HRA Tax New Rules: نوکری پیشہ افراد کے لیے خوشخبری،ان شہروں میں رہنے والوں کی تنخواہوں میں ہوسکتا ہے اضافہ، HRAپر ٹیکس پر چھوٹ دینے پر غور

نئی دہلی: ملک کے بڑے شہروں میں کام کرنے والے نوکری پیشہ افراد کے لیے مرکزی حکومت جلد ہی بڑی راحت کا اعلان کر سکتی ہے۔ بڑھتے ہوئے مکانات کے کرایوں کو مدنظر رکھتے ہوئے حکومت ہاؤس رینٹ الاؤنس (HRA) پر دی جانے والی ٹیکس چھوٹ کے قواعد میں تبدیلی پر غور کر رہی ہے، جس سے لاکھوں ملازمین کی اِن ہینڈ تنخواہ میں اضافہ ممکن ہے۔ ذرائع کے مطابق ڈرافٹ انکم ٹیکس قواعد 2026 کے تحت یہ تجویز پیش کی گئی ہے کہ کچھ بڑے اور مہنگے شہروں کو زیادہ HRA ٹیکس چھوٹ والے زمرے میں شامل کیا جائے۔ فی الحال یہ سہولت صرف چار میٹرو شہروں—ممبئی، دہلی، کولکاتا اور چنئی—تک محدود ہے، جہاں بنیادی تنخواہ اور ڈی اے (مہنگائی الاؤنس) کے 50 فیصد تک HRA چھوٹ کا فائدہ ملتا ہے، جبکہ دیگر شہروں میں یہ حد 40 فیصد ہے۔

کن شہروں کو شامل کرنے کی تجویز؟
حکومت کی تجویز کے مطابق بنگلورو، حیدرآباد، پونے اور احمد آباد کو بھی 50 فیصد HRA ٹیکس چھوٹ والے شہروں کی فہرست میں شامل کیا جا سکتا ہے۔ اس وقت ان شہروں میں ملازمین کو پرانی حد کے مطابق 40 فیصد تک ہی چھوٹ ملتی ہے۔

ملازمین کو کیا فائدہ ہوگا؟
موجودہ انکم ٹیکس قوانین کے تحت HRA پر ٹیکس چھوٹ تین پیمانوں کی بنیاد پرطے کی جاتی ہے، جن میں سے کم ترین رقم پر چھوٹ دی جاتی ہے۔ ان میں (1) ملازم کو موصول ہونے والا اصل HRA، (2) میٹرو شہروں میں بنیادی تنخواہ اور ڈی اے کا 50 فیصد (دیگر شہروں میں 40 فیصد)، اور (3) ادا کیے گئے کرائے میں سے بنیادی تنخواہ اور ڈی اے کے 10 فیصد منہا کرنے کے بعد بچی رقم شامل ہے۔اگر مجوزہ تبدیلیاں نافذ ہو جاتی ہیں تو نئے شامل ہونے والے شہروں کے ملازمین کو بھی زیادہ چھوٹ ملے گی، جس سے ان کی ٹیکس ذمہ داری کم اور اِن ہینڈ تنخواہ میں اضافہ ہوگا۔

حتمی فیصلہ ابھی باقی
فی الحال یہ تجویز ڈرافٹ مرحلے میں ہے اور اس پر مختلف فریقین سے تجاویز اور اعتراضات طلب کیے جا رہے ہیں۔ مشاورت کے بعد ہی حکومت حتمی فیصلہ کرے گی۔ قواعد کے نافذ ہونے کی صورت میں مہنگے شہروں میں رہنے والے نوکری پیشہ افراد کو ٹیکس میں خاطر خواہ راحت ملنے کی امید ہے۔

بھارت ایکسپریس اردو