UP International Trade Show: چِپ سے لے کر شپ تک سب کچھ بھارت میں بنانا ہے: وزیراعظم مودی

گریٹر نوئیڈا: اتر پردیش کے گریٹر نوئیڈا میں واقع انڈیا ایکسپو مارٹ میں منعقد ’اتر پردیش انٹرنیشنل ٹریڈ شو‘ کے تیسرے ایڈیشن کا جمعرات کو وزیراعظم نریندر مودی نے افتتاح کیا۔ انہوں نے ملک بھر سے آئے صنعت کاروں، سرمایہ کاروں اور نوجوانوں کا خیرمقدم کرتے ہوئے کہا کہ یہ تقریب بھارت کی اقتصادی ترقی اور خود انحصاری کی سمت میں ایک بڑا قدم ہے۔

وزیراعظم نے کہا کہ اس ٹریڈ شو میں 2,200 سے زیادہ ایکزیبیٹرز اپنے پروڈکٹس اور خدمات کا مظاہرہ کر رہے ہیں۔ انہوں نے اس تقریب کے انعقاد پر وزیراعلیٰ یوگی آدتیہ ناتھ کو مبارکباد دی اور کہا کہ اس بار روس پارٹنر کنٹری ہے۔

پنڈت دین دیال اپادھیائے کی جینتی کا ذکر کرتے ہوئے وزیراعظم مودی نے کہا کہ ’انتودیا‘ کا مطلب ہے ترقی کی روشنی سماج کے آخری پائیدان پر کھڑے شخص تک پہنچنا۔ غریب تک ترقی پہنچے اور ہر طرح کا امتیاز ختم ہو، یہی انتودیا ہے اور یہی سماجی انصاف کی مضبوطی ہے۔

انہوں نے یو پی آئی، آدھار، ڈیجی لاکر اور جَیم پورٹل جیسی اسکیموں کو اقتصادی انقلاب کی بنیاد بتایا۔ انہوں نے کہا کہ آج جَیم پورٹل سے 25 لاکھ سے زیادہ سروس پرووائیڈرز جڑے ہیں اور مرکزی حکومت 15 لاکھ کروڑ روپے سے زیادہ کے سامان اور خدمات خرید چکی ہے۔ صرف ایم ایس ایم ایز سے 7 لاکھ کروڑ روپے کی خرید ہوئی ہے، جو چھوٹے صنعت کاروں کے لیے بڑا سہارا ہے۔

انہوں نے جی ایس ٹی اصلاح کو تاریخی قرار دیتے ہوئے کہا کہ 2014 سے پہلے ٹیکس کا جال ایسا تھا کہ خاندان کا بجٹ اور کاروبار دونوں ہی متوازن نہیں رہ پاتے تھے۔ مثال دیتے ہوئے کہا کہ 2014 سے پہلے 1,000 روپے کی قمیض پر 117 روپے ٹیکس لگتا تھا، جو اب گھٹ کر محض 35 روپے رہ گیا ہے۔ اسی طرح، 2014 سے پہلے 100 روپے کا سامان 131 روپے میں ملتا تھا، لیکن جی ایس ٹی کے بعد یہ گھٹ کر 118 روپے اور اب صرف 105 روپے میں دستیاب ہے۔ ضرورت کی زیادہ تر اشیاء پر اب صرف 5 فیصد ٹیکس ہے۔ اس کا کسان، مزدور اور عام صارف کو براہِ راست فائدہ ہو رہا ہے۔

وزیراعظم نے صنعت کاروں سے اپیل کی کہ وہ ایسے ماڈل تیار کریں جو بھارت کو خود انحصار بنانے میں مددگار ہوں۔ انہوں نے کہا، “ہر وہ پروڈکٹ جو ہم بھارت میں بنا سکتے ہیں، اسے بھارت میں ہی بنانا ہوگا۔ چِپ سے لے کر شپ تک سب کچھ بھارت میں بنانا ہے۔ حکومت کندھے سے کندھا ملا کر آپ کے ساتھ کھڑی ہے۔ مینوفیکچرنگ میں کوالٹی سے کوئی سمجھوتہ نہیں ہونا چاہیے۔ دیسی ریسرچ، ڈیزائن اور ڈیولپمنٹ کا مضبوط ایکو سسٹم تیار کرنا ہوگا۔”

انہوں نے کہا کہ اتر پردیش آج ملک کا سب سے زیادہ ایکسپریس وے والا صوبہ ہے۔ یہاں سب سے زیادہ انٹرنیشنل ایئرپورٹس بھی بن رہے ہیں۔ یوپی میں دو بڑے ڈیڈیکیٹڈ فریٹ کاریڈور اور او ڈی او پی جیسی اسکیموں سے مقامی مصنوعات کو عالمی شناخت ملی ہے۔

یہ بھی پڑھیں: وزیرِ اعظم نریندر مودی نے گریٹر نوئیڈا میں ‘انٹرنیشنل ٹریڈ شو’ کا کیا افتتاح، اتر پردیش کو سرمایہ کاری کا اہم مرکز قرار دیا

انہوں نے بتایا کہ بھارت الیکٹرانکس اور مینوفیکچرنگ سیکٹر میں دنیا کا دوسرا سب سے بڑا مرکز بن چکا ہے۔ ملک میں بننے والے 55 فیصد موبائل یوپی میں بنتے ہیں۔ اس کے علاوہ، یوپی میں اے کے-203 رائفل اور برہموس میزائل کا پروڈکشن بھی ہو رہا ہے۔ بدلتی دنیا میں جو ملک جتنا زیادہ دوسروں پر انحصار کرے گا، اس کی ترقی اتنی ہی محدود ہوگی۔

انہوں نے سرمایہ کاروں سے کہا کہ بھارت اور خاص طور پر اتر پردیش میں سرمایہ کاری کرنا ان کے لیے ایک ’وِن-وِن سچویش‘ ہے۔ انہوں نے تمام صنعت کاروں اور شرکاء کو انٹرنیشنل ٹریڈ شو کے لیے نیک تمنائیں دیں اور بھارت کو 2047 تک ’وکست راشٹرا‘ بنانے کے ہدف کو دہرایا۔

بھارت ایکسپریس۔