Delhi Liquor Scam: کے سی آر کی بیٹی کویتا سے سی بی آئی نے کی پوچھ گچھ

Delhi Liquor Scam: سنٹرل بیورو آف انوسٹی گیشن (CBI) کے ذریعہ اتوار کو تلنگانہ کے چیف منسٹر کے. چندر شیکھر راؤ کی بیٹی کے. کویتا سے دہلی شراب گھوٹالہ کیس میں حیدرآباد میں ان کی رہائش گاہ پر پوچھ گچھ کی جارہی ہے۔ سی بی آئی حکام کی ایک ٹیم صبح 11 بجے بھارت راشٹرا سمیتی (BRS) ممبر قانون ساز کونسل (MLC) کی بنجارہ ہلز کی رہائش گاہ پر پہنچی۔

سخت سیکورٹی کے درمیان سی بی آئی کے اہلکار دو گاڑیوں میں، ان کا بیان ریکارڈ کرنے کے لیے پہنچے ۔ سی بی آئی حکام کی آمد سے قبل کویتا نے اپنے حامیوں اور بی آر ایس لیڈروں اور کارکنوں سے جمع نہ ہونے کی درخواست کی تھی۔

ہجوم کے اجتماع کو روکنے کے لیے جگہ جگہ رکاوٹیں لگائی گئی تھیں۔ بی آر ایس ذرائع نے کہا کہ ایسا اس لیے کیا گیا ہے کیونکہ ایک اجتماع کو سی بی آئی کی تحقیقات میں رکاوٹیں پیدا کرنے کی کوشش کے طور پر دیکھا جا سکتا ہے۔

تاہم، پوچھ گچھ سے پہلے، بی آر ایس لیڈر کے حامیوں نے ان کی رہائش گاہ کے قریب ہورڈنگز لگا دیےتھے۔ ایک ہورڈنگ میں لکھا ہے، “جنگجو کی بیٹی کبھی نہیں ڈرے گی۔” ہم کویتا کے ساتھ ہیں۔ سی بی آئی نے کویتا کو ضابطہ فوجداری کی دفعہ 160 کے تحت نوٹس دے کر ان سے وضاحت طلب کی تھی۔

سی بی آئی نے اپنے نوٹس میں کہا ہے کہ2021-22 کے لیے دہلی کے نائب وزیر اعلی منیش سسودیا اور دیگر 14 افراد کے خلاف ایکسائز پالیسی سے متعلق الزامات کے سلسلے میں مقدمہ درج کیا گیا ہے۔یہ مقدمہ مرکزی وزارت داخلہ کے ڈائریکٹر پروین کمار رائے سے موصولہ تحریری شکایت کی بنیاد پر درج کیا گیا تھا۔

کویتا کا نام 30 نومبر کو ای ڈی کی طرف سے دہلی کی ایک عدالت میں بدھ کے روز داخل کی گئی ریمانڈ رپورٹ میں سامنے آیا تھا جس میں دہلی شراب پالیسی گھوٹالہ میں تاجر امت اروڑہ کا ریمانڈ طلب کیا گیا تھا۔

ریمانڈ رپورٹ کے مطابق، تاجر وجے نائر، جو اس معاملے میں پہلے ہی گرفتار ہو چکے ہیں، نے AAP لیڈروں کی جانب سے ‘ساؤتھ گروپ’ نامی گروپ سے 100 کروڑ روپے کی رشوت لی تھی۔ رپورٹس کے مطابق یہ گروپ کو سرتھ ریڈی، کویتا اور ماگنتھا سرینیواسولو ریڈی کے زیر کنٹرول ہے۔

سرتھ ریڈی جو  فارما میجر اربندو فارما کے ڈائریکٹرز میں سے ایک ہیں کو پہلے ہی گرفتار کیا جا چکا ہے۔ سری نواسولو ریڈی آندھرا پردیش کی حکمران جماعت YSR کانگریس پارٹی (YSRCP) سے تعلق رکھنے والے رکن پارلیمنٹ ہیں۔

کویتا نے ابتدائی طور پر 6 دسمبر کو سی بی آئی کی اس سے ملاقات کی درخواست پر رضامندی ظاہر کی تھی۔ تاہم، بعد میں انہوں نے ایجنسی کو ایک خط لکھا جس میں وزارت داخلہ، حکومت ہند سے شکایت اور ایف آئی آر کی کاپی مانگی گئی۔ جواب میں سی بی آئی نے انہیں بتایا کہ ایف آئی آر اور شکایت کی ایک کاپی ویب سائٹ پر دستیاب ہے۔

کویتا نے 5 دسمبر کو اپنے جواب میں مرکزی ایجنسی کو بتایا کہ انہوں نے ایف آئی آر کے مندرجات، ملزمین کی فہرست اور شکایت کے مواد کا  غور سے مطالعہ کیا ہے لیکن انہیں ان کا نام کسی بھی طرح سے شامل نہیں پایا۔

انہوں نے مرکزی ایجنسی کو بتایا کہ وہ 6 دسمبر کو ان سے ملنے کی پوزیشن میں نہیں ہیں اور متبادل تاریخیں تجویز کی۔

سی بی آئی نے 6 دسمبر کو کویتا کو مطلع کیا کہ ایک ٹیم 11 دسمبر کو حیدرآباد میں ان کی رہائش گاہ کا دورہ کرے گی اور کیس کی تحقیقات کے سلسلے میں ان سے پوچھ گچھ اور بیان ریکارڈ کرے گی۔ مرکزی ایجنسی نے ان سے کہا کہ وہ مذکورہ تاریخ اور وقت پر اپنی دستیابی کی تصدیق کرے۔ کویتا نے اسی دن ایک جواب بھیجا جس میں ان کی دستیابی کی تصدیق کی گئی۔

-بھارت ایکسپریس