High-level meeting chaired by Prime Minister Narendra Modi: وزیرِ اعظم نریندر مودی نے کی ہائی لیول میٹنگ، مختلف وزارتوں اور محکموں کے سکریٹریوں کے ساتھ قومی سلامتی کی صورت حال کا لیا گیا جائزہ

نئی دہلی: وزیرِ اعظم نریندر مودی نے آج بھارت کی مختلف وزارتوں اور محکموں کے سکریٹریوں  کے ساتھ ایک اعلیٰ سطحی اجلاس کی صدارت کی، جس میں حالیہ قومی سلامتی کی صورتِ حال کے تناظر میں تیاریوں اور بین الوزارتی ہم آہنگی کا جائزہ لیا گیا۔

وزیرِ اعظم نے اجلاس کے دوران زور دیا کہ وزارتوں اور ایجنسیوں کے درمیان بے رکاوٹ رابطہ ضروری ہے تاکہ آپریشنل تسلسل اور ادارہ جاتی لچک کو برقرار رکھا جا سکے۔ انہوں نے موجودہ صورتِ حال سے نمٹنے کے لیے وزارتوں کی منصوبہ بندی اور تیاریوں پر تفصیلی جائزہ بھی لیا۔

سیکریٹریز کو ہدایت دی گئی کہ وہ اپنی اپنی وزارت کے کام کا جامع جائزہ لیں اور یہ یقینی بنائیں کہ تمام ضروری نظام پوری طرح محفوظ اور فعال انداز میں کام کر رہے ہوں۔ اس میں خاص طور پر تیاری، ہنگامی ردِعمل، اور اندرونی رابطے کے پروٹوکولز کو ترجیح دی جائے۔

تمام وزارتوں نے “Whole of Government” اپروچ کے تحت موجودہ صورتحال میں اپنے عملی اقدامات کی نشاندہی کی ہے اور اپنی تیاریوں کو مزید مستحکم کیا ہے۔ اجلاس میں شہری دفاع کے نظام کو مضبوط بنانے، جھوٹی خبروں اور گمراہ کن معلومات سے نمٹنے، اور اہم تنصیبات کی حفاظت جیسے امور پر تفصیل سے تبادلہ خیال کیا گیا۔

وزیرِ اعظم نے ریاستی حکام اور مقامی اداروں کے ساتھ قریبی رابطے کی بھی تاکید کی تاکہ زمینی سطح پر مؤثر اقدامات کیے جا سکیں۔

اجلاس میں کابینہ سیکریٹری، وزیرِ اعظم کے دفتر کے سینئر حکام اور وزارتِ دفاع، داخلہ، خارجہ، اطلاعات و نشریات، توانائی، صحت اور ٹیلی کمیونیکیشنز سمیت کلیدی وزارتوں کے سیکریٹریز نے شرکت کی۔

وزیرِ اعظم نے اجلاس کے اختتام پر مسلسل چوکسی، ادارہ جاتی ہم آہنگی اور واضح مواصلات کو وقت کی اہم ضرورت قرار دیا اور قومی سلامتی، آپریشنل تیاری اور عوامی تحفظ کے لیے حکومت کے پختہ عزم کا اعادہ کیا۔

بھارت ایکسپریس اردو۔