Onion Price Hike:ملک بھرمیں پیازکی بڑھتی قیمتوں پرحکومت کی کڑی نظر،کہا،طلب پوری کرنے کے لیے وافرذخیرہ موجود

نئی دہلی: ملک بھر میں پیاز کی بڑھتی قیمتوں کے درمیان حکومت نے بازار کی صورتحال پر کڑی نظر رکھی ہوئی ہے۔ سرکاری ذرائع کے مطابق، منڈیوں میں پیاز کی آمد، اس کی دستیابی اور خوردہ قیمتوں کی مسلسل نگرانی کی جا رہی ہے، تاکہ صارفین کو غیر ضروری مہنگائی سے بچایا جا سکے اور بازار میں پیاز کی سپلائی معمول کے مطابق برقرار رہے۔ حکومت کے اندازے کے مطابق، رواں سال 26-2025 میں ملک میں تقریباً 307.37 لاکھ میٹرک ٹن پیاز کی پیداوار متوقع ہے۔ گزشتہ سال 25-2024 میں یہ پیداوار تقریباً 307.67 لاکھ میٹرک ٹن رہی تھی۔ یعنی اس سال بھی پیداوار گزشتہ سال کے تقریباً برابر رہنے کا امکان ہے۔ اس کے علاوہ حکومت کے پاس پیاز کا مناسب بفر اسٹاک بھی موجود ہے، جسے ضرورت پڑنے پر بازار میں جاری کیا جا سکتا ہے۔

قیمتوں پر قابو کے ساتھ کسانوں کے مفادات کا بھی خیال

حکومت کی قیمتوں کو مستحکم رکھنے کی پالیسی کا مقصد صرف صارفین کو سستی پیاز فراہم کرنا نہیں ہے، بلکہ اس میں کسانوں کے مفادات کو بھی مدنظر رکھا جا رہا ہے۔ حکومت کا کہنا ہے کہ کوشش یہ ہے کہ صارفین کو اچانک قیمتوں میں اضافے کا سامنا نہ کرنا پڑے، جبکہ کسانوں کو ان کی پیداوار کی مناسب قیمت بھی ملتی رہے۔ اگست اور ستمبر کے دوران پیاز کی قیمتوں میں اتار چڑھاؤ عام طور پر دیکھا جاتا ہے۔ اس عرصے میں تہواروں کے سبب طلب بڑھ سکتی ہے، جبکہ بارش اور موسمی حالات بھی منڈیوں میں پیاز کی آمد کو متاثر کرتے ہیں۔ اس کے علاوہ منڈیوں سے بڑے شہروں تک پیاز پہنچانے کی لاگت اور سپلائی چین میں ہونے والی تبدیلیاں بھی قیمتوں پر اثر انداز ہوتی ہیں۔

بفر اسٹاک سے مرحلہ وار جاری ہوگی پیاز

حکومت بفر اسٹاک کو ایک ساتھ بازار میں اتارنے کے بجائے ضرورت کے مطابق مرحلہ وار جاری کر رہی ہے۔ مختلف ریاستوں میں قیمتوں اور بازار کی صورتحال کا جائزہ لیا جا رہا ہے۔ اسی بنیاد پر یہ طے کیا جا رہا ہے کہ کس شہر یا علاقے میں کتنی مقدار میں پیاز بھیجی جائے اور کب اس کی سپلائی کی جائے۔ اس عمل میں ’کاندا ایکسپریس‘ بھی اہم کردار ادا کر رہی ہے۔ اس کے ذریعے ریلوے ریک کے ذریعہ بڑی مقدار میں پیاز ایک مقام سے دوسرے مقام تک پہنچائی جاتی ہے۔ اس سے نقل و حمل آسان ہونے کے ساتھ لاجسٹکس کی لاگت کم ہوتی ہے اور کم وقت میں زیادہ مقدار میں پیاز بڑے کھپت والے شہروں تک پہنچائی جا سکتی ہے۔

پانچ شہروں کے لیے دوبارہ شروع ہوئی سپلائی

’کاندا ایکسپریس‘ منصوبے کی شروعات 25-2024 میں ہوئی تھی۔ اس دوران 14 ریلوے ریک کے ذریعے تقریباً 12 ہزار میٹرک ٹن پیاز پانچ شہروں تک پہنچائی گئی تھی۔ بعد میں 26-2025 میں اس نظام کو بڑے پیمانے پر استعمال کیا گیا اور 86 ریلوے ریک کے ذریعے تقریباً 88 ہزار میٹرک ٹن پیاز ملک کے 16 بڑے شہروں تک پہنچائی گئی۔ گزشتہ تجربے کو دیکھتے ہوئے 24 اگست سے ناسک سے بڑے کھپتی مراکز تک پیاز کی نقل و حمل اور بفر اسٹاک کی فروخت دوبارہ شروع کر دی گئی ہے۔ ابتدائی مرحلے میں چنئی، مدورئی، دہلی، کوچی اور گوہاٹی کو شامل کیا گیا ہے۔ اگر کسی دوسرے شہر میں بھی طلب یا قیمتوں کے اعتبار سے ضرورت محسوس ہوئی تو وہاں بھی سپلائی بڑھائی جا سکتی ہے۔

بھارت ایکسپریس اردو۔