامائن کی تخلیق کا سبب بنا۔

رامائن آج بھی زندگی کا سبق دیتی ہے: مودی

اس سے قبل اتوار کو اپنے ماہانہ ریڈیو پروگرام ’من کی بات‘ میں بھی وزیر اعظم مودی نے مہارشی والمیکی کو یاد کیا تھا۔ انہوں نے کہا کہ ہزاروں سال گزر جانے کے باوجود مہارشی والمیکی کی رامائن آج بھی ہمیں نئی باتیں سکھاتی ہے۔وزیر اعظم نے کہا کہ مہارشی والمیکی نے رامائن کے ذریعے زندگی کے گہرے اسباق دیے ہیں۔ ایک طرف وہ مسلسل کوشش کرتے رہنے کا پیغام دیتے ہیں، تو دوسری طرف خدمت، ہمدردی اور سماجی ہم آہنگی کی اہمیت بھی سمجھاتے ہیں۔انہوں نے کہا کہ والمیکی رامائن میں بھگوان رام کا کردار ان اقدار کی بہترین مثال پیش کرتا ہے۔ بھگوان رام نے ماتا شبری کی محبت اور عقیدت کو قبول کیا اور نشاد راج کی دوستی کو عزت دی۔ سب کو ساتھ لے کر چلنے کا یہ جذبہ آج بھی ہماری رہنمائی کرتا ہے۔

ایودھیا کے رام مندر میں بھی نظر آتی ہے سماجی ہم آہنگی کی جھلک

وزیر اعظم مودی نے کہا کہ اس جذبے کی عکاسی ایودھیا کے عظیم الشان رام مندر میں بھی دکھائی دیتی ہے، جہاں مہارشی والمیکی، نشاد راج اور ماتا شبری کے مندر بھی تعمیر کیے گئے ہیں۔انہوں نے اطمینان کا اظہار کرتے ہوئے کہا کہ ایودھیا کے ہوائی اڈے کا نام بھی مہارشی والمیکی کے نام پر رکھا گیا ہے۔وزیر اعظم ، یہ کوششیں بھارت کی اس عظیم روایت کو مزید مستحکم کرتی ہیں، جس میں خدمت، سماجی ہم آہنگی اور ہمدردی کو سب سے زیادہ اہمیت دی گئی ہے۔

بھارت ایکسپریس اردو