Health Ministry: اگر آپ کو کھانسی، گلے میں خراش یا سر درد ہے…، سوائن فلو کے بڑھتے ہوئے معاملات کے درمیان وزارت صحت نے جاری کی  خصوصی اپیل

نئی دہلی : موسم میں مسلسل تبدیلی اور درجہ حرارت میں اتار چڑھاؤ کے دوران اکثر لوگوں کو نزلہ، زکام، بخار، جسم میں درد، گلے میں خراش، کھانسی اور سر درد جیسی شکایات ہونے لگتی ہیں۔ عام طور پر لوگ ان علامات کو بدلتے موسم یا معمولی وائرل انفیکشن کا اثر سمجھ کر نظر انداز کردیتے ہیں، لیکن اگر یہ علامات کئی دنوں تک برقرار رہیں یا ان کی شدت میں اضافہ ہونے لگے تو محتاط رہنا ضروری ہے۔ صحت کی وزارت نے لوگوں کو خبردار کیا ہے کہ ایسی علامات سوائن فلو یا ایچ ون این ون انفیکشن کی بھی ہوسکتی ہیں۔وزارت صحت نے ہفتہ کو سوشل میڈیا پلیٹ فارم ’ایکس‘ پر ایک پوسٹ شیئر کرکے عوام کو سوائن فلو کی علامات کے حوالے سے آگاہ کیا۔ وزارت کے مطابق ایچ ون این ون فلو کی عام علامات میں بخار، کھانسی، گلے میں خراش، سر درد، ناک بہنا، جسم میں درد اور تھکن شامل ہوسکتی ہے۔ وزارت نے لوگوں سے اپیل کی کہ ان علامات کو بروقت پہچانیں اور اگر یہ مسلسل برقرار رہیں تو انہیں معمولی سمجھ کر نظر انداز نہ کریں۔صحت کی وزارت نے مشورہ دیا کہ اگر کسی شخص میں مذکورہ علامات ظاہر ہوں تو قریبی ہیلتھ کیئر سینٹر سے رابطہ کرکے ڈاکٹر سے طبی مشورہ لیا جائے۔ خاص طور پر ایسے افراد جن میں علامات مسلسل بڑھ رہی ہوں، انہیں خود سے علاج کرنے کے بجائے طبی ماہر سے رجوع کرنا چاہیے۔

گھبرانے کے بجائے احتیاط ضروری

وزارت کے مطابق اگر کوئی شخص سوائن فلو یا ایچ ون این ون انفیکشن کا شکار ہوجائے تو گھبرانے کے بجائے مناسب احتیاطی اقدامات کرنا ضروری ہے۔ مریض کو ڈاکٹر کی نگرانی میں رہنا چاہیے اور صحت یابی کے دوران مناسب آرام کے ساتھ غذائیت سے بھرپور غذا کا استعمال کرنا چاہیے۔ ڈاکٹر کی جانب سے دی گئی ہدایات پر عمل کرنا بھی انتہائی اہم ہے۔اگر کسی شخص میں فلو جیسی علامات موجود ہوں تو اسے دوسروں سے غیر ضروری رابطے سے گریز کرنا چاہیے، تاکہ انفیکشن کے پھیلاؤ کے خطرے کو کم کیا جاسکے۔ گھر سے باہر نکلنے یا دوسرے لوگوں کے قریب رہنے کی صورت میں ماسک کا استعمال بھی احتیاطی اقدام کے طور پر کیا جاسکتا ہے۔گھر میں بزرگ افراد، چھوٹے بچے یا پہلے سے کسی بیماری میں مبتلا افراد موجود ہوں تو ان کے قریب جاتے وقت خاص احتیاط برتنے کی ضرورت ہے۔ فلو جیسی علامات رکھنے والے افراد کو جہاں تک ممکن ہو، ایسے لوگوں سے مناسب فاصلہ برقرار رکھنا چاہیے کیونکہ ان میں انفیکشن کے باعث پیچیدگیوں کا خطرہ زیادہ ہوسکتا ہے۔

صفائی کا خیال رکھنا ضروری

وزارت صحت نے کھانسی یا چھینک آنے کی صورت میں منہ اور ناک کو ٹشو پیپر یا رومال سے ڈھانپنے کی ہدایت کی ہے۔ استعمال شدہ ٹشو کو مناسب طریقے سے ضائع کرنا اور رومال کو باقاعدگی سے تبدیل کرنا بھی ضروری ہے۔اس کے علاوہ ہاتھوں کو بار بار صابن اور پانی سے اچھی طرح دھونا چاہیے۔ جہاں صابن اور پانی دستیاب نہ ہوں وہاں ہینڈ سینیٹائزر کا استعمال کیا جاسکتا ہے۔ ماہرین کے مطابق ذاتی صفائی، مناسب احتیاط اور علامات کی بروقت شناخت سے فلو کے پھیلاؤ کو کم کرنے میں مدد مل سکتی ہے۔

بھارت ایکسپریس اردو