All India Weather Update: کہیں بارش تو کہیں آندھی طوفان، دہلی، یوپی سمیت متعدد ریاستوں کے لیے آئی ایم ڈی کا بڑا الرٹ

نئی دہلی :جون کے آغاز کے ساتھ ہی ملک بھر میں موسم نے اچانک بڑی تبدیلی اختیار کر لی ہے۔ ایک طرف جنوب مغربی مانسون تیزی سے آگے بڑھ رہا ہے اور ملک کے مختلف حصوں کو اپنی لپیٹ میں لے رہا ہے، تو دوسری جانب شمال مغربی بھارت میں ایک نئے ویسٹرن ڈسٹربنس کی آمد نے موسم کو مزید غیر مستحکم بنا دیا ہے۔ بھارت محکمہ موسمیات (آئی ایم ڈی) کے مطابق آئندہ 24 گھنٹوں کے دوران مانسون کے کیرالہ، تمل ناڈو، لکشدیپ اور بحیرہ عرب و خلیج بنگال کے کئی علاقوں میں مزید مضبوط ہونے کا امکان ہے۔ اس پورے موسمی نظام کے باعث دہلی-این سی آر سے لے کر جھارکھنڈ اور اتر پردیش تک کہیں ہلکی بارشیں تو کہیں تیز آندھی اور طوفانی ہوائیں زندگی کو متاثر کر سکتی ہیں۔

دہلی– این سی آر میں یلو الرٹ

دہلی –این سی آراور اس سے ملحقہ این سی آر کے علاقوں میں آئندہ دو روز کے لیے آندھی اور بارش کا یلو الرٹ جاری کیا گیا ہے۔ محکمہ موسمیات کے مطابق دن کے مختلف اوقات میں گرج چمک کے ساتھ اچانک بارش ہو سکتی ہے۔ زیادہ سے زیادہ درجہ حرارت تقریباً 38 ڈگری اور کم سے کم 28 ڈگری سینٹی گریڈ کے آس پاس رہنے کا امکان ہے۔ تیز ہواؤں اور بادلوں کی گھن گرج کے باعث موسم قدرے خوشگوار ضرور ہوگا لیکن اچانک آنے والے جھکڑ مشکلات پیدا کر سکتے ہیں۔

مغربی اتر پردیش میں اورنج الرٹ

اتر پردیش کے مغربی حصوں میں موسم زیادہ خطرناک رخ اختیار کر سکتا ہے۔ میرٹھ، سہارنپور، شاملی اور مظفر نگر سمیت کئی اضلاع میں محکمہ موسمیات نے اورنج الرٹ جاری کیا ہے۔ یہاں 60 سے 70 کلومیٹر فی گھنٹہ کی رفتار سے تیز اور نقصان دہ آندھی چلنے کا خدشہ ظاہر کیا گیا ہے۔ بعض علاقوں میں بارش کے ساتھ بجلی گرنے کے واقعات بھی پیش آ سکتے ہیں، جس کے پیش نظر شہریوں کو احتیاط برتنے کی ہدایت دی گئی ہے۔

جھارکھنڈ میں مانسون کی سرگرمی تیز

جھارکھنڈ میں مانسون پوری طرح فعال ہو چکا ہے جس کے باعث گرمی کی شدت میں نمایاں کمی آئی ہے۔ ریاست کے 16 اضلاع جن میں رانچی، دیوگھر، دمکا، جمتارا، گوڈا، صاحب گنج، پاکوڑ، کھونٹی، گملا، سمڈیگا، لوہردگا، مغربی و مشرقی سنگھ بھوم، سرائیکیلا، بوکارو اور رام گڑھ شامل ہیں، میں ہلکی سے درمیانی بارش کا امکان ہے۔ تاہم ہزاری باغ، گریڈیہ اور دیگر شمال مشرقی علاقوں میں 60 کلومیٹر فی گھنٹہ تک کی رفتار سے طوفانی ہوائیں اور بجلی گرنے کا خطرہ بھی موجود ہے۔ درجہ حرارت کچھ علاقوں میں 30 سے 33 ڈگری کے درمیان جبکہ کچھ حصوں میں 41 ڈگری تک جا سکتا ہے۔

پہاڑی اور وسطی بھارت میں خطرہ

ہماچل پردیش، اتراکھنڈ اور راجستھان کے کچھ حصوں میں بارش کے ساتھ ژالہ باری کا امکان ظاہر کیا گیا ہے۔ مدھیہ پردیش، چھتیس گڑھ اور ودربھ کے علاقوں میں آئندہ دنوں کے دوران 50 سے 60 کلومیٹر فی گھنٹہ کی رفتار سے تیز ہوائیں چلنے اور گرج چمک کے ساتھ بارش کا سلسلہ جاری رہنے کی پیش گوئی کی گئی ہے۔ ان علاقوں میں کسانوں اور مسافروں کو خصوصی احتیاط برتنے کی ہدایت دی گئی ہے۔

جنوبی بھارت میں شدید بارشوں کا سلسلہ

جنوبی بھارت میں مانسون پوری شدت کے ساتھ سرگرم ہے۔ کیرالہ، ساحلی کرناٹک اور جنوبی اندرونی کرناٹک میں 9 جون تک موسلا دھار بارشوں کا امکان ہے۔ تمل ناڈو، پڈوچیری، کونکن و گوا اور لکشدیپ میں بھی شدید بارشیں متوقع ہیں۔ شمال مشرقی ریاستوں جیسے آسام، میگھالیہ، اروناچل پردیش، ناگالینڈ، منی پور، میزورم اور تریپورہ میں مسلسل بارشوں کے باعث معمولات زندگی متاثر ہو سکتے ہیں۔ماہرین موسمیات کے مطابق موجودہ موسمی نظام آئندہ چند دنوں تک ملک کے مختلف حصوں میں غیر یقینی اور شدید موسم کی صورتحال برقرار رکھ سکتا ہے، اس لیے عوام کو محتاط رہنے اور محکمہ موسمیات کی ہدایات پر عمل کرنے کی ضرورت ہے۔

بھارت ایکسپریس اردو