Farmers rally in support of wrestlers cancelled: پہلوانوں کی حمایت میں جنتر منتر پر کسانوں کی ریلی منسوخ، راکیش ٹکیت نے بتائی وجہ

بی جے پی رکن پارلیمنٹ اور ریسلنگ ایسوسی ایشن کے سابق صدر برج بھوشن شرن سنگھ  کے خلاف احتجاج کرنے والے پہلوانوں کی حمایت میں تمام کھاپ پنچایت اور کسان تنظیم میدان میں ہیں۔ اسی سلسلے میں بھارتیہ کسان یونین کے لیڈر راکیش ٹکیت 9 جون کو جنتر منتر پر ایک پروگرام منعقد کرنے والے تھے۔ جسے اب منسوخ کر دیا گیا ہے۔ راکیش ٹکیت نے کہا کہ فی الحال وزیر داخلہ امت شاہ سے پہلوانوں کی بات چیت چل رہی ہے۔ اس لیے پروگرام منسوخ کر دیا گیا ہے۔ پہلوان مستقبل میں جو بھی تاریخ دیں گے ہم اس میں ان کے ساتھ ہوں گے۔

بتا دیں کہ پیر (5 جون) کو پہلوانوں نے وزیر داخلہ امت شاہ سے ملاقات کی تھی۔ اس ملاقات کے دوران پہلوان بجرنگ پونیا، ساکشی ملک امت شاہ سے ملنے پہنچے تھے۔ تاہم میٹنگ میں پہلوانوں کو امت شاہ کی جانب سے کی گئی کارروائی کے حوالے سے کیا یقین دہانی کرائی گئی اور ان کے درمیان کیا بات چیت ہوئی، پہلوانوں نے اس بارے میں کوئی معلومات نہیں دی ہیں۔ دوسری جانب وزیر داخلہ سے ملاقات کے بعد پہلوانوں نے اپیل کی تھی کہ ان کی حمایت میں کسی بھی قسم کا احتجاج نہ کیا جائے۔ جس کے بعد راکیش ٹکیت نے جنتر منتر پر ہونے والے پروگرام کو منسوخ کرنے کا اعلان کیا ہے۔

قابل ذکر بات یہ ہے کہ ہریانہ کے کروکشیتر میں گزشتہ ہفتے منعقدہ کھاپ لیڈروں کی مہاپنچایت میں جنسی استحصال کے الزامات میں گھرے بی جے پی رکن پارلیمنٹ برج بھوشن شرن سنگھ کی گرفتاری کا مطالبہ کیا گیا تھا۔ جس کے لیے کھاپ پنچایتوں نے حکومت کو 9 جون تک کا الٹی میٹم دیا تھا۔ اس کے بعد کسانوں اور کھاپ پنچایت سے وابستہ لوگوں نے دہلی کے جنتر منتر کی طرف مارچ کرنے کا اعلان کیا تھا۔ اس سے قبل مظفر نگر میں بھی ایک مہاپنچایت کا انعقاد کیا گیا تھا۔ پہلوان بجرنگ پونیا نے کہا تھا کہ پہلوان خود ایک مہاپنچایت کا انعقاد کریں گے۔ اس سے پہلے کسانوں اور کھاپ پنچایت لیڈروں سے کسی بھی طرح کا کوئی فیصلہ نہ لینے کی اپیل کی تھی۔

بھارت ایکسپریس۔