قومی

دہلی کا خان مارکیٹ دنیا کے مہنگے ترین ریٹیل بازاروں میں شامل، ایک سال میں 14 فیصد بڑھا کرایہ، عالمی فہرست میں خان مارکیٹ کو 24واں مقام

نئی دہلی: دہلی کا مشہور خان مارکیٹ دنیا کے مہنگے ترین ریٹیل بازاروں کی فہرست میں 24ویں مقام پر پہنچ گیا ہے۔ اس کے ساتھ ہی یہ عالمی فہرست میں جگہ بنانے والی ہندوستان کی واحد ریٹیل اسٹریٹ بن گئی ہے۔ بدھ کو جاری ہونے والی ایک رپورٹ کے مطابق، گزشتہ ایک سال کے دوران خان مارکیٹ میں دکانوں کے کرایوں میں 14 فیصد اضافہ درج کیا گیا ہے۔ رئیل اسٹیٹ سروسز فراہم کرنے والی کمپنی ’کُش مین اینڈ ویک فیلڈ‘ کی رپورٹ کے مطابق خان مارکیٹ میں سالانہ کرایہ بڑھ کر تقریباً 238 ڈالر فی مربع فٹ ہوگیا ہے، جو ماہانہ بنیاد پر تقریباً 1875 روپے فی مربع فٹ کے برابر ہے۔

نیویارک کا اپر ففتھ ایونیو دنیا کا مہنگا ترین بازار

رپورٹ کے مطابق نیویارک کا ’اپر ففتھ ایونیو‘ دنیا کی سب سے مہنگی ریٹیل اسٹریٹ بن گیا ہے۔ یہاں کرایوں میں 35 فیصد اضافے کے بعد سالانہ کرایہ 2700 ڈالر فی مربع فٹ تک پہنچ گیا ہے۔ اس طرح یہ 2023 کے بعد پہلی مرتبہ تیسرے مقام سے اوپر آکر پہلے نمبر پر آگیا ہے۔ لندن کی ’نیو بانڈ اسٹریٹ‘ 2230 ڈالر فی مربع فٹ سالانہ کرایے کے ساتھ دوسرے اور میلان کی ’ویا مونٹینا پولیونے‘ 2160 ڈالر فی مربع فٹ کے ساتھ تیسرے مقام پر ہے۔ کُش مین اینڈ ویک فیلڈ میں ریٹیل انڈیا کے سربراہ ملن روہینیش نے کہا کہ ہندوستانی ریٹیل مارکیٹ مضبوط بنیادوں پر آگے بڑھ رہی ہے۔ اسے مسلسل صارفین کی خریداری، ریٹیل کاروبار کے پھیلاؤ اور پریمیم مصنوعات کی بڑھتی ہوئی مانگ سے تقویت مل رہی ہے۔

عالمی سطح پر کرایوں میں اوسطاً 3 فیصد اضافہ

رپورٹ کے مطابق دنیا بھر میں مقامی کرنسی کی بنیاد پر ریٹیل بازاروں کے کرایوں میں سالانہ اوسطاً 3 فیصد اضافہ ہوا ہے، جب کہ 2025 میں یہ شرح 4.3 فیصد تھی۔ سروے میں شامل تقریباً 49 فیصد ریٹیل مارکیٹس میں کرایے بڑھے، جب کہ 19 فیصد مقامات پر کمی درج کی گئی۔ باقی 32 فیصد بازاروں میں کرایے مستحکم رہے۔ کُش مین اینڈ ویک فیلڈ کے گلوبل تھنک ٹینک میں بین الاقوامی تحقیق کے سربراہ ڈاکٹر ڈومینک براؤن نے کہا کہ عالمی سطح پر کرایوں میں اضافے کی رفتار کچھ سست ضرور ہوئی ہے، لیکن دنیا کے اہم ترین ریٹیل مراکز میں جگہ حاصل کرنے کے لیے مقابلہ اب بھی انتہائی سخت ہے۔ رپورٹ کے مطابق دنیا کی 30 سرفہرست ریٹیل اسٹریٹس پر 8 لاکھ 15 ہزار مربع فٹ سے زیادہ جگہ لیز پر دی گئی۔ اس دوران 153 نئے لیز معاہدے ہوئے اور نئے اسٹور کھلے۔ ان سرگرمیوں میں 80 فیصد سے زیادہ ایسے ریٹیل برانڈز شامل تھے جو پہلی بار ان بازاروں میں داخل ہوئے، جب کہ لیز پر لی گئی مجموعی جگہ کا تقریباً 90 فیصد حصہ بین الاقوامی برانڈز کے پاس رہا۔

رپورٹ کے مطابق فیشن برانڈز کی مانگ سب سے زیادہ

رپورٹ کے مطابق فیشن ریٹیلرز کرایے پر جگہ حاصل کرنے کا سب سے بڑا ذریعہ بنے رہے۔ مجموعی لیز معاہدوں میں ان کا حصہ 50 فیصد اور لیز پر لی گئی جگہ میں 57 فیصد رہا۔ تاہم اب ہیلتھ اینڈ بیوٹی، پرسنل گڈز، فوڈ اینڈ بیوریج اور تجرباتی ریٹیل جیسے شعبوں کے برانڈز بھی ان بازاروں میں جگہ حاصل کر رہے ہیں، جہاں پہلے زیادہ تر فیشن برانڈز کا غلبہ تھا۔ ایشیا پیسیفک (اے پی اے سی) خطے میں 2026 کی تیسری سہ ماہی تک کے 12 ماہ کے دوران اہم ریٹیل مقامات کے کرایوں میں سالانہ بنیاد پر 3.1 فیصد اضافہ ہوا، جب کہ ایک سال پہلے یہ شرح 2.3 فیصد تھی۔ اس طرح ایشیا پیسیفک دنیا کا واحد خطہ رہا جہاں کرایوں میں اضافے کی رفتار تیز ہوئی۔

خان مارکیٹ ایشیا پیسیفک میں 25ویں مقام پر

ایشیا پیسیفک کی درجہ بندی میں خان مارکیٹ 25ویں مقام پر رہا۔ اس کے بعد گروگرام کا گیلریا مارکیٹ 28ویں، نئی دہلی کا کناٹ پلیس 29ویں اور ممبئی کا لنکنگ روڈ 33ویں مقام پر رہا۔ ممبئی کے لنکنگ روڈ میں سالانہ بنیاد پر کرایوں میں 28 فیصد اضافہ درج کیا گیا، جو ایشیا پیسیفک خطے میں سب سے زیادہ ہے۔ یہ ہندوستان کے اہم ہائی اسٹریٹ بازاروں میں ریٹیل کاروبار کی مضبوط مانگ کو ظاہر کرتا ہے۔ رپورٹ میں ہندوستان کے دیگر ریٹیل مقامات میں ممبئی کے فورٹ/فاؤنٹین اور کیمپس کارنر، بنگلورو کے وٹھل مالیا روڈ، بریگیڈ روڈ اور اندرا نگر، پونے کے جے ایم روڈ، ایم جی روڈ اور ایف سی روڈ، کولکاتا کے پارک اسٹریٹ اور گڑیاہاٹ، حیدرآباد کے جوبلی ہلز، بنجارہ ہلز اور حمایت نگر، نیز چنئی کے انا نگر اور پونڈی بازار کو بھی شامل کیا گیا ہے۔

بھارت ایکسپریس اردو۔

Habiburrahman

Recent Posts

یوگی کے گڑھ گورکھپور میں اکھلیش یادو کابڑا سیاسی شو، 20 کلومیٹر روڈ شو میں امڑی بھیڑ، بی جے پی کے صفائے کا دعویٰ

سماجوادی پارٹی کے سربراہ اکھلیش یادو بدھ کے روز اپنے پی ڈی اے رتھ کے…

1 hour ago

Social Justice Summit: سشما سوراج بھون میں سجے گا سماجی انصاف کا عظیم الشان پلیٹ فارم، وزیر اعظم مودی اختتامی اجلاس سے کریں گے خطاب

19 نومبر کو نئی دہلی میں منعقدہ دو روزہ محکمہ جاتی کانفرنس کے اختتامی اجلاس…

3 hours ago

PM Modi Meets Prince William and Kate: وزیر اعظم نریندر مودی کی پرنس ولیم اور شہزادی کیٹ سے ملاقات، ’ارتھ شاٹ پرائز‘ کی کوششوں کو سراہا

وزیر اعظم نے ماحولیاتی مسائل کے حل کے لیے نئی اختراعات اور ہندوستانی صلاحیتوں کو…

3 hours ago

Ukraine Crisis: کیا یوکرین جنگ ختم ہوگی؟ الاسکا میں ناکام مذاکرات کے بعد کل ٹرمپ اور پوتن کی اہم ملاقات

چین میں ٹرمپ، شی جن پنگ اور ولادیمیر پوتن کی پہلی سہ فریقی ملاقات، یوکرین…

3 hours ago