He treats him like his own child: اکھلیش سے ملاقات کے بعد بولیں اعظم خان کی اہلیہ، وہ انہیں اپنی اولاد کی طرح مانتے ہیں

نئی دہلی : سماج وادی پارٹی کے قومی صدر اکھلیش یادو نے جمعرات کو پارٹی کے سینئر لیڈر اور سابق وزیر اعظم خان سے رام پور جیل میں ملاقات کی۔ اس کے بعد وہ اعظم خان کے گھر بھی گئے اور ان کے اہل خانہ سے ملاقات کی۔ اکھلیش یادو سے ملاقات کے بعد اعظم خان کی اہلیہ ڈاکٹر تنزین فاطمہ نے اسے خاندانی ملاقات قرار دیا اور کہا کہ اعظم خان، اکھلیش یادو کو اپنی اولاد کی طرح مانتے ہیں۔اکھلیش یادو سے ملاقات کے بعد ڈاکٹر تنظیم فاطمہ نے دونوں لیڈروں کے درمیان ہونے والی بات چیت کے بارے میں بتایا۔ انہوں نے کہا، ’’اکھلیش جی سے میری بالکل خاندانی بات چیت ہوئی۔ کسی طرح کی کوئی سیاسی گفتگو نہیں ہوئی۔ ہمارا خاندان جن مشکلات سے گزر رہا ہے، انہوں نے ان تمام باتوں پر ہم سے گفتگو کی۔‘‘

 اکھلیش یادو کو اپنی اولاد کی طرح مانتے ہیں اعظم خان

اتر پردیش اسمبلی انتخابات کے حوالے سے سوال پوچھے جانے پر تنزین فاطمہ نے کہا کہ ٹکٹ کے معاملے میں ان کی کوئی بات چیت نہیں ہوئی ہے۔ انہوں نے کہا، ’’میں پہلے بھی کہہ چکی ہوں کہ اعظم خان، اکھلیش یادو کو اپنی اولاد کی طرح مانتے ہیں۔ ایسے میں کسی طرح کے اختلافات کا سوال ہی پیدا نہیں ہوتا۔‘‘ٹکٹ کے معاملے پر انہوں نے کہا کہ پارٹی مناسب سمجھے گی، ویسا ہی فیصلہ کرے گی۔ ہر معاملے میں لوگوں سے مشورہ کیا جاتا ہے اور اعظم خان سے بھی رائے لی جائے گی۔ ان کے مطابق، اکھلیش یادو بھی اعظم خان کے مشورے کے بغیر کوئی کام نہیں کرتے۔

اسدالدین اویسی کے بیان پر تبصرے سے گریز

گزشتہ دنوں رام پور میں آل انڈیا مجلس اتحاد المسلمین (اے آئی ایم آئی ایم) کی ایک ریلی کے دوران اسدالدین اویسی نے اکھلیش یادو پر الزام لگایا تھا کہ انہوں نے اعظم خان کے خاندان کا ساتھ نہیں دیا۔ اس بیان کے حوالے سے سوال پوچھے جانے پر تنزین فاطمہ نے کہا، ’’اویسی صاحب میرے لیے بھی قابل احترام ہیں۔ میں ان کا احترام کرتی ہوں اور ان کی کسی بات پر کوئی تبصرہ نہیں کرنا چاہتی۔‘‘

جیل میں تقریباً ایک گھنٹے تک ہوئی ملاقات

واضح رہے کہ جمعرات کو اکھلیش یادو نے رام پور جیل میں اعظم خان سے ملاقات کی تھی۔ دونوں کے درمیان تقریباً ایک گھنٹے تک گفتگو ہوئی۔ جیل سے باہر آنے کے بعد سماج وادی پارٹی کے صدر نے کہا تھا کہ اعظم خان کے ساتھ ان کا رشتہ سیاسی نہیں بلکہ جذباتی ہے۔ انہوں نے کہا تھا کہ اعظم خان ان کے دل سے جڑے ہوئے ہیں۔اس موقع پر اکھلیش یادو نے بھارتیہ جنتا پارٹی پر سخت تنقید کرتے ہوئے اعظم خان اور ان کے خاندان کے ساتھ ناانصافی کیے جانے کا الزام بھی لگایا۔

بھارت ایکسپریس اردو